خالد حسين
الكاتب الشاب عبدالعزيز الحشاش لديه عملان هذا العام في رمضان احدهما اذاعي وهو: راعي الديوانية للعملاق عبدالحسين عبدالرضا والقديرة سعاد عبدالله، والثاني تلفزيوني وهو «رسائل من صدف» على شاشة قناة الراي.
«الأنباء» دردشت مع الحشاش لتعرف منه جديده بعد رمضان وكيف هي اصداء اعماله، فإلى التفاصيل:
حدثنا عن «راعي الديوانية» و«رسائل من صدف».
«راعي الديوانية» عمل اذاعي بطولة العملاق عبدالحسين عبدالرضا والقديرة سعاد عبدالله وهو عمل كوميدي عن رجل يفتح ديوانية في بيته وما يرتبط بها وبروادها من مشكلات وتداخلات في حياته العائلية وهم «رسائل من صدف» عمل تلفزيوني على شاشة «الراي» وهو بطولة نخبة من ألمع النجوم.
في اعمالك هل ترى ان المخرج يخدم قصتك ويوصل اللي تبيه؟
ما في كاتب تلفزيوني في الدنيا كلها تسأله ان النص اللي كتبته تنفذ 100% نفس اللي يقولك مستحيل والواحد ما يقدر يقيم الحين يقيم تالي.
شلون جمعت بين العمل الدرامي والعمل الاذاعي؟
والله هذا كان نتيجة عمل سنة كاملة، وأنا أكتب العملين كان في نوع من التأني علشان يطلعون بصورة حلوة، والحمد لله استعدادي كان حلو والدليل مسلسل «رسائل من صدف» مثل ما شافو الناس في وايد مراحل، فكان في تحضير وبحث على الفترات الزمنية التي يتناولها العمل.
عندك اعمال بعد رمضان؟
في اعمال لكن سأعلن عنها في وقتها.
شنو اكثر عمل قاعد أتابعه في رمضان؟
شدني «أم البنات» للزميلة هبة فأنا من عشاق اعمالها، وباچي الأعمال اشوفهم وكلهم فيهم الخير والبركة.
اشلون اتشوف اصداء اعمالك؟
امور التلفزيون تاخذ وقت اكثر من الاذاعة لأن الاذاعة شوي جمهورها اقل واغلبهم من كبار السن، اما التلفزيون للحين صدى اعمالي فيه حلو وطيب مع ظروفه الصعبة اللي مر فيها العمل، وكذلك وقت العرض شوي صعب حق الناس وحتى في وقت الاعادة، لكن رغم هذا ردود الفعل وايد طيبة وراضي عنها.
اللي انت تبيه في العمل وصل؟
لحد الآن الشعور الاول والاحداث في العمل بدأت تاخذ صدى والنتيجة في آخر الشهر الكريم.