خالد حسين
المذيع محمد الدغيشم تألق خلال شهر رمضان المبارك في تقديم برنامجه الاذاعي «افكت» عبر اثير محطة مارينا fm.
الدغيشم بخفة دمه المعهودة استطاع جذب المستمعين اليه، مؤكدا انه يحب دائما ان يكون قريبا من الناس ويسعد اذا تداولوا «لزماته» المختلفة.
«الأنباء» دردشت مع الدغيشم لتعرف منه خططه المقبلة وسبب رفضه التمثيل مع الفنانة القديرة حياة الفهد والعديد من الامور الشائقة التي جاءت في السطور التالية:
شلونك مع رمضان؟
الحمد لله تمام ورمضان هالسنة «افيكت».
شنو سر تميزك في التقديم؟
الموضوع هو اني عارف شنو يبي المستمع، وكل ما تعيش دور المستمع تعرف شنو تقدم له وأنا وايد احس اني قريب من الناس الخلاصة هو اجتهاد وتركيز واعداد و«ستاف» قوي تشتغل معاه ومكان قوى وللعلم مارينا نجحت لأنها كلها كويتيين وطلعنا واحنا نخاطب الناس في الكويت سواء كانوا كويتيين أو غير كويتيين.
ليش دايما تغيير لزمتك؟
لازم انا من بلشت اذاعة واطلع لزمات فكانوا يقولون شنو هالمذيع اللي يطلع لزمة وين قاعدين هو مو ممثل، أما الحين فتحت باب لمليون مذيع لازم يكون لهم لزمة وعلى سبيل المثال لزمة «المرش» سنة كاملة ونجحت بين الناس.
راح يستمر برنامجك بعد رمضان؟
هذي للحين ما يندري.
ما تفكر في تقديم عمل غنائي للاطفال بعد غنية «يختي على أمة»؟
الاغنية السابقة لها ظروفها وحبوها الناس لحد الآن يسمعوها وأنا سجلت اغنية ثانية للطفل بس وقفتها.
ليش؟
حاس مو وقتها، وللعلم انا اول مذيع غنى اغنية للاطفال وشوفت الآن ان كل المذيعين يبون يغنون فحسيت ما بي انحسب جذيه فأنا لما أسويها للطفل يكون بهدف معين ما بي اسويها علشان يقولون يبي يسترزق من وراها.
عرض عليك التمثيل في هذا العام؟
وايد اولهم مع الفنانة القديرة حياة الفهد، اهم وايد شايفيني انني ممثل وانا مو شايف اني ممثل واقول يمكن اكون محبوب من ورا المايك وبالكاميرا غير.
سمعنا انك زعلان من داود لأنه قلدك؟
لا هذي اشاعة وتجمعني مع داود علاقة عائلية ووايد مع ابوي وغير جذيه داود ما يقلد الا النجوم او الناجحين ولمن يقلدني معناتها واحدة من اثنتين يا انا نجم أو ناجح وثنتيهم احلى من بعض، ومستحيل اني ازعل منه واللي ما يعرفه الناس ان داود استأذن مني وكان معاي ساعة كاملة في احدى الحلقات وشاف حركاتي وقلدها.