الأشخاص: الموظفتان رقية ونصرة، والمراجع، والمدير.
المكان: في أحد القطاعات الحكومية.
المشهد الأول (مكتب الموظفتين)
رقيه: أقول نصرة، ياليت تساعديني في حل الكلمات المتقاطعة، تراني حدي متوهقة، كلما أحصل جواب، المربعات ما تكفي.
نصرة: قولي.. شنو السؤال؟
رقية: يقول السؤال.. ما الشيء الذي تضطر أن تأكله وهو مر؟ من خمس مربعات وبدايته (ال).
نصرة: ممم الحسو
رقية: تعتقدين هذي الإجابة؟
نصرة: إي هو اللي ننجبر ناكله بنفاس، وعدد حروفه 5، ويبدي بأل التعريف
رقية: انزين، السؤال الثاني يقول، ما الشيئان اللذان إذا اقتربا من بعضهما، تحدث بينهما شحنة كهربائية؟
نصرة: ممم.. اتوقع القطو والقطوة، إذا اقتربوا من بعض، يوقف شعر جسمهم، ويعاوون، وهذا دليل الشحنة الكهربائية.
رقية: وي.. من صجج؟
نصرة: أي اعتمدي
رقية: بس ما تكفي المربعات.
نصرة: أفا عليج.. زيدي مربعات من كل جهة، حنا عندنا لين آخر الدوام، وش ورانا؟
مراجع: السلام عليكم خواتي، ممكن اعرف وين مكتب المدير؟
نصرة: خذ الممر هذا كله، وبعدين اكسر عاليسار، وبعد خطوتين تلقى مكتبه.
المراجع: مشكوره أختي.
رقية: نصرة.. في سؤال غريب، يقول: ما الرائحة التي إذا انبعثت من مصدرها، تعطي الإنسان راحة واسترخاء؟
نصره: هذي معروفة، ريحة القهوة، إذا انحمست وتهيلت، وانحطت بذيك الدلال، وانطبخت على الفحم، يا ويلي.. تخلي الروح ترد من ريحتها.
رقيه: انتي من صجج والا تتغشمرين؟
نصره: أي وأنا صادقة، ما شميتي ريحة قهوة أهلي، أتحدى تنسينها، تحسين انج بدنيا غير
رقيه: انزين صدقتج، بس ما تكفي المربعات.
نصره: قلت لج زيدي.. زيدي كثر ما تقدرين، انتي شمزعلج؟
المراجع: خواتي آسف عالإزعاج، بس رحت مثل على وصفكم آخر الممر وخذيت يسار، وما لقيت مكتب المدير.
نصرة: ياويلي.. آسفة عطيتك الوصف غلط، شوف يا خوي.. بدال ما تاخذ يسار، خذ يمين، بس مثل ما قلت لك بعد خطوتين تلقى مكتب المدير.
رقية: ها؟.. نصرة انكمل؟
نصرة: إي كملي.
رقيه: السؤال يقول، ماذا يسمى أعلى مكان يصله الإنسان؟ ومكون من 3 حروف، أول حرف منها ق، والأخير تاء مربوطة.
نصرة: ممم يمكن قشة، وإلا قرة وإلا... تدرين اشلون إذا ما كفى الجواب اللي بنطلعه زيدي مربعات كثر ما تقدرين، زيدي وزيدي، حنا وش ورانا؟
المراجع: السموحة خواتي، رحت على وصفكم، وخذيت آخر الممر وكسرت على ايدي اليمين، وما لقيت مكتب المدير، بعد خطوتين مثل ما قلتولي؟
نصرة: أووف.. ياأخي زيد خطواتك، زيد زيد وأنت اش وراك؟
شي ما شفتوه:
(مكتب المدير)
المدير: هذا سادس اجتماع وأنا أحذر من التسيب والإهمال في هالإدارة، وغير شكاوى المراجعين من تأخير المعاملات، تبوني أنقلكم كلكم عند الحدود، ونخلص منكم.
نصرة: سامحنا بو سامي، ونوعدك نصير عند حسن ظنك.
رقية: وأنا أوعدك بعد.
المدير: انتو الثنتين آخر من يتكلم، أنا عمري ما شفت أحد لما يحل كلمات متقاطعة، وما تكفي المربعات، يزيدهم؟.. تدرون شنو يسمون (أعلى مكان يوصله الإنسان) اللي يتصرف مثلكم؟.. يسمونه قمة ال.... تفهمون شقصد؟.. والحين كل واحد فيكم يرجع لمكتبه ويكمل شغله وإلا ترى «أعذر من أنذر».
رقية: نصرة.. ترى عرفت حل المربع الأخير، جاوب عليه المدير وهو ما يدري ههه.
نصرة: شنهو الجواب؟
رقية: أعلى مكان يوصله الإنسان اللي يتصرف مثلنا، هو قمة (ال).
نصرة: هاا؟.. صح، صج انج ذكية ولقطتيها أول مرة أسمع أنا بقمة اسمها (ال).
رقية: بس هم ما تكفي المربعات حق كلمة (ال)، ممم.. بس على قولتج نزيد مربعات، حنا وش ورانا؟
نصرة: اي وأنا بنت ابوي بنزيد مربعات، حنا وش ورانا.
[email protected]