Note: English translation is not 100% accurate
حليمة بولند: البنات كلهم يقلدوني حتى اللي ما يحبوني
الثلاثاء
2006/10/3
المصدر : الانباء
مفرح الشمري
هلت وأطلت الدلوعة حليمة بولند على ديوانية «الأنباء» فسجلت رقما قياسيا في نسبة الاتصالات وكلمات الحب والوفاء. أمطرها الجمهور بوابل من الألقاب فهي كنافة وبسبوسة رمضان، السنيورة، الدلوعة، حسناء الشاشة الخليجية، دانة المذيعات وقمر «روتانا».
وغمرت الديــوانية رائحــة الورود والباقــات المعــطرة والهدايا القيمة، بل وحرص عشرات المعجبين على المجيء لينالوا توقيع حلومة أو صورة تذكارية معها.
«يبيله» كلمة السر التي فتحت شاشة تلفزيون الكويت لتطل حليمة من جديد على جمهورها، فمن تلك الشاشة انطلقت في سماء النجومية، وأبدا لا تنسى السنيورة فضل الديرة عليها مهما حققت من نجاح وشهرة.
وبطبعها كانت صريحة وعفوية، ومتألقة في ثوبها الأصفر الرائع وروحها المرحة، وعبر ساعتين من الزمن أجابت عن كل سؤال بصدق وشفافية، ومدت جسورا للمحبة مع الجميع، وإلى التفاصيل:
ما أنسى فضـــل ديــرتــي علي وتلفزيــون الكويت سر شهرتـــي
كثر خير شركة «كوندور» اللي سوت «يبيله» بهالفترة البسيطة
برشلونية متعصبة وأموت على فن رونالدينيو ولعب بيكهام
شوق: حليمة حياتي شلونچ؟
هلا يا قلبي انت شخبارچ ومبارك عليچ الشهر.
الله يبارك فيچ يا حياتي.
شوق، شرايچ في برنامج يبيله»؟
حلو بس ما اشوفه وايد.
ليش؟
مدرسة عندي خاصة وانا في الثانوية العامة.
الله يوفقچ حبيبتي بس ترى البرنامج ينعاد على «روتانا خليجية» كل يوم العصر.
حليمة شنو المادة اللي كنت تحبينها في الثانوية؟
الانجليزي وكنت في المقررات متخصصة فيه.
مجنونة حليمة: واااو حليمة شخبارچ؟
هلا يا مجنونة (تضحك).
تصدقين واايد أحبچ واموت فيچ؟
وانا بعد، انت تطرشين مسچات لقناة «روتانا خليجية»؟
مرات وكل مسچاتي غزل فيچ يا روحي ووايد مغرمة بروحچ الحلوة.
تسلمين يا الغالية وان شاء الله أكون عند حسن ظنچ دايما.
ابتسام: متصلة علشان اسمع صوتچ؟
تسلمين يا ابتسام.
والله مو مصدقة اكلمچ؟
لا صدقي أنا حليمة بولند مقدمة برنامج «يبيله» (تضحك).
ولهانة فاطمة: حياتي شخبارچ ولهانة عليچ وايد؟
وأنا بعد يا فطوم شخبار الدراسة؟
الحمد لله انت شخبارچ برنامجچ وااايد حلو؟
عيونچ الحلوة وان شاء الله تشاركين معانا.
أمنيتي بس الكمبيوتر للحين ما اختارني.
عندنا حلقات واايد وان شاء الله راح يختارچ بالأيام الياية.
منو اللي يسويلچ شعرچ ومكياجچ؟
صالون شيراتون «مس فرساي» أسوي فيه شعري ومكياجي ومرتاحة وايد بالشغل معاهم.
وفاء: كيف تشوفين المذيعات الكويتيات؟
زميلات عزيزات على قلبي وأكن لهن كل احترام وتقدير واتمنى لهن التوفيق وتحقيق طموحهن الإعلامي.
انت مو بشر؟
ليش!
أنت ملاك في هيئة بشر؟
الله يخليچ يا وفاء وهذا من ذوقچ يا عمري.
بصراحة أشوف «يبيله» علشانچ يا حياتي.
تسلمين وان شاء الله تفوزين معانا بالبرنامج اللي فيه جوائز واايد قيمة.
رشا: شنو يمثلچ الإعلامي محمد الويس؟
أستاذي الكبير واستفدت من تجربتي معاه كثيرا والحين سعيدة اني معاه في «يبيله» والله يعطيه الصحة والعافية وما يحرمنا منه ومن تعليقاته الجميلة.
يتبع...
اقرأ أيضاً