أنوار عبدالرحمن
عالم لا تعرف نوعه ولا حقيقته، يعيش خلف الشاشة، وحوار لا تعلم صدقه من كذبه، تراه يمر في شريط حواري يسمى بـ (الشات)، إليكم ما تصوره خيالي من حوار، قريب من الواقع الذي نراه في اشرطة تمر بإحدى القنوات الفضائية.
راعي البورش: يسلم على اللي بالشات ويقول لكم يا أحلى صباح.. يا أحلى مسا دايخ ومقفل: يا شباب بليز.. أي قناة هذي؟
شوق الكويت: طرالي قلبك الغالي طرالي.. يا عساك بخير.. كتبت الحرف باحساسي لأنك في خفوقي غييير.
تفاحة: اللي بايقة امس.. اقول لها استحي على ذا الوجه.
الشرطية الحسناء: صباح الخير.. ما شفتوا (ضابط رومانسي)؟
همتارو: أنا همتارو.. أحب أفلام الكرتون.. وحاب يتعرف على بنت من أي بلد.
المطيري: المطيري وووصلللل.. تقهووا يا جماعة.. حياكم.
بوخالد: اذكروا الله (سبحان الله وبحمده.. سبحان الله العظيم).
حاير طاير: اشحالچ (جميلة الجميلات) ممكن أسألچ؟
دلوعة الشات: راعي البورش فقدتك أمس.. ما شفتك عالشات.
سعودي وافتخر: ممكن أتعرف على بنت حلوة كويتية؟
ولد الامارات: شوق الكويت.. يا زين هالرمسة فديتچ.
ضابط رومانسي: الشرطية الحسناء.. أنا موجود.. ومتابع.
همتارو: أنا همتارو.. أحب أفلام الكرتون وحاب اتعرف على شوق الكويت.. ممكن؟
أربعيني فاصل: كوكو.. وين مسچاتي؟
جميلة الجميلات: حاير طاير.. آمر.
المطفوق: كنترول.. نبي الاسبوع الياي تعرضون مسرحية «انتخبوا أم علي».
بنت القبيلة: سلام على اللي بالشات.. ما عندكم نكتة.. نبي نضحك شوي.
دايخ ومقفل: يا شبااااب چم الساعة الحين؟
المطيري: عاشت عاشت شوق الكويت لوول.
زوجة مقهورة: ذبحني زوجي ياناس.. كل يوم ديوانية.. صچ طقت چبدي ومليت.
همتارو: أنا همتارو وأحب أفلام الكرتون.. يا بنات.. عطوني ويه!
راعي البورش: دلوعة موووت.. أمس كان عندي خفارة.
طالب مهذب: ادعوا لي عندي امتحان باچر.. تكفووون.
الچيكرة: اسمح للتعارف بس للچياكر اللي مثلي هههه.
ولد الرياض: مساكم بالخير، عندنا بالرياض مطر والحرارة 40 اتصدقون؟
الشرطية الحسناء: چم مخالفة اليوم خالفت، أخاف كنت بمنطقتنا وخالفتني هههه.
ثلاثينية مزيونة: أسلم على أربعيني فاصل واقوله الشات منور بوجودك.
بوخالد: أذكركم بارك الله فيكم.. پاجر تبدي الأيام البيض.. لا تنسون صيامها.
قوطي فاضي: واحد دزوا له فاتورة الماي.. لقاها 2000 دينار چان يقول لهم ليش.. انتوا حاسبين علينا آخر مطرة هههه.
دايخ ومقفل: المطيري صب لي من اقهوتك الزينة يمكن اصحصح.. خخخ.
همتارو: انا همتاروا، أحب افلام الكرتون.. وحاب اتعرف على بنت القبيلة.. ممكن؟ يا بنات ردواااا.
حاير طاير: جميلة الجميلات من وين انت؟
زوجة مقهـــــورة: يا نـــاس أبي حـــــل مع هالريال.. تعبت منه.. يا ليته يحس!
ضابط رومانسي: الشرطية الحسناء.. خالفت خمس بنات مزيونات.. يمكن انت وحدة منهن يا ويلي ويلاه.
شعبان أخو رمضان: يا جماعة خلونا نتابع المسرحية احنا بشات في قناة تلفزيونية مو عالنت.. بسكم سوالف.. خخخ.
ولد الامارات: قوطي فاضي ضحكتني.. فديتك ههههه شو عندك بعد؟
أربعيني فاصل: ثلاثينية مزيونة.. منور باللي قال.. حاب اتعرف ان كنت جادة.
ولد أمه وأبوه: اسلم على راعي البورش.. وولد الامارات وحاير طاير وجميع اللي بالشات.
سعودي وافتخر: يا جماعة الخير ادعوا للهلال يفوز على النصر في مباراة اليوم.
ستينية بس تعجبكم: دخووول أمسي عالحلوين.. واقولهم حابه اتعرف.
شايفة حالها: ما في وحده احلى مني واتحدى كل البنات اللي في شات.
بوخالد: يا جماعة الخير.. لا تنسون صلاة الفجر.
بنت العين: دخول.. صباح الخير.. اشتقت لكم غ/م.
مخرعهم بصلعته: صچ مسخرة.. هالحب اللي بالشات كله كذب بكذب.
دايخ ومقفل: يا حلوين.. تكفون بلييز قولولي.. شنو اليوم؟
همتارو: اهئ اهئ اهئ.. انا همتارو، احب افلام الكرتون.. ستينية هذي آخر محاولة معاچ.. ممكن اتعرف؟
شي ما شفتوه:
سبعينية شادة حيلها: تسلم عاللي بالشات... وتقولكم ما في سبعيني قلبه خضر؟!