زارني أحد الأصدقاء مع ابنه صاحــــب الـ 10 أعوام منذ يومين بعد صلاة العشاء، وبعد أن دخلنا إلى المنزل بادرني الطفل بسؤال: عمو هو أنت مطلعتش لعيب كورة ليه؟
باغتني السؤال الذي لم أكن أتوقعه من ابن صديقي، فرديت عليه وأنا مبتسم: اشمعنى لعيب كورة، مش دكتور زي أبوك مثلا أو مهندس أو.. قبل أن أكمل أو الثالثة قاطعني الولد الشقي باستنكار شديد، قائلا: يا عمو أنا باقولك لعيب كورة تقولي دكتور ولا مهندس؟ انت عارف ان جمال حمزة بياخد من الجونة 2 مليون جنيه صافي في السنة، وحسام غالي بياخد 4 ملايين من الأهلي ومحمود ابوالسعود وكمان جدو بياخدو 7 ملايين، وعمرو زكي 5 ملايين من الزمالك، والأغرب من كدا شيكابالا اللي ناديه بيديله 5 ملايين صافي في السنة الواحدة واللعيب بيدلع عليه والنادي بيجري وراه وهيزوده عشان يرضى ويقعد، وفي الآخر تقولي دكتور؟ هو الدكتور بياخد كام في السنة ياعمو؟
كنت مع كل جملة ينطق بها الطفل لا اصدق اذني، ومع انتهاء كلامه أدركت اني محاصر وعليّ إما إقناع الطفل او تغيير دفة الحديث، وعندما نظرت الى صديقي وجدته مبتسما ينتظر هو الآخر إجابتي على ابنه، فنظرت للابن وقلت: بص يا حبيبي الموضوع مش فلوس بس، لكن الأهم من الفلوس هو انك تحس بالراحة في عملك وبعدين الفلوس مش كل حاجة فلابد من العقل والعلم والتفكير السليم حتى تستطيع ان تشعر بكيانك ووجودك في الحياة، انظر مثلا للدكتور احمد زويل فبعلمه اخذ جائزة نوبل وقبله الكاتب الكبير نجيب محفوظ وايضا الجراح المصري العالمي د.مجدي يعقوب فبدون العلم لم يكن يعرفهم أحد في العالم، فإيه رأيك تطلع انت زي واحد فيهم؟
صمت الطفل لحظة.. ورد بعدها قائلا: بصراحة أنا معرفش الناس اللى حضرتك بتقول عليها بس «اللي يعيش ياما يشوف».
صعقت من رده علي، وأدركت قمة الخطر الذي يواجه الأجيال القادمة التي لا تعرف زويل ومحفوظ ومجدي يعقوب، وتعرف فقط جدو وشيكابالا، فرديت عليه: فعلا يا ابني اللي يعيش يا ما يشوف!
[email protected]