بشار جاسم
تعودنا ان نشوف النجمة شيماء علي تقدم العديد من الادوار وما تعودنا انها تكون صاحبة صالون وتحط المكياج للزبائن، فهل هذا دور جديد لها بالمسلسل اللي بتصوره او صالونها، «الأنباء» دردشت معاها وسألتها:
شيماء يقولون انچ فتحتي صالون صج ولا اشاعة؟
لأ صج ومو اشاعة وبالفعل فتحت صالون بمنطقة المهبولة.
يعني تقلدين إلهام الفضالة ولا هواية؟
لا بالعكس ما اقلد احد وانا احب اللوك اليديد مكياج وشعر فقلت ليش ما افتح صالون خاص فيني دام انا حابة هالشي.
يعني راح تتخلين عن خبيرات التجميل اللي تتعاونين معاهم؟
لا ما راح اتخلى عنهم بس انا حاليا مكياجي وتسريحاتي راح تكون 80% في صالوني واذا طلبوني صديقاتي المقربين خبيرات التجميل اني احط مكياج عندهم او اسوي جلسة تصوير فما راح اتردد وعيوني لهم.
انت شايفة انه الصالون مربح؟
شوف اي مشروع تجاري جديد لازم ما تفكر بالربح لمدة سنة كاملة ولما تعدي هالسنة تعرف اللي لك واللي عليك وانا صج اني قطيت فلوس وايد علشان انتقي خبيرات مكياج وشعر وديكور وغيرها من الامور لكن ان شاء الله اعوضهم ولكل مجتهد نصيب.
صالونات بو كل عمل بدينار يأثرون عليچ؟
كل صالون له زباينه وكل زبون له صالون واغلب الصالونات بدأت صغيرة وصارت كبيرة اذا اشتغلوا صح.
منو من الفنانات اللي يترددون عليچ بالصالون؟
والله للحين ما في احد من الفنانات لأن توني فاتحته وأنا مو من طبعي اني ألح على احد أو أغصب على احد اني يكون بالصالون عندي لكن اي فنانة حابة انها تتعامل مع صالوني فأقول لها: «العين لچ أوسع من المكان».
تفاصيل الحوار في ملف ( pdf )