أنوارعبدالرحمن
يبدو أن قصة (فهد) في الجزء الأول من «مسلسل ما ينتهي» التي نشرت سابقا في هذه الزاوية، قد أثارت إعجاب كثير من القراء، ولذك تشجعت في ان أكتب لكم الجزء الثاني منها، تكملة للموضوع الاول عن فهد وقصة طلاقه وزواجه الثاني، إذن فلنتابع معا أحداث هذا المسلسل (اللي ما راح ينتهي)!
في الديوانية:
- مبروك فهد، سمعنا انك رديت زوجتك الأولى.
- اي والله، الصراحة العيال اكبروا وصاروا حساسين وايد، يبون يعيشون بيني وبين امهم، قلت اردها عشانهم.
- زين سويت، عيل الحين انت عايش بربيع، صار عندك حرمتين هههه.
- اي، ههههه، تقدر تقول جذيه.
في بيت الزوجة الأولى:
- ها فهد، موقلت بتطلق (مروة) لما تردني؟
- ها؟! اي بس انتي، ما تدرين انها حامل وبتييب الياهل الثاني، يعني لو طلقتها العيال بيتشردون، اشذنبهم هالمساكين يعني؟
- ذنبهم ان ابوهم، بس قاعد يكود بهالعيال وما يحسب احساب مشاعر غيره.
- تعوذي من ابليس، تراني ياي من الديوانية وراسي منقلب، خليني انام مرتاح، وعن الحنة الله يرحم والديچ.
- مالك مكان ابهالدار، انا ما احط راسي يم واحد غشاش، قصيت علي بچم كلمة حلوة وخليتني ارد، ووعدتني اتطلقها وقاعد تتهرب، اطلع بره وماحط ايدي على ايدك الا لما اتطلقها.
- يعني عناد، هاا؟ قولي لي وين انام بهالشقة الصغيرة!
- اي عناد، روح نام ان شاء الله بالبلكونة، ما يهمني.
- ابهالجو البارد تبيني انام بالبلكونة واستمرض؟ انزين يصير خير، اراويچ!
في بيت الزوجة الثانية:
- مروة، عطيني الله يعافيچ بندول راسي يعورني، چنه فيني بداية فلوانزا.
- اشفيك بعد؟ مو كنت عند المدام اللي طلعت روحك لين رديتها.
- عن القرقة، انا ياي ارتاح مو افتح مواضيع تنكد.
- محد منكد علي غيرك، خدعتني يوم تزوجتني وقلت لي انك ما تحبها وتكرهها ومتغربل معاها، وخذيتك على انك امطلقها، والحين تردها وانصدم فيك يا غدار.
- وبعدين وياچ، اروح اهناك قرقة وحنة، واهنيه قرقة وحنة؟
- الا مستأنس وطاير بالسما هناك.
- انتي اشقاعدة تقولين؟
- اقول، لا اتيي عندي ولا تقرب يمي، مو آنا اللي تخدعها وتقص عليها، مثل ما آنا خذيتك وما عندك زوجة على ذمتك، روح رجعها لبيت اهلها اللي يت منه.
- انتي مينونة؟ وهاليهال اللي عندها اشذنبهم؟
- اي حط عذرك بهاليهال.
- انتي اشتقصدين؟
- اللي أقصده اتعرفه، ومن اليوم وطالع ما بيك تدش داري، نام بالسطح ولا ابي اشوف ويهك.
- بالسطح ابهالبرد، تبيني اموت، ها؟ ما قول الا طيح الله حظ اللي يابكم عنده اثنينكم!
في الديوانية:
- فهد شخبار الحرمتين معاك؟
- ها؟! ماشي الحال، كل شي تمام، آآتسووو، الحمد لله.
- يرحمك الله.
- يهدينا ويهديك الله.
- چنه فيك افلوانزا؟ ههههه.
- ها؟ اي، حايشني برد.
- شكلك كل ما تروح لوحدة فيهم اتدللك ابصوب، شنو تبي؟ وشنو تامر فيه؟ وياعيني عالجو، هنيالك ياعم.
- اي تدري بعد، الحرمة لما تغر من الحرمة الثانية، تحاول تتنافس معاها على رضا الزوج، وكل ماروح حق وحدة فيهم، اتفنن لي ابكل شي، اللي اتهمزني واللي اتدلكني، وعايش الحمد لله بنعيم، آآتسووو، الحمد لله.
- يرحمك الله، اي واضح، واضح ههههه.
- يهدينا ويهديك الله.
- بس عاد ها، حط بالك على صحتك هههه.
- اي بعد شنسوي، يا معود عندي بيتين.
في المستشفى:
- يا بعد عمري عليك يابو عيالي، زين ما صار فيك شي ابهالحادث.
- ياعل يومي قبل يومك هذي عين ما صلت عالنبي.
- آآه، هذي عيون الربع اللي بالديوانية، كل واحد حاط عينه علي عشان عندي حرمتين، ما يدرون بالبلوة اللي آنا فيها.
- بلوة؟ ما نقصد فينا؟!
- أقصدكم انتو الثنتين، وكلكم عمات عين، من صار فيني افلوانزا والكل حاط عينه علي، لين قمت اعاطس وماشوف دربي بالسيارة جان أعدم الشبه، آآه يا ظلوعي.
- لا تقول آه يا حبيبي چنها سيف بقلبي هالكلمة، ظهرك يعورك صح؟
- ياعل السيف اللي يقص قلبچ، شيلي ايدچ عنه ياللي ما تستحين.
- كيفي، مو زوجي وحلالي، لازم اسمي عليه وارقيه من عين الحسود.
- الحسود انتي يا هدامة البيوت، الحين بشيل هالكرسي واكسره فوق راسچ.
- شنو؟ ما بقى الا انتي؟ آنا اللي ببط راسچ ابهالطاولة اللي يمي.
- بس، بس يا حريم النكر، ذلفوا برة، ما وراكم الا الشقى، انتوا الظاهر ما راح تتسنعون الا لما احط الحرمة الثالثة على راسكم، صبروا بس لما اطلع من المستشفى، وراح اتشوفون العروس اللي اتطيح الطير من السما!
- شنو، حرمة ثالثة بعد؟ ياليت الشبه طايحة على راسك ومفتكين منك.
- وعساك ما تقوم بالسلامة، وتنكسر ضلوعك، ضلع، ضلع، الشرهه علينا اللي امجابلينك من الصبح.
- طلعوا بره، آنا براويكم اللي سويتوه فيني من قبل، مارديت لكم الصاع صاعين؟!
- اي هين احنا والا انت؟!
- مروة، انتي ياية بسيارتچ والا مع اهلچ؟
- لا ابسيارتي.
- وصليني معاچ، للبيت!
شي ما شفتوه:
- ها، فهد اشلونك مع الحرمة الثالثة اليديدة؟ سولف لنا اشسووا الحرمتين معاك يوم دروا عن زواجك؟!
- يقول المثل، وداوها بالتي هي الداء، ههههه آتسووو، الحمد لله.
- يرحمك الله.
- يهدينا ويهديك الله.
- عاد هالمرة الفلوانزا من وين يت لك؟ قاطينك حريمك بالبلكونة والا بالسطح هههه!
- لا عاد هالمرة غير، يت صح، ههههه.