بشار جاسم
هند البلوشي ممثلة لا يختلف عليها اثنان فهي استطاعت من خلال دورها في مسلسل الفرية ان تلفت الانظار لها خصوصا ان العملاقة حياة الفهد اعطتها دور عمرها.
هند فتحت قلبها لـ «الأنباء» وتحدثت عن اعمالها الجديدة ومشروع الالبوم الغنائي ورأيها في اغلب الفنانات واليكم تفاصيل الحوار:
هند تحبين نتكلم عن الفرية ولا الخراز؟
كيفك اللي تحب تبلش فيه بلش.
دورچ بالفرية ما تحسين انه سوالچ ازمة؟
ليش ازمة.
اقصد ان ام سوزان عطتچ دور عمرچ والدور سواچ نجمة رمضان بلا منازع بس شنو راح تقدمين عقبه؟
صح كلامك، دوري بالفرية حطني بموقف صعب وايد وخلاني ما اقدم اي شي يا انه يكون بنفس المستوى يا يكون افضل وخلاني اكون بحالة نفسية لمدة شهرين واللي كان يقول لي انتي استنزفتي كل طاقاتچ بالفرية وبالفعل هالكلام اثر فيني بس انا ارد عليهم واقولهم ان شاء الله اقدم شيء احسن واذكر اني كلمت ماما حياة الفهد وكنت اقولها كل شيء بس اهي تقولي ما كو شي اسمه الفنان يستنزف كل طاقته والفنان الناجح ينوع وكلامها بالفعل خلاني اطخ شوية (تضحك).
وشنو سالفة دور حصة بالفرية يقولون ما كان لچ، صچ هالكلام؟
لا الدور كان لي ومكتوب علشان هند وانا كنت في بال ام سوزان واهي شافتني في مسلسل اللقيطة وقعدنا مع بعض واهي تكتب كنت معاها خطوة بخطوة بس قبل تصوير المسلسل كنت امر بظروف طلاقي مع زوجي وكان مهدد بالصحف اني ما امثل وام سوزان ما كانت تقدر تنطرني لان ما كان في وقت وجابو لها اكثر من اسم واكثر من فنانة وشافت وايد مشاهد حق اغلب الممثلات ورشحت وايد فنانات بس الحمدلله الدور لي ورجع لي.
منو الفنانة اللي صرحت وقالت ان الدور لها؟
يعني انت ما تدري يا بشار ولا شنو!
لو ادري چان ما سألتچ.
اهي شذى سبت.
ليش صرحت طالما الدور لچ؟
عليك نور والمشكلة انها صرحت بعد ما نجح الفرية واحب اقولها وينچ يا شذى من قبل ما ينعرض المسلسل وقلت ان الدور كان لچ وشمعنا بعد ما انا نجحت بالدور صرحتي.
ما كلمتيها عقب تصريحها؟
كلمتها وقالت هذا حچي صحافة وبالعكس اهي اخت عزيزة وماكو الا الخير.
بصراحة هند بعدما انعرض الفرية اكو فنانات اتصلو فيچ وهنوچ؟
بصراحة اي ووايد.
اقدر اعرف منو؟
سعاد عبدالله شافتني وقالت لي اهنيچ على هالدور وزهرة عرفات ويلدا ووايد والله.
سعاد عبدالله هنتچ على الدور بس ما رشحتچ حق اعمالها؟
بصراحة لا ما رشحتني وقالت لي كنتي مبدعة.
تفاصيل الحوار في ملف ( pdf )