أنوار عبدالرحمن
يُلاحظ في بعض الإدارات، خاصة التابعة لوزارات الدولة، ان بعض الموظفات يتناولن طعام الفطور على مكاتبهن، فتجد المراجعين والمراجعات يتبرمون ويسخرون من تلك الطريقة، واليوم المدير الجديد أصدر قراراته
- السلام عليكم بنات.. شنو هذا؟ أشم ريحة فطاير بالزعتر عالصبح ياااسلام
- هلا وغلا حياج..
- يا حريم.. لا تنسون اخوكم حميدي بفطيرة جبن.. تراني جوعان
- قطيعة بس قاعد ويتطلب.. ولا يوم دخل علينا حتى لو بصمون مشكل
- وين (بوبي) يسوي لنا الشاي؟
- هو!! منو (بوبي) هذا؟!
- الفراش الهندي اليديد اللي يانا امس.. اي صچ، انتي ما شفتيه كنتي مستأذنه
- لا مهو هندي.. شكله باكستاني
- آنا شايفه جوازه امس
- هو!!.. متى مداچ تشوفين.. جوازه؟
- كنت بتأكد من جنسيته
- صچ حريم.. وتموتون عالفضول
- بس لو اسمه (بابو) اهون.. هذا اشلون تنادونه؟
- اشلون يعني.. اشلون اناديه؟!
- لأن.. اسمه مو اسم آدمي.. حشاكم.. يمكن الـ
- سمعوني بنات ابسرعه.. المدير اليديد يبي الملفات.. همتكم
- هالمدير من يا امس وهو شاد حيله.. وزع نشرة بالقوانين اليديدة.. الله يستر وايد شديد.. لو يجكنا بهالفوضى واحنا ناكل.. بالعون مهو راحمنا
- بوبي..
- نعم مدام
- لا تقول مدام.. قول آنسة!
- وي.. ما عندچ سالفه ليلوه.. اشعرفه اهو؟!
- يا حريم.. صوتكن.. صوتكن عوره.. يسمعكن اللي بره الوزارة
- يبا دور لك مكتب ثاني ذبحتنا.. وإلا صك اذانيك ولا تسمع.. حشى.. سماعات مو اذون!
- بوبي جيب لنا خمسة شاي بسرعة قبل ما يجون المراجعين والمدير
- ان شاء الله
- يشبه الممثل الهندي ذاك.. ابيييه نسيت اسمه الله يقطع ابليس
- بس يا حليله من نقول بوبي نلقاه عندنا.. مو مثل ذاك اللي ذلف ينبح صوتنا على ما يسمع ويتحرك
- ألو هلا بالغلا كله.. نوّر التلفون
- ماالت.. من يدخل المكتب.. يمسكلي هالتلفون
- وسماعات اذونه شغاله تلقط كل اللي نقوله
- عيب يا حريم .. ما يجوز
- ما دريتوا امس طحت طيحة من هالكعب.. جدام المدير اليديد وانقص ويهي
- هههههه.. حده فشله
- بس شكله ما يغشمر.. يقولون انه من النوع اللي عنده الشغل شغل.. ومتوعد فينا وبقسمنا هذا بالذات
- بسألكم اهو مسلم؟!
- اشهالسؤال الغريب؟!
- ابّييييه انكب الشاي على اهدومي.. واااي
- روحي غسليه بالماي قبل لا يصبغ
- يا بنات بسرعة.. بسرعة شيلو الأكل اللي جدامكم.. في مراجع يايكم
- ما مدانا ناكل قطيعه.. يهلون علينا مع طقة الكرت!
- وي.. نسيت اتصل لكم بمطعم الكشري.. عشان ناخذه معانا بالطلعة
- الله يغربل ابليسج.. اتصلي عليه.. أنا اليوم ما طبخت.. لا يعفسني بوالعيال
- ندويه.. وين الرشوش؟.. ريحة الفطاير والفلافل.. تكفخ الراس
- حشى جالسات بمطعم هندي مب مكتب في ادارة حكومية.. وربي لو يشوفكن المدير على هالحال.. بيكتب فيكن كتاب نقل لأم الهيمان ههههه
- حميدي.. اكرمنا بسكوتك احسن لك.. خاف انت اللي قاعد اتطبقها.. تمسك لي هالتلفون من تدخل وسوالف وضحك
- قاعدة اسألچ اشفيچ ما تردين
- شنو.. مادري اي سؤال؟
- اقولچ اهو مسلم؟
- السلام عليكم يا بنات.. وين الموظفة اللي اهنيه
- انطرها شوي.. الحين تيي
- المدير اليديد يقول لكم بعد نص ساعة بيمر عليكم
- أبيييه يالله بسرعة يا بنات خلصوا شغلكم
- فوزوه.. ما قلتي لي اهو مسلم؟
- منو.. المدير؟!
- اشفيچ ما تستوعبين.. يعني لازم اصرخ والكل يسمعني اقول.. بوووبي
- نعم مدام.. شنو يبي؟!
شي ماشفتوه:
- السلام عليكم.. اقدم لكم نفسي انا منصور مديركم اليديد تسلمت منصبي امس وببتدي معاكم العام هذا بأسلوب جديد واضح يرضي الجميع من موظفين ومراجعين.. والقوانين اللي اوصلتكم امس بالنشرة اتوقع انكم طبقتوها من اليوم.. اللي منها عدم التأخير عن الدوام.. وتسليم الملفات بوقتها.. وعدم الأكل على المكاتب.. وعدم الـ
- لامؤاخذة يا جماعة.. الفول والكشري وصل.. فين الفلوس؟!
- هااا.. فول وكشري عندنا اهنيه!!!