أنوار عبدالرحمن
أربع كبائن، وأربعة مشاهد، لنرى، ولنستمع لما جرى في تلك الليلة هناك في المطعم الراقي!
كبينة (1)
- خالد، شوف تراني يايبتك معاي اهنيه لأن ابوك ما وراه طلعة ولا وناسة، وآنا يايه اغير جو عن مشاكل البيت، فلا تقرق فوق راسي بحنتك وطلباتك.
- انزين آنا الحين بروح شوي الحمام بعدين اييچ.
- تونا داشين باسم الله، على طول تبي حمام؟
- اي يمه بعد شنو؟!
- روح بس روح، مقرودة آنا اللي مو لاقية أحد آخذه غيرك.
كبينة (2)
- تهاني اشرايچ بهالمكان، مريح وهادي صح؟
- اي، حتى اضواءه خافتة وروعة وصوت الميوزك ناعم.
- وأهم شي بالموضوع ان احنا مع بعض ومحد يسمعنا، مو مصدق انچ صرتي حلالي وملكي، عطيني ايدچ يا بعد قلبي.
- يوه حبيبي، استحي.
- أقول تهاني، ليش ايدچ حاره؟!
كبينة (1)
- هذا، وين ذلف؟ شربت الشوربة ابروحي وكليت السلطة وللحين ما يا من الحمام؟!، صار سباحة مو قضاء حاجه!! آآه على حظي، عالعموم، محد امونسني إلا صوت هالمعاريس «طيور الحب» هالاثنين اللي اقعدوا في الكبينه اللي يمي، سوالفهم كلها عندي حسبالهم محد يسمعهم، ذكروني بزمان مضى!
كبينة (2)
- كلامك يذوب الثلج، مادري بعد العرس ولما نسكن بشقتنا شنو بتقولي.
- ذيك الساعة، الكلام شكله ثاني.
- هههه شنو بعد هالكلام اللي شكله ثاني، اثاريك مو هين امجهز لكل حدث حديث.
- اشعبالچ، اعجبچ.
كبينة (3)
- سالم، عبدالعزيز، جابر انتوا قعدوا يم بعض بهالناحية، وانا وأمكم وشروفه بهالناحية هذي.
- يما، هالمكان ظلمه ما يونس.
- سكتي شرفوه احسن لچ، ما صدقنا نطلع هالطلعة وبعد تتحلطمون.
- يبا، ترى سالم قاعد يدزني.
- ما دزيته، اهو اللي قاعد يسحب كرسيه وحاش كرسيي.
- بس سكتوا، ما مدانا ندخل المطعم بدا اهواشكم، كل واحد فيكم خل يصك حلجه والحين نطلب لكم وتبلعون وازتكم البيت وافتك منكم.
- اشدعوه بوعبدالعزيز امعصب چذيه، اليوم يوم طلعتنا مو تقعد تهاوش وتزف وتنكد علينا.
- مو انتو مو مال طلعه، يبا هالأماكن اللي چذيه يبيلها واحد ووحده مو واحد معاه كوشة يهال.
- شنو تقصد بكلامك واحد ووحده، ها؟!، اي آنا اقول مو قالب راسك الا اللي افبالي وبالك!
- اقصري الشر احسن لچ، وبلا كلام فاضي جدام اعيالچ.
كبينة (1)
- ها، يما كليتي؟
- اي كليت وشبعت، وانت وين كنت هايت؟
- رحت تحت اتمشى بالمجمع.
- الصراحة، مادري ليش يايبتك معاي عشان تونسني والا تخليني بروحي؟!، محد غير علي الجو اليوم الا «طيور الحب» اللي قاعدين يغردون في الكبينة اللي يمنا.
- طيور الحب؟! وينهم؟، يمه احنا بمطعم مو بسوق الحمام هههه؟
- روح زين، صچ منت عارف شالطبخه، ما قول الا «ابچي على البمبره وابچي على التينه، ابچي على من ذبح قلبي بسكينه».
- الام قامت تغني، ايوه، ايوه ههههه.
- من الحرة اللي افقلبي.
- انزين، يمه طلبي لي عصير كوكتيل، بروح اشوي وارجع لچ، شايف شي بشتريه عجبني.
- روح اذلف، انا ادري اش رايح له تهيت ورى هالبنيات! ما وراك يا وليدي اليوم فود، آآه يا حظي.
كبينة (4)
- حبيبي مبارك، ترى طلبت لك على ذوقي انت وفارس واروى لأنكم تأخرتوا في المحل وانا يعت هههه am so sorry.
- كل شي منچ حلو، احنا يعجبنا ذوقچ، آسفين عالتأخير.
- يمه، ممكن سؤال؟
- تفضلي حبيبتي أروى قولي.
- انتي تحبين وايد هالمكان؟
- اي احبه لان اجواءه جدا رومانسية، وأكله حلو وتقديمه ممتاز that's all.
- أها، we all so.
كبينة (2)
- حبيبي ممكن اتطول صوتك، قمت ما اسمعك من ازعاج هالكبينة اللي يمنا.
- اتصدقين نرفزوني، خربوا علينا الجو، ودي اروح للأبو وأقوله سكت اعيالك، أف!
كبينة (3)
- يا معود، انا قاعد الحين بالمطعم مع الأهل، وين اييك بچبد هالحزه، والله طاير قلبي بس وين!، المهم چم وصل سعر التيس والصخله اللي شفناهم ذاك اليوم، بس يا عيااال خلوني اسمع!
- يبا، جابر خذا قفشتي.
- هذي قفشتي يالكذاب.
- يا حرمه، سكتيهم.
- انت خلص من هالتلفونات، وبعدين قول سكتيهم، من قعدنا وانت ما بقى واحد ما اتصلت عليه، ألو يا فلان بچم الياخور اللي يمك، والعلف چم وصل سعره، ألو يا فلان، بچم الصخله اللي سمناها، ألو يا فلان، بچم العربانه اللي شريتها، ما صارت هذي مو طلعه ترى!
- عطني قفشتي يالبواق.
- مابي، ترى احذفها الحين ولا تأخذها.
- لا لا لا لا.
- «طااااخ».
كبينة (2)
- واااااي، شنو هذا اللي طاح علينا.
- قفشه! من هالكبينة اللي يمنا، أراويه، الحين بروح له واشتكي عليه!
كبينة (1)
- ألو خالد وبعدين وياك، تعشيت وشربت عصيري، وحليت، وانت للحين ما ييت، وين ذلفت هالمره بعد؟!
كبينة (4)
- شنو صاير بالمطعم اليوم، صوت ازعاج وهواش.
- i cant take it.
- don't worry my darling.
- حبيبتي، أنا بشوف اشصاير وارجع لكم.
- لا مالا داعي حياتي، المفروض we don't care.
كبينة (3)
- آسفين، يالحبيب، امسحها ابويهي، هذولي العيال كانوا يتهاوشون، ومادري انهم احذفوا القفشه عليكم.
- لو طايحه على روسنا، هم بتقول امسحها بويهي، هذي وين اصرفها؟!
- آسف يالغالي، الحين بوديهم البيت، هذولي ما يستاهلون مكان مثل هذا، هذولي حدهم صمون مشكل عند البحر وبس، المفروض حق ناس راقيه، او ... واحد ووحده.
- هاااا؟، اشقلت؟!
- بس يا حرمه قصري صوتچ، فشلتينا.
- واحد، ووحده، هااا؟!، الظاهر الصخله اللي تسأل عنها، حرمه رابعه بعد الحرمتين اللي حطيتهم أول فوق راسي!، يالله امش البيت آنا اللي بشوف سالفتك اليوم!
كبينة (1)
- يمه دفعتي الفاتوره؟
- أي دفعتها.
- انزين شنو صاير؟، الريال اللي في الكبينه ذيك، طلع من المطعم امعصب على اعياله ويصرخ عليهم.
- احسن فكه، عالأقل اقدر الحين اسمع اشوي السوالف الحلوه من الكبينه اللي يمنا.
- يمه، اشقاعده اتقولين؟
- خالد ممكن تنزل اشوي للمجمع، خلني بروحي بسمع، الجو هذا الحين!
- هااا؟
كبينة (4)
- العايله اللي بالكبينة ذيك شكلهم راحوا.
- الظاهر چذيه، لأن صار هدوء.
- حبيبي فارس، كمل سالفتك اللي صارت معاك بالـ school.
كبينة (2)
- زين سويت فيه، هذا ريال ما عنده احساس ولا امربي اعياله عدل، اخاف باچر آنا اذا يبت لك اعيال تهملني واتهاوش معاي واتسوي فيني چذيه.
- آآنا يا تهاني؟!، أفا عليچ، اعتمدي، حب ووفاء للأبد.
- يا بعد قلبي انت.
كبينة (1)
- ههههه يقول لها حب ووفاء للأبد، ذكرني باللي مضى، قالها لي بوخالد من قبل وصدقته، ألو خالد وينك؟، تعال بنروح للبيت، بدا الكلام اللي ماحب اسمعه!
شي ما شفتوه:
- حياتي اشرايچ بهالمطعم؟
- حلو، وايد، أول مره ايي له.
- انا ييت من قبل مع العيال وأمهم، الله وكيلچ خربوا الجو عالناس وبهذلوني تبهذل معاهم، وقاموا يحذفون القفاش.
- هههه عشان تتوب وما تييبهم مرة ثانية اهنيه.
- ألو، هلا أم عبدالعزيز، أنا بالجاخور بچبد، قاعد اسوم لي اصخله!
- هااا، آنا اصخله؟!