Note: English translation is not 100% accurate
محمد الويس: ما أتصنع چدام الكاميرا وما أحب اللف والدوران
الخميس
2006/10/5
المصدر : الانباء
دلال: منو يعجبـك من المذيعــين؟
والله كلهم فيهم الخير والبـركة طيب ممكن أقولك أسماء وتقول شرايك فيهم؟
تفضلي.
بركات الوقيان؟
مذيع جيد وأتمنى له التوفيق في «روتانا خليجية»
بسام العثمان؟
جيد والتلفزيون بحاجة له الآن
غادة رزوقي؟
تذكرني بالمذيعة القديرة أمينة الشراح بكل الصفات مها:
وين ساكن؟
في مشرف.
شنو سر رشاقتك على الشاشة؟
والله هذا بفضل رب العالمين وبعدين انا بحافظ على نفسي وايد واحب العب رياضة دايماً وخاصة المشي.
منير وعبير: نحس ليما نشوفك بالتلفزيون بريحة اهل الكـويت قبل؟
تسلمون والله وهذا طبعي من زمان واللي تربيت عليه وما احب اتصنع چدام الكاميرا لأني مو منافق، انا انسان واضح وصريح وما احب اللف والدوران.
شنو نقطة ضعفك؟
بســرعة أزعل وبســرعة أرضــى وما أحب أشيل بقلبي.
حلا وغلا: ممكن بطاقتك الشخصية؟
ـ حمود محمد الظفيري
ـ اسم الشهرة: محمد الويس
ـ مواليد: 1950
ـ الأبناء: عبدالله وعــبدالعزيز وحنان وجنان
ـ الهواية: الســـفر والقـراءة تايلند أم الدنيا رداً على سؤال للقارئ أبوأحمد عن سبب زياراته المتكررة لتايلند.
قال الإعلامي محمد الويس: الناس عندهم مصر أم الدنيا، بس أنا عندي تايلند أم الدنيا بجزرها الجميلة وطبيعتها الساحرة، الأمر اللي خلاني اشتري فيها بيتين دون تفكير، بالإضافة الى ان شعبها وايد ودود ومحترم ومنظم في تسيير اموره المعيشية، واتمنى ان النظام اللي عندهم ننعدي فيه علشان حياتنا تترتب شوي ونبتعد عن اللويه اللي عايشين فيها.
واستذكر الويس موقفا طريقا قائلا: كنت امشي في بانكوك والا واحد خليجي وقفني مع عياله وقال لي ان اهو وعياله معجبين فيني ولازم يصورون معاي ووافقت، بس المشكلة بعد ما وقفت مع اليهال للتصوير اتضح ان الكاميرا ما فيها فيلم وراح ابوهم اشترى فيلم وانا واقف مع الاطفال وبعد ساعتين تصورنا وراح، وكانت اصعب صورة تصورتها بحياتي.
أما أغرب مواقف الويس في تايلند فكان مع السمك وروى ما حدث قائلا:
التايلنديين متعودين ياكلون السمچ من غير ملح وانا عندهم ما آكل إلا السمچ، فرحت حق مجمع عندهم من طابقين شريت چيس ملح وطلبت من الطباخة انها تحطه على السمچ، ما حسيت والا التايلنديين فوق راسي مستغربين وچني مسوي شيء غلط بس بعدين افهموا اللي سويته وصاروا يسوون نفسي.
اقرأ أيضاً