يوميات فنان صائم
شعلة: أتفاءل بأيام شهر رمضان المبارك
لكل إنسان طقوسه في شهر رمضان الكريم وبهذه المناسبة حاورت «الأنباء» المعدة المتألقة شعلة القرشي وسألتها عن يومياتها في هذا الشهر حيث تحرص على ختم القرآن في هذا الشهر وارتباطها الكبير بأصدقائها وعشقها لعملها.. واليكم التفاصيل:
قوة شعلة.
هلا والله.
مبارك عليچ الشهر.
علينا وعليك.
اشلون رمضان معاچ؟
الحمدلله تمام.
متى وقت قعدتچ في رمضان؟
الصبح الساعة 9 لأنه عندي دوام.
شنو شعورچ وانت قاعدة الصبح؟
حقولك خلها على الله، الواحد يكون سهران بالأساس مع الأهل أو يطالع چم مسلسل ويتسحر ويصلي فينام متأخر فلمن تقعد الصبح ودك ما تقوم واتكمل النومة.
هل اتأيدين الواحد ياخذ إجازة في رمضان؟
لا لأن هذا الشهر يعادل السنة كلها بالشغل، والشغل استمتاع ويعطيك شعور ثاني مع اتصالات المستمعين.
شنو الشي اللي اتحبين اتسوينه أول ما تقعدين من النوم؟
أحب أطالع ويهي بالمنظرة واتأمل فيه وأنا وايد أتفاءل ابويهي.
ما هي طقوسچ في رمضان؟
لازم أختم القرآن وأكون وايد اقريبة مع أهلي وأدق على رفيجاتي وأكلم أهل رفيجاتي وأباركلهم على الشهر وأدق على الناس اللي ما كلمتهم من فترة واباركلهم على الشهر.
وين اكثر ازياراتچ في رمضان؟
عند رفيجاتي أنا وايد اكون في بيت رفيجاتي.
اشلون الرياضة معاچ؟
أسبوع ألعب رياضة والباجي طناشي وانا ما أحب الروتين فلما اتعود على شي بسرعة أمل منه فما أقدر أكمل.
يعني هبة؟
يعني اروح أسبوع واقطع اسبوعين وأرد مرة ثانية ألعب رياضة في البيت سويدي ويوغا أشوي ألعب واقطع.
يعني تكرهين الروتين؟
إي وبعد انا وايد مشغولة ودايما ابدي شغلي على نفسي وأنا معروفة بالدوام اني ابدي شغلي على البيت وطلعاتي، دايما دوامي عندي رقم واحد.
الرچيم اشلونه معاچ في رمضان؟
لا أنا أموت على الأكل وأموت على الأكل الدسم، فيني شيء غريب لمن اتفطر أول شيء أكله اهو الحلو مثل الكنافة لازم أكل حلو أول شيء وبعدها الوجبة الرئيسية.
شنو اتحبين تاكلين؟
السفرة إذا ما كان عليها كبة وسمبوسة وسلطة ولبن ما آكل وبعدها أطقطق عيش وغيره عشان ما أزعل أمي.
اتسوقين في رمضان؟
ما يمديني، عندي دوام الصبح وبعدها دوامي في المارينا وينتهي الساعة 10 وبعدها ما يمديني بس بالويك إند إذا ما عندي شي الصبح ازرق واروح السوق، اما الأيام الثانية فمستحيل.
والغبقات؟
انا مو وايد أروح الغبقات إلا اذا كانت رسمية والدوام كلهم رايحين واشوف ناس ما اعرفهم، اما اذا كل يوم اشوفهم ما اروحلهم الغبقات.
هل انت من النوع اللي يدز مسچات ولا يدق ويبارك بالشهر؟
الناس اللي أعزهم أدق عليهم وأرفع السماعة بس الناس اللي صار لهم قرن مو داقين علي أدز لهم مسچ.