Note: English translation is not 100% accurate
محمد الويس: ما أتصنع چدام الكاميرا وما أحب اللف والدوران
الخميس
2006/10/5
المصدر : الانباء
ليش ما سويتها في الديرة؟
والله تقدمت بطلب وعطوني الموافقة بس للحين ما نفذتها واللي ما فيه خير لديرته ما فيه خير لحد.
أشرف: عندك شعبية كبيرة عند الأطفال ليش ما سويت لهم برنامج؟
والله هالفكرة عرضوها علي في الإمارات اني اقدم برنامج للأطفال يتحدث عن التراث بس للحين ما قررت أسويه.
بوماجد: انت صاير مثل «بيض الصعو» ما تطلع الا بشهر رمضان؟
احب اني اكون قريب من الناس والمشاهدين في هذا الشهر الكريم وبعدين علشان تشتاقوا لي اكثر.
برنامج «يبيله» طرشتله شكثر مسچات بس للحين ما دقوا علي؟
انشاء الله بيدقون عليك لأن الكمبيوتر اهو اللي يختار الارقام بشكل عشوائي.
بدرية: انت من المذيعين المحترمين على الشاشة؟
تسلمين يا أختي.
نحس وانت تقدم اي برنامج انك واحد من عندنا يعني ما تتفلسف وايد؟
من طبعي اجتماعي وأحب الناس وأحب ألاغيهم وايد واقدم اي برنامج علشان اقرب المسافات واكسر الحواجز مع المشاهدين. شلون علاقتك مع حليمة؟
علاقة أبوية وحليمة من المذيعات اللي أثبتت نفسها.
هيثم: شلون بدايتك مع المونولوج؟
والله هالشغلة بدت معاي من يوم ما كنت طالب في مدرسة السالمية وتحديداً ليما غنيت «يا شباب الفدا» وبعدها غنيت أغاني وطنية أعطاني اياها الاخ عبدالجبار مزعل وطلب الشيخ عبدالله الجابر ـ طيب الله ثراه ـ بضرورة تسجيل هالأغاني في الإذاعة اللي اعتمدتني كمطرب.
آخر منولوج قدمته شنو كان؟
كان بعنوان «شاب راسي» عن غلاء المهور اللي نعاني منه وايد الحين ولله الحمد المنولوج لايزال الناس يذكرونه والتلفزيون كذا مرة يعرضه وكان من ألحان عبدالرحمن البعيجان.
فادي: طيب شنو سالفة «الويس»؟
سالفة «الويس» بدت معاي وانا في المرحلة المتوسطة ليما انتقلت الى مدرسة السالمية وكنت يومها العب في مركز حارس مرمى وسألوا عني وايد بس ما عرفوا اسمي وليما وصلوا لمدرسة السالمية المتوسطة كانت هناك لوحة كبيرة لعدد من العلماء والمكتشفين في العالم ولأنهم يعرفون شكلي بس وما يعرفون صفي شافوا صورة العالم الفرنسي لويس باستور لقوها تشبهني وايد فأطلق علي مدرس مصري هذا اللقب ومشى معاي ولو الأمر بيدي چان اكتبه في بطاقتي المدنية بس يكفي الناس حابة هالاسم وعالق معاهم.
يتبع...
اقرأ أيضاً