- عبدالعزيز النصار: عشت في أجواء فنية لأن خالي غافل فاضل وعمي هاني النصار
- عبدالعزيز الصالح: أهلي كانوا معارضين دخولي للمجال وبعد ما دشيت الورشة اقتنعوا بموهبتي
- يوسف الصالح: أعشق التمثيل من أيام الثانوية وأتمنى أن تكون عندنا قاعات بالمعهد
خالد السويدان
الجهود المبذولة من فرقة المسرح الشعبي لدعم الشباب المبدع تحققت اهدافها بعدما اشاد الجميع بالورشة الثانية التي انتهت قبل ايام على خشبة مسرح الدسمة من خلال مسرحية «فرسان الكلام» التي قام بإخراجها استاذ قسم التمثيل والاخراج في المعهد العالي للفنون المسرحية هاني النصار.
حاضر في الورشة عدد من الاساتذة حيث قام دخيل الدخيل بتدريب الطلاب على فن الالقاء اما التعبير الحركي فأشرف عليه الفنان سامي بلال، اما التذوق في فن الكتابة فكان مع الكاتب المسرحي فيصل العبيد، بينما تصدى لفن الارتجال هاني النصار.
هذه الخطوة الرائعة تحلت بها فرقة المسرح الشعبي وجمعت بها شبابا مبدعين لديهم مهارات في فن التمثيل أحبوا أن يصقلوها ليكونوا خير مثال للشباب المسرحي.
فاز في هذه الورشة كل من الممثل الشاب عبدالعزيز الصالح بجائزة الراحل عبدالله خريبط، أما الممثلان عبدالعزيز النصار ويوسف الصالح فكانت من نصيبهما جائزة الراحل عبدالعزيز المسعود.
«الأنباء» استضافت الشباب الفائزين.
«الأنباء»: ألف مبروك على هالجوائز يا شباب ومنها للأعلى إن شاء الله.
الله يبارك فيك ومشكورين على هالدعم والاستضافة.
يوسف: كلمنا عن دخولك للمجال الفني شلون كان؟
طبعا أنا أموت على شي اسمه تمثيل من أيام الثانوية وبعد تخرجي قررت الدخول الى المعهد العالي للفنون المسرحية والحمد لله خلصت سنة أولى من قسم التمثيل والإخراج وبعد رمضان راح أكون في سنة ثانية إن شاء الله.
عبدالعزيز النصار: كلمنا عن دخولك لهالمجال؟
طبعا شرف كبير ان المخرج هاني النصار يكون عمي والمخرج غافل فاضل يكون خالي يعني تقدر تقول عشت في أجواء فنية من الطرفين وأنا أحب هالمجال وعشقته وحاولت أني أنمي هالموهبة من خلال دخولي للمعهد العالي للفنون المسرحية قسم التمثيل والإخراج مع يوسف بنفس الدفعة واتمنى التوفيق للكل.
وعبدالعزيز الصالح: شلون كان دخولك؟
أنا طالب في كلية الدراسات التجارية ولكن اعتبر نفسي هاويا لهذا المجال ومن خلال تصريح للمخرج منصور المنصور في إحدى الجرائد عن اقامة ورشة لهواة التمثيل تقدمت بالتسجيل وشاركت معاهم مع إني كنت أتمنى أدش المعهد العالي لكن الأهل كانوا معارضين الفكرة لكن بعد الورشة اقتنعوا بموهبتي.
عبدالعزيز النصار: كلمنا عن فكرة المسرحية شلون صارت؟
القصيدة من تأليف هزاع الصلال فأخذنا اسم فرسان الكلام وخلينا الفكرة تعتمد على الارتجال وتكلمنا عن الاوضاع في الكويت وعن مجلس الامة.
يوسف: كونك طالباً في المعهد العالي للفنون المسرحية شنو المشاكل اللي تواجهكم وتتمنون انها تتطور؟
الحمد لله ما في أي مشاكل تواجهنا ولكن نتمنى أن تكون عندنا قاعات للتمثيل أرقى وأحسن من الموجودة ولكن لو نشوف الاعمال اللي قاعدة تدرسنا وايد اقوية ولهم وزنهم في الساحة الفنية مثل الاستاذ دخيل الدخيل وعبدالله العابر وهاني النصار وشايع الشايع واحلام حسن وخالد امين ويحيى عبدالتواب وغيرهم الكثير، الكل مبدع في مادته ومجاله.
وشلون كان التعامل مع المسرح الشعبي؟
للأمانة هذا المسرح شعرنا بأنه بيتنا وكنا نقضي فيه معظم وقتنا واحنا دخلنا لهذه الورشة لكي انمي موهبتنا ونشغل نفسنا في فترة الصيف وفوجئنا بالتواضع من كبار الفنانين مثل الفنان جاسم النبهان وجهود العم بوعبداللطيف والزميل والأخ جاسم خريبط اللي للأمانة ما نقدر ننسى وقفتهم معانا من أول يوم دخلنا فيه الى يوم العرض.
عبدالعزيز الصالح: شكثر كانت فترة التدريب بالورشة حتى عرضتم المسرحية؟
كانت تقريبا شهر وبشكل يومي والأوقات مع الايام الاخيرة قامت تمتد وكنا نسهر عشان بس نخلي المشهد يكون كامل.
شنو المادة اللي حبتوها اكثر شي؟
يوسف: أنا حبيت مادة «الارتجال» لأنها عطتني دافع كبير بالإضافة الى كل المواد طبعا.
عبدالعزيز النصار: اكيد الارتجال لأنه تفتح الصدر وتنمي موهبتك اكثر وتخليك تعرف شنو تبي تقول وشلون تفكر التفكير السليم وتستخدم الكلام بالوقت المناسب.
عبدالعزيز الصالح: انا حبيت الإلقاء والارتجال وحسيت كل واحد فيهم يكمل الثاني وكوني انا طالب في الورشة فقط مو بالمعهد استمتعت في كل شي أخذته واستفدت من الكل.
كنتو راضين على العمل اللي قدم على خشبة مسرح الدسمة؟
الحمد لله كلنا كنا راضين ولكن طبعا الكل يتمنى انه يقدم عمل احسن ولكن احنا معانا ناس عمرها ما وقفت على خشبة المسرح وهذا بحد ذاته انجاز وهذا الانجاز كله يصب لصالح الورشة.
حابين بالفترة المقبلة تكونون اعضاء في المسرح الشعبي؟
اكيد طبعا كافي انه هالمسرح طلع عمالقة الفن في الكويت والخليج وشرف كبير لنا ان نكون اعضاء في هالمسرح والفنان القدير جاسم النبهان ما قصر رحب فينا وما قصر للأمانة وعساه عالقوة مع بوعبداللطيف.
كلمة أخيرة لـ «الأنباء»؟
مشكورين على الدعم المتواصل من بداية دخولنا للورشة لهاليوم وحتى حصولنا على جوائز التقدير واشكر ادارة مسرح الشعبي جميعها واشكر جاسم خريبط على جهوده معانا وان شاء الله نشوف مهرجانات كثيرة في الكويت ونشارك فيها والخطوة المقبلة لنا سنشارك في مهرجان الشباب واتمنى من الله يوفقنا كلنا ونشكر لمساعد المخرج صادق بهبهاني اللي ساعدنا وايد وكل الشباب اللي كانوا معانا.
ورشة مسرح «الشعبي» الثانية
الممثلون
يوسف الصالح
عبدالعزيز النصار
عبدالعزيز الصالح
محمد فايق
موسى كاظم
احمد الهاجري
بدر المنصور
عبدالله النصار
اسماعيل عجيل
نوار النوار
محمد التمتامي
المحاضرون
هاني النصار ـ إشراف الارتجال
دخيل الدخيل ـ اشراف الالقاء
سامي بلال ـ اشراف التعبير الحركي
فيصل العبيد ـ اشراف تذوق فن الكتابة
منصور المنصور ـ اشراف عام للورشة
جاسم خريبط ـ اداري ومصمم الديكور
عبدالله الشطي ـ اداري