على هاللون لو كل البشر ما هم على هاللون
على هالحال خلوني ورا شمس العصر نزال
ابقعد واعتزل كلي معاي.. بصدري المشجون
سوالف واترك القمرة تباريني وهي تختال
ابحرث بالعصا جمر القصيد الساكن المدفون
اذا كانه على خبري تغطى في رماد الحال
انا اشهد ضاقت الدنيا وانا داري وهم يدرون
اذا طاح الجمل راحت سكاكين الغدر تغتال
تحط من القهر جمرة وترسم بالمتون طعون
وسالت دمعة كانت على شط النظر شلال
من اسباب الألم راحت ليالي والسعد مرهون
دخيلك والقهر سوقه جمعني بايع ومكتال
اشوق الحر في شبك الليالي والعمر مسجون
رهين البرقع التافه سجين الحل والترحال
ثقيل ولا قدر يكفخ كسير منهزم مطمون
عليل بصدره العبرة يجر من العنى موال
قريب يسامر جروح الشقا في قلبه المغبون
غريب بعالم التفكير واذا يرسم عليه آمال
يعرف ان صيدته صارت على مد العيون ودون
وقوانيص الحسد حالت وتلعب لعبة المحتال
يكم وده يبي يطلع نوا لكن تخيب ظنون
يكم فزه باثر فزه لطمها الحظ يومه مال
حزين الحر في جوه شذا عطر المسا مخزون
يفوح وشمة انفاس الخواطر تنكسر باذلال
حزين الحر واحلامه على جال البحر والجون
على روس النوايف يوم كانت رحلة الاجيال
حزين بطبعه العاقل يعرف ان الزمن مجنون
خذا مجنون يوم ان الزمن ماصاحب العقال
عجيبة قصتك يا حر وهي تكشف عن المكنون
يسولف صمتها حلم تبخر من سراب البال
انا هاللون يكتبني ويبقى السر والمضمون
مع هاك الظلام اللي ورا شمس العصر نزال
محمد الخطيمي الخالدي