أنوار عبدالرحمن
في ظرف صعب مثل ظرف العزاء، دارت بعض الاحاديث البسيطة بين بعض المعزيات عن مواضيع مهمة وغير مهمة، فلنستمع لجزء منها:
الله يرحمه كان خوش ريال، طيب وحنون على مرته وعياله، ويواصل اهله، الله يعين مرته على فراقه كاسرة خاطري.
الا الله يعين امه هالمتحطمه، شوفي اشلون حالتها من درت بوفاته.
وانتي تحسبين هالشي هين عند مرته، يكفي انها بتشيل المسؤولية من بعده.
لا، اكيد، عالعموم ارتاح من هالدنيا وبلاويها، اللي صار فيها مو شويه.
انتي تدرين اشصار بعياله يوم دروا؟
ادري قالوا لي، بس لا تذكريني وتعورين قلبي.
بس آنا مو حارتني الا شيخة بنت اخوه، يوم درت قالت احنا كنا متوقعين، وقاعدة ابهالدراعه الكشخه، واتضحك مع رفيجاتها بالدار الثانية.
اي آنا شفتها، وزفيتها وقلت لها ترى فشلتينا.
انتي بس لاحظيها، ترى حاطه مكياچ خفيف.
مكياچ؟ من صجج؟
هذا اللي يسمونه مكياچ للعزا، الحمد لله والشكر حتى لهالسالفه فيها مكياچ.
اتصدقين عاد آنا حسيت انها حاطه شي، بس قلت ان بعض الظن اثم.
يا معوده، السالفه صارت اشكره، الله يهديها، ما جنه اللي مات عمها.
خلينا الله يعافيج منها، هالوقت المفروض ندعي له، اهو بحاجة للدعاء.
اقول، خلوده، هاللي قاعده يم خالته منو؟
هذي يارتها، ام وائل، خوش وحده.
واللي قاعده اهناك بالزاويه؟
هذي شفتها مره او مرتين عند أم احمد، بس ما ارتحت لها.
اشلون يعني؟
مادري، بس احس انها تبالغ بالكلام، وامسويه لها برستيج عشان افتحت صالون بالجابرية، ومرت ولدها تديره، لو تسمعين كلامها تقولين هذي شنو، مو امصدقه عمرها.
مسكينه هههه.
ابييه سكتي لاحد يسمعج، شنو نسيتي نفسج وين قاعده؟
ابيه يا رب سامحني، مو قصدي، استغفر الله.
بس طافج امس، يوم يت ام احمد مع وحده من رفيجاتها الحريم الكبار، خلت اللي قاعدين بالعزا كلهم يضحكون.
ليش، اشصار؟
مسكينة يوم بغت تطلع، سلمت على ام المرحوم وزوجته، جان تلتفت عليهم وهي طالعه وتقول، يالله يا جماعة عساكم من عواده، جان اللي بالصالة كلهم يلتفتون، وما تسمعين الا الضحك من بعيد.
ابييييه، ههههه.
اليوم انتي الظاهر بتورطيني معاج مع هالضحك، قصري صوتج احنا بعزا.
استغفر الله، يا رب لا تحاسبني.
لما تشبعين ضحك تقولين استغفر الله؟
بعد شسوي اسمع تعليقاتج وما امسك نفسي، امممم بسألج، هالبيت اللي ساكن فيه المرحوم، منو باسمه؟ لأني سمعت ان البيت هذا حق امه.
مادري آنا اول مرة اسمع هالكلام.
حتى آنا، بس المشكلة الحين يقولون بتصير، بين اعياله من مرته اللي طلقها، وبناته من مرته هذي.
ليش يعني؟
لأن مرته هذي مايابت له ولد، وذيك عندها منه ولدين وبنت.
صاجه، صاجه، تذكرت كلامه الله يرحمه قبل لا يموت.
عشان جذيه طليقته يوم يت اتعزي كلمت اخته بهالموضوع وردت عليها وهي امعصبه، اتقول لها احنا وين وانتي وين.
الله لا يبلينا، شنو هالناس اللي اتفكر بالفلوس وتنسى العشرة بدقيقة؟
خليها على الله، الله يستر علينا لامتنا، اعيالنا ورياييـــلنا اش بيسوون؟
فال الله ولا فالج، ربي يطول بعمرنا حق اعيالنا، لو وحده فينا تموت قبل ريلها، ما يصدق عقب اسبوع والا وهو متزوج، وعقبها اعيالنا بياكلونها من مرت الابو.
صاجه، جذيه خالي سوى يوم ماتت مرته.
انزين الله يعافيج، حشينا بالناس بما فيه الكفايه، خالندعي للريال اشويه.
اي صج، الله يرحمه.
شي ما شفتوه
خلوده، ممكن اتحطين موبايلج عالصامت، ترى مايصير ابهالمكان حاطه نغمه مثل هاذي الله يهداج.
آسفة نسيت، الحين بحطه سايلنت.
خلوده، خلوده، ابي منج شي، قبل ما تسكرين موبايلج.
شنو؟
دزي لي هالنغمة تكفين، من زمان ادورها.