أنوار عبدالرحمن
شيخة (أم العروسة) أدت واجبها تجاه الأهل والأصدقاء في دعوتهم لحضور حفل زفاف ابنها، لكن ماذا دار في ذلك اليوم من حديث جانبي بين بعض الحاضرات؟!
ما عندها سالفة شيخة عازمة هالدنيا كلها الا أم سالم جارتي.
يمكن لأن أم سالم ما عزمتها يوم عرس بنتها.
من صجچ!.. أصلا لوهي تبيها تجي چان احرصت.. لكن لأن الموضوع فيه إنه..!!
المهم ان احنا ما طافنا العرس.. بنتمقل بهالعروس والمعرس اللي جدامنا.
ويه.. ماعندچ سالفة.. من زينها!!.. شوفي المعرس أحلى منها بواجد.
حظها يكسر الصخر.. وبعد ضابط بالشرطة وأبوه يملك ملايين.. يا بختها.
لو شايفة العرس اللي امسويته بنت عمي حق بنتها ذاك الخميس.. چان انجنيتي على العروس والكوشة.. والا طرحتها وربي عجيبة.. والشبكة الألماس اللي تلمع من بعيد.
اللي تبي الزين والكشخة تدفع.. مو تسوي نفسها ما في أحسن منها.. مثل صاحبتنا اليوم!!
أنا ما توقعت عرس اليوم چذيه عادي.. وما فيه شي جديد.. والغريبة.. أهل المعرس رازين نفسهم مع ان العرس على أهل العروسة.. عشنا وشفنا.
بس أنا مستغربة من شي لو تلاحظين.. ليش أم العروسه قاعدة بعيد؟!
ان ما خاب ظني.. يجوز مهي راضية عالمعرس!
الظاهر البنت تعرفه من قبل وغاصبة أهلها عليه.
واضح.. شوفي اشلون يمونون على بعض.. شكلهم يعرفون بعض من زمان.. ما قول الا.. الله يستر على بناتنا وبنات المسلمين!
الله يكافينا شر هالزمن.
ياختج.. الحيا راح.. وين أول والحين.. كل شي صار مقلوب.
واعليا علي.. اللي كان عرسي بالحوش.. وقمت أرجف يوم شفت فيصل مجبل علي.
شخباري العرس اللي بالحوش!!.. من صجچ انتي؟!
ايه... شسوي بعد.. عوايدنا چذيه.. مع ان صالات الأفراح في كل مكان.
اتصدقين.. أنا بزواجي الثاني.. حلفت لسوي عرس لا صار ولا استوى.. واطلع اللي بخاطري كله.. بس الشايب ما رضى.. يقول عيب بعد هالعمر نسوي عرس!
خلاص.. راحت عليچ.
ما عليه.. فطوم بنتي ان شاء الله بعد سنتين بزوجها.. وتشوفين اشبسوي.. لا خلي شيخة وربعها يتكلمون عنه.. ويقارنون.. عرسنا والا عرسهم.
أقول.. شوفي بدلة شيخة.. اشرايچ فيها؟
من صجچ تسأليني بعد!.. من متى شيخة عندها ذوق؟!.. ما عندچ سالفة.. شيخة ما عندها الا آنا وآنا.. فشخرة زايدة.. على ولا شي.
بس الصچ ينقال.. تسريحتها ومكياجها.. روعة.
أنا مو شايفتها روعة.. انتي لو شايفة بنت عمي بعرس بنتها چان شفتي الكشخة الصچية.. والشي العدل.. مو شيخة وبناتها.. مايندرى رايحين أي صالون..!!
لا تسمعنا بس.. وتطردنا.
خليها تسمع.. احنا قلنا شي فيه غلط؟!
خذت حسناتنا ياختج من كثر ما تكلمنا فيها.
هذي اسمها حرية راي!!
صاچه.. صاچه.. هذا راينا.. وكل وحدة حرة برايها.
الزين يا حبيبتي يفرض نفسه.
انزين صورتي بعرس بنت عمج؟
إي أفا عليچ.. وبجيبهم لچ.. وبتشوفين بعينچ.. وتصدقين عرس بنت عمي والا عرس اليوم.
لا طبعا أكيد عرسكم.. مو هالعرس البايخ..!
شي ما شفتوه:
مريوووم ترى تأخرنا.. صارت الساعة وحدة.. بس كافي.
ويه.. قعدي بس قعدي.. صچ ما عندچ سالفة.. خل نستانس!!