بشار جاسم
خالد بوصخر فنان شارك في أكثر من عمل درامي خصوصا مع القديرتين حياة الفهد وسعاد عبدالله، كما انه حصل على جائزة أفضل ممثل واعد في احدى الصحف المحلية وطرحت له أغنية سينغل بعنوان«غشيم» وتحقق حلمه حين تم اختياره ودخل الى برنامج «ستار أكاديمي».
«الأنباء» التقت خالد الذي تحدث في العديد من الأمور بالأكاديمية وشعوره عندما تعرض للخطر أكثر من مرة كنومينيه وعلاقته بزملائه والعديد من الأمور التي كشف عنها بوصخر في التفاصيل الآتية:
خالد انت ممثل معروف ولك أدوار حلوة وماخذ مكان مهم من بين شباب جيلك شاللي خلاك تروح الأكاديمية؟
كل انسان يحب يطور من نفسه وأنا عندي هواية الفن واحب أصقلها في ستار أكاديمي لأن راح يختصر مشوار النجومية وراح انعرف في الوطن العربي كله.
بس اللي اعرفه ان «ستار أكاديمي» ما يقبلون مشترك مثل أو غنى من قبل ويكون مشهور؟
هذا السؤال يوجه للأكاديمية مو لي أنا اللي علي اني شاركت وانقبلت.
شنو استفدت من هذه التجربة؟
تجربة حلوة وتعلمت وايد أشياء والناس عرفتني على طبيعتي وفي ناس حبتني وفي ناس ما حبتني فهذا أمر طبيعي.
شاللي تضايقت منه بالأكاديمية؟
أولا الغربة والبعد عن أهلي خصوصا ان محكورين في مكان واحد ومن غير تليفون ولا تلفزيون.
وايد قلت انك تبي تنسحب وما انسحبت؟
لا أنا انسحبت.
لما طلع فواز الميل قلت انك تبي تنسحب؟
بالفعل كنت بنسحب ولما طلع الميل كنت بنسحب لكن فواز حلفني وقاللي اذا انسحبت راح اعزل منك وكمل مشوار.
ليش تبي تنسحب غير سالفة فواز؟
ضغوطات وايد منها انهم يعطوني أغاني أكبر من طبقة صوتي وفوق كل هذا يعطوني مقطع صغير ووايد أمور خلتني أفكر بالانسحاب.
تفاصيل الحوار في ملف ( pdf )