سعود الورع
الفــــنانات هالايام موضتهم بعمليات التجــــميل اللي يسوونها، وحدة تحف خشمها، والثــــانية تتفــــخ شفايفها، والثالثة تقض خدها (يعني غمازات)، والشباب من فنانينا قامت الغيرة تلعب فيهم لعب، واحد يقص حواجبه من النص، والثاني يشرم براطمه شرم، والثالث يعفس شعره يعني ذرب (سبايكي)، هذا على مستوى الشكل اما المضمون، في منهم زين والبعض منهم في الفن ما هو شين، من چذيه في يوم من ايام العمل في قسم فنون «الأنباء» قعدت اعد چم وحدة وواحد من فنانينا حورف بشكله وهندس بنفسه؟ وبإجراء عد بسيط طلعوا المتغيرين في الشكل كثر، وقعدت اطالع حولي وادقق على شكل قسم فنون اللي مهمته كتابة ونشر صور فنانينا، واكتشفت ان اقل شيء ينقال على الشكل «چبح قسم ما حلاه ربي» مكاتب حديد چنه قسم مقاولات، وكراسي «يلد» اسود چنه قاعدين بغرفة موجهين رياضيات بوزارة التربية اما التلفزيون چنه راس بعير مثل الكاميرا بساحة الارادة وارضية القسم فحدث ولا حرج چنها ارضية مكتب الكهربچي اللي ورا بــــيتنا، يعني كلش مو لايق يكون المضــــمون اقل من الشكل من چذيه قررت اســــوي نفضة للقسم اللي غـــارق بالجكر وتـــــوجهت على طول حـــق مدير التحرير الاخ مــحمد الحســيني والــلي وافق بشرط موافقة رئيس التحرير وبعد طرح الفكرة على طول وافق الاستاذ يوسف خالد المرزوق، وقال: «الأنباء» بيتكم وسوو التغييرات اللي تبونها.
بعد الموافقة قعدت مع الزميل بشار جاسم علشان نبلش بالعملية الجراحية التجميلية للقسم الجيكر، وفاجأني بشار بسؤال «تبي الديكور مودرن ولا كلاسيك؟» وبيني وبينكم سويت روحي فاهم بالديكور وقلتله: ابيه مودرن، وبالفعل رحنا لمعارض الاثاث والديكور وكل ما انقي شيء يرد علي بشار مستغرب ويقول «يا بوناصر اللي قاعد تختاره كلاسيك ماله شغل بالمودرن» وبابتسامة خجل وتلقائية رديت عليه وقلت: يا بشار انا من اهل اول ما اعرف بموضة هالايام كل اللي اعرفه ابي «ميز» ذرب اكتب عليه ومكان شرح نقعد فيه، وبدون تفكير قال خبير التجميل بشار «عيل اشرايك ندمج ما بين الكلاسيك والمودرن» وبتلقائية قلت له: شورتك وهداية الله، وبالفعل قمت انا وبشار نسوي عملية التجميل والـــلي خذت منه 10 ايام اما التكاليف فكانت ممتازة لان الذوق قيمة ما هو جيمة والعملية تمت بأعلى كفاءة اقتصادية واحسن ادارة مالية ومن دون تبذير او هدر، وماراح نقول الرقم خوفا من الحسد ولان وايد ناس يمكن مايصدقون!
على فكرة ترى سقف القسم صممت انه يكون من صور فنانينا من چذيه استغرب بشار وقال «شلون الصور بالسقف، العادة الصورة بالطوفة» رديت عليه وقـلت: ياعزيزي انا أؤمن بالرمزية في كل عمل اقوم فيه ودايما احنا نقول عن فنانينا نجوم من چذيه النجم نشوفه بالسما عالي ولا يمكن ان نشوفه بالطوفة بمكان واطي، والحين خلصت قصة العملية وأخليكم مع الصور واي تعليق عندكم طرشوه على الايميل التالي:
[email protected]