خالد حسين
استطاعت محطتا مارينا ومكس fm الدخول الى السباق الرمضاني ببرامج متميزة جذبت المستمعين خصوصا برامج المسابقات هذا ما قاله المذيع علي نجم الذي اكد انه لولا دعم المارينا ما كان وصل لربع النجاح الحالي لاستحواذ المحطة على اكبر نسبة استماع في الكويت.
«الأنباء» التقت نجم لتعرف منه تفاصيل البرنامج وكيف توصلوا لفكرته وخططه بعد شهر رمضان المبارك والعديد من الامور التي جاءت في هذه الدردشة:
شلونك مع رمضان؟
والله انا وايد مستانس وصار عندي وقت ارتاح فيه خصوصا بعد برنامج مدته ثلاث ساعات على مارينا fm «ريفرش» والحين صار الضغط على برنامج المسابقات اللي قاعد اقدمه خصوصا في منافسة شريفة مع البرامج الثانية اللي تحمل اسم مارينا او مكس fm سواء كان اسامة فودة او محمد دغيشم، واللي امحلي رمضاني بيمضي مع اهلي بالفطور وعقب الفطور يمضي مع ابوچندل والحجية وحمود عادل.
كيف جاءتكم فكرة البرنامج؟
البرنامج فكرته مشتركة بين ابوچندل والحجية وحمود عادل وانا كنت معاهم ضيف خفيف احاول ان اتابعهم ووايد سعدت لما قالولي نبي نقدم البرنامج كلنا خصوصا ان الفكرة ان انا اعكس جيل الشباب اللي قالوا احنا الحين وين تطورنا وشوي شوي بدو يتناسون الكلمات والامثال القديمة.
كلمنا عن صدى البرنامج؟
والله لغاية الآن الحمد لله الجمهور وايد مستانس لكن ما نبيهم يقولون حظ المبتدئين ان بداية البرنامج اخذ صدى كبير وبنص البرنامج يبدي يخف لكن اتمنى طول رمضان نحافظ على هذي الجماهيرية الحلوة وعلى هذا النجاح وللعلم لولا مارينا fm ولولا كونها الاذاعة الاولى بالكويت ما كان قدرنا نوصل ربع هذا النجاح.
راضي بما حققته من نجاح؟
عمري ما رضيت على نفسي ودايما احاول كثر ما اقدر اول ما افتح الميكرفون اني اقدم اداء يكون ما قدمته ودائما اقول حق نفسي هذه الحلقة الاخيرة اللي اقدمها في مجال الاذاعة اخرج كل ما عندك علشان الناس يستمتعون ويكونون حابينك.