اذا تكلم لازم تسمعه، وليه تحچى كلامه كله ثقافة، يتغشمر ويضحك غصب يخليك ما تفارقك البسمة.
وليش انه مقتدر وبإعداده متزن مادري شلون قدر يخلي هوا المارينا عاصفة، بكلامه ما تقدر تصيده جو اشحلاته بعفويته، عمره مع المايك خمس شهور بس خبرته في اعلام الحچي دهور.
كل اللي نعرفه عنه انه امبلتع يحچي بطلاقة وبحرارة، اول ما تسمعه تحس انه يبي يغوص ويبحر في هالمهنة بس ليه دققت وتحريت عنه تشوف المسألة عنده مجرد هواية او بمعنى اصح فزعة لذاته وقدراته.
شنو اسمه؟ ما ندري منو اهو؟ ما ندري شلون صايرة حياته؟ هم ما ندري، كل اللي نعرفه عنه «صوته» نسمعه على هوا المارينا fm، ربعه في المارينا يسمونه «مايك إمبلتع» مع اني ما شوف فيه بلتعة كل اللي اكتشفته بصوته واداءه شي يبشر بخير، اهو اكثر من مذيع اهو اعلامي او شي كبير في يوم من الايام راح يصير.
وليش انه الصحافي فيه حب الفضول اتصلت بمدير عام المارينا الصديق طلال الياقوت وقلتله بومشاري منو هالريال؟ وبابتسامة رد وقال: والله يا سعود اهو «مايك امبلتع» وغير هالشي ما اقدر اقول.
وبهاللحظة انتهى الاتصال بيني وبين بومشاري، وبديت في جولة ابحث فيها عن ذات هذا المايك.
معقولة اهو خيال؟ معقولة صوته ما هو حقيقة؟ معقولة انه مجرد شي عابر ما له اسم ولا تاريخ ولا ثقافة؟
الاجابة بكـــل تأكيد لأ، اهو اكثر من هذا كله، وليـــش اني استـــمتع بالعمل الصحافي شغلت مصـــادري وقدرت خلال فترة قصيرة اني اكتشف ذات «هالمايك المبلتع».
ادري عزيزي القارئ تبي تعرف منو «هالمايك» اللي اتكلم عنه وليش انك تهمني بالدرجة الاولى راح اكشفلك رموز من شخصيته.
اهو كويتي ومثقف 100% من مواليد 1976 واستطاع في مرحلة الثانوية ان يقود مدرسته للمركز الاول في برنامج مع الطلبة لقدرته على المحاورة وبحر المعلومات اللي يبحر فيه منذ طفولته.
اول مؤلفاته هو كتاب تحت عنوان «البحرين الوجه الآخر»، كما ان اسمه مشتق من السيف العربي المصقول بالهند، متزوج ولديه ابنة اسماها على اسم والدته كما ان زوجته طبيبة اطفال، في الرياضة متعصب لنادي القادسية كما يعشق الابل.
كما عندي المزيد من المعلومات عن هذا الرجل والذي بكل شفافية وصدق اقول عنه انه مشروع اعلامي يجب استثمار طاقته اللامحدودة.
سعود الورع
الصفحات الفنية في ملف ( pdf )