هديل الفهد
بدأ من خلال المدرسة فشارك في عدة مهرجانات منها مهرجان الخرافي، وحاز مجموعة من الجوائز وشارك في مسرحية «ينانوة الفريج» كمخرج منفذ، فتم ترشيحه للعمل كمخرج لمسرحية «الحاسة السادسة» التي لاقت نجاحا كبيرا وتم عرضها لموسمين ولم يتوقف طموحه عند هذا الحد، «الأنباء» حاورت المخرج الشاب علي العلي الذي تحدث عن تجربته وعن حبه للإخراج، بالاضافة الى تعاونه مع الفنان عبدالعزيز المسلم والكثير من الامور الفنية التي تهم الشباب الكويتي المتميز التي جاءت في التفاصيل الآتية:
كلمنا عن بدايتك؟
بديت من خلال المدرسة ومسرح الشباب ومن ثم ترشحت للمسرح الشعبي من خلال المهرجانات لين اشتغلت مخرج منفذ بمسرحية «ينانوة الفريج» واخيرا اخرجت «الحاسة السادسة» وشاركت في تأليفها.
لقيت تشجيع من الفنانين والمنتجين؟
التقيت بأكثر من مخرج من خارج الكويت ولقيت التشجيع منهم والحمدلله رشحني المخرج علي وحيد للعمل كمخرج منفذ في مسرحية «ينانوه الفريج» وتعرفت على الفنان عبدالعزيز المسلم، اللي اتاحلي الفرصة للعمل معاه ومابي انسى جميع الجهات اللي دعمتني وبديت معاهم ومازالوا يشجعوني.
ليش توجهت للإخراج مو للتمثيل؟
من يوم ما كنت صغير اطالع التلفزيون وايد، واروح مسرحيات، وأهلي بالبداية كانوا معارضين ويبوني ادش طب او هندسة، وبعد سبع سنوات من المفاجأة اقتنعوا ودخلت المعهد العالي للفنون المسرحية، وكنت احرص على حضور أكثر المهرجانات، مثل القاهرة والخليج، واحاول اني اطلّع على تجارب الآخرين، واتعلم منهم، بالاضافة الى حرصي على المشاركة في المهرجانات لأطور قدراتي.
منو قدوتك في الإخراج وتطمح توصل لمستواه؟
كل مخرج ناجح ويهتم بشغله ويقدم اعمال تهم الناس وتفيدهم اهو قدوتي واحب اكون مثله.
منو الفنان اللي تحب تتعاون معاه؟
كانت احدى امنياتي ان اتعاون مع الاستاذ عبدالعزيز المسلم وتحققت الأمنية واتمنى اتعاون مع الفنان جمال الردهان، وفي المستقبل القريب ستتحقق واحب اتعاون مع كل الفنانين الكبار اللي قدموا الكثير للساحة الفنية من اعمال مازالت راسخة في الذاكرة.
ما تفكر تخرج مسلسلات بعد تجربتك بالمسرح؟
حاب في الوقت الحالي اركز على دراستي واذا خلصت هالسنة بكمل دراستي، واشتغلت مساعد مخرج في احد المسلسلات بس حاليا تركيزي بالدراسة.
ومنو السبب في ظهورك ودعمك واللي خلاك ناجح؟
بالنسبة للدعم، ولله الحمد انا قابلت اكثر المسرحيين في الخليج، ولا واحد حبطني منهم ومن خلال مسرحية «ينانوة الفريج» رشحني المخرج علي وحيد لأكون مخرج منفذ، وعرفني على الاستاذ عبدالعزيزالمسلم، اللي عطاني الفرصة واللي اشكره وخلاني اشارك في تأليف النص، واخرج العمل والحمدلله الجهات اللي بديت وياهم مازالت علاقتي حلوة فيهم ويشجعوني.
كلمنا عن «الحاسة السادسة»، قالوا ان المخرج الفعلي للمسرحية هو الفنان عبدالعزيز المسلم؟
قبل سنة 2001 أخرجت اول عمل وقالوا ان خالد المفيدي هو اللي اخرج العمل، لأنه يصير لي، بعدين قالوا المخرج جابر محمدي اخرجلي، وبعدما اخرجت بالمسرح الشعبي قالوا ان د.حسين المسلم يخرج بالشعبي وهو اللي يخرج لعلي العلي.
ويزيد: والحين «الحاسة السادسة» قالوا عبدالعزيز المسلم لكني ما ادعي شي، بس العمل المسرحي يعتبر عمل جماعي، مثلا مشعل الشايع اييب فكرة ويشاورني وساعات انا اشاورهم بشي، واذا قارنا بمخرج صار له خمس سنوات ومخرج صار له 21 سنة وحاز على جوائز فأكيد ان الخبرة لها دور يشوف شي احسن مني نتيجة بعد نظر وعمق تجربة انا ما اشوفه ويساعدني.
تفاصيل الحوار في ملف ( pdf )