-
مشاري البلام: أزور سوق المباركية قبل الفطور وعيالي لهم حق عليّ
يوميات فنان زاوية جديدة نكشف من خلالها عن يوميات كل فنان في شهر رمضان من حيث طقوسه في هذا الشهر الفضيل.
«الأنباء» التقت النجم مشاري البلام الذي حدثنا عن يومياته وطقوسه في شهر رمضان وإليكم تفاصيل اليوميات مع مشاري:
مشاري.. شلون تقضي يومك في شهر رمضان؟
وايد أشياء وبصراحة يومي يكون مزحوم.
مع منو؟ الأهل ولا الشغل؟
والله شوف أهلي لهم حق عليّ يعني قبل الفطور أروح سوق المباركية اشتري حلو وبعض الشغلات لأني متعود اني اتفطر في بيت أبوي.
وبعد الفطور؟
بعد الفطور أودي عيالي للأماكن الترفيهية والألعاب خصوصا أول أيام رمضان.
شمعنـــا أول أيــــام رمضان؟
لأن من نص شهر رمضان راح انشغل في الغبقات الفنية، بالإضافة الى انشغالي ببروڤات المسرح اللي تبدأ من بعد الفطور لغاية الفجر بشكل يومي.
يعنـــي مـــا تتابع المسلسلات؟
قليلا جدا، وأشوفها وأتابعها بعد رمضان لأن ما عندي وقت، لكن اسمع من خلال الأهل عن العمل الناجح والضارب.
يعني مالك طقوس معينة برمضان مثل هواية المشي ولعب الكرة؟
صدقني ما عندي وقت، يا دوب قبل الفطور اشتري بعض الشغلات وانا عموما مو مع الرياضة وساعات أروح النادي الصحي اذا كان عندي وقت للمحافظة على وزني ومثل ما تدري رمضان كله أكل.
شنو الشي اللي فقدته في يومياتك في رمضان؟
الراحة وفيلكا خصوصا لما كنا نتمشى على البحر ونتجمع لكن الظروف تغيرت وايد والدنيا تلاهي.
صچ انكم تصورون المسلسلات في رمضان؟
إي يحصل وايد معانا خصوصا ان المخرج ما يلحق يخلص من التصوير فتلاقينا نصور برمضان ومرة اذكر لما كنا نصور دارت الأيام دخلنا على أواخر شهر رمضان واحنا للحين نصور العمــــل حتى نخلص.
وشنو شعورك وانت تصور وانت صايم؟
تصدق، والله شعور وايد حلو، خاصة انه الجميع اللي حواليك يساعدونك على تصوير العمل، ورغم التعب بهالشي الا وانه ولله الحمد هالتعب يزول ليما نشوف ردة فعل الناس على الاعمال اللي نصورها، خصوصا ان شهر رمضان من الاشهر اللي يصير فيها تنافس كبير بين المحطات الفضائية، وهالشي المستفيد منه المشاهد اللي يختار الافضل ويتابعه من اعمال مع ان الكثير من المشاهدين يتضايقون من كثرة الاعمال بس الزين يفرض نفسه.
بس هالاعمال حققت نجومية للكثير من الفنانين.
اكيد، وانا واحد منهم، واعتبر شهر رمضان فال خير علي لأن شهرتي انطلقت فيه ولذلك احرص كل الحرص على ان تكون اعمالي في شهر رمضان مميزة حتى ترسخ في عقول المشاهدين اللي يطالبوني دايما بتقديم الافضل لهم.
كلمة أخيرة؟
مبارك عليــكم الشهر وعلـــى الأمة الإسلامية وأتم`نى أعمـــالي تعجبكم.
-
إلهام الفضالة :أحب آكل التشريبة على الفطور وبس لقيماتي الكل يحبها لأني أنا اللي أسويها
سفرة فنان زاوية نقدم من خلالها أكلة الفنان المفضلة على الفطور في شهر رمضان والطبخة التي يحب ان يطبخها، بالإضافة الى طبق الحلو الذي يفضله عن غيره، وايضا مع الأشخاص الذين يتواجدون معه على السفرة نفسها في هذا الشهر الفضيل وأيضا الأكلة المعينة في موعد السحور.. واليوم دردشنا مع النجمة إلهام الفضالة وإليكم التفاصيل:
شنو سفرة إلهام في رمضان؟
شوف التشريبة شي ضروري جدا جدا جدا في سفرة رمضان وبدونها ما تنفتح شهيتي.
يعني تتفننين لما تسوينها؟
لا، لا، أنا ما اسويها بصراحة لأني ما اتفطر في بيتي.
ها.. في مطعم؟
لا، أنا المطعم أروح له مرة في الشهر مع زوجي لكني اتفطر يوميا في بيت أهل زوجي وحماتي الغالية اهي اللي تسويها وتدري اني أعشق شي اسمه تشريبة.
يعني انت ما تطبخين؟
ساعات أسوي فوتوشيني أو صينية دجاج في الفرن لكني آكل التشريبة وبس.
ليش؟
أولا: أحبها، وثانيا: ما احب اكثر بالأكل تدري لأن في شهر رمضان كله زيارات، بالإضافة الى اننا ساعات نصور باقي حلقات المسلسل وبروڤات المسرح فما اكثّر بالأكل.
والحلو..؟
إي انا أسوي لقيمات وشاطرة فيها وايد وحتى أهل زوجي يحبون ياكلونها من ايدي وساعات أودي معاي التصوير أو المسرح لقيمات لأن لقيماتي الكل يقول انها حلوة.
والرجيم..؟
صدقني ما آكل وايد لكني بسرعة أمتن خصوصا في شهر رمضان ما آكل وايد بس الخفايف تمتن بين فترة وفترة.
يعني برمضان سفرتچ معروفة؟
معروفة ومن غير التشريبة ما آكل ولا شي وحتى السحور هم آكل التشريبة مع بعض المعجنات والشوربة لكن الحلو بس بعد الفطور وما أكثّر منه.
يعني نقدر نقول ان «التشريبة» غرامچ الأول والأخير في رمضان؟
ايه التشريبة غرامي ومن غيرها ما أحس بطعم رمضان لأنها خفيفة على معدتي وانا ما احب اثقل معدتي بالأكل الثقيل.
شكلچ اذا ماكو تشريبة على الفطور أو السحور تنامين خفيفة؟
لا مو جذي لازم أحط شي بمعدتي علشان يساعدني على إكمال صومي وهالشي طبيا مطلوب وانا الحمدلله محافظة على وزني وايد لأني ما احب اني اكون متينة لانه عندي بروڤات مسلسلات تبي مني اتحرك دايما بسهولة وهالشي ما يتحقق إلا وانا خفيفة مو متينة.
تعزمين أحد على سفرة فطورچ؟
أكيد وأولهم أهل زوجي الله لا يحرمني منهم فمثل ما هم قايمين فيني انا لازم أقوم فيهم خاصة ان شهر رمضان شهر رحمة وصلة رحم وانا حريصة على التواصل معاهم دايما.