أنوارعبدالرحمن
أزمة التأجير والسكن بالكويت، أصبحت الشغل الشاغل للأسر التي لم يخصص لها سكن من جانب الحكومة.. وما يزيد الطين بلة.. الشروط والقوانين التي يضعها بعض أصحاب العمارات.. ومعنا اليوم مشهد من مشاهد البحث عن سكن للتأجير..
لو سمحت ممكن أشوف الشقة أنا ومرتي اللي حاطين عنها اعلان
قبل لا تشوفها قولي أنت.. معرس وإلا عندك درزن اعيال؟
هههه لا مومعرس.. بس عندي نص درزن وانت الصاج.
عيل.. مالك نصيب يا الأخو.. هذي حق المعاريس بس؟
يعني المعاريس ماراح اييهم اعيال.
إذا ياهل واحد نطوفه عليهم.. أما إذا اثنين بنمسكهم الباب.. هذي شروط بالعقد يالحبيب؟
حشى.. احنا بالصين مو بالكويت
أقول منى.. امشي نروح نشوف الدور اللي قرينا عنه اعلان ذيك المره.
أمري لله.. أمش
ممكن نشوف الدور يالأخو
انتوا ماقريتوا.. إن احنا مانقبل إلا أجانب
أجانب؟.. واحنا اشفينا يالكويتيين؟
وتسأل بعد اشفيكم؟.. اشياب لياب .. ههههه
الحمد لله والشكر
عيسى خلك عنه.. أنا قالت لي رفيجتي عن دور يم بيتهم خنشوفه
امشي.. وبنشوف آخرتها وين بنسكن؟
كاهو.. كاهو.. روح كلم الحارس
وين المعزب مالك
اكو داخل.. صبر شوي بابا
السلام عليكم آمر ياخوي
ممكن أشوف الدور اللي بتأجرونه؟
إي.. ممكن بس تعرف شنهي الشروط؟
لا.. تفضل قول
أول شي مثل ما انت عارف اني ساكن بالدور الأرضي.. وبيتي مثل ما انت شايف يديد.. يعني مابي امطامر فوق روسنا.. وتدقق مسامير وشي ينشدخ عالأرض وشي ينسحب.. وشي يطيح علينا من الدرايش.. كور وإلا اصحون وإلا الله العالم مادري شنو..
وبعد؟
السطح مو لكم.. فيه غرفة الخدم ملوتنا.. بس لكم ربعه صغيره فيه للستلايات
وبعد؟
وبعد الماي الحلو والصليبي عندكم بالحوش الصغير اللي لكم.. يعني ممكن ندخل حوشكم بأي لحظه.. ومخزن خاص لنا محد يفتحه فيه اغراض للبيت
وبعد؟
وبعد ادرام الزباله في الزاويه اللي عند مسفط السياره المخصص لكم.. مابي يتغير من مكانه.. ومابي اعيالكم يتوقفون لي عند بابكم ويسوون لي مدخل البيت ديوانيه..
في شي ثاني؟
إي.. أم العيال ماتحب احد يدخل عليها من المؤجرين.. يعني لا تكلف نفسها مرتك.. وتدرعم عليها
مرتي ماراح تدش عندها.. ولا حتى احنا راح نسكن عندكم.. وعليكم بالعافيه بالبيت اليديد
ليش يبا.. زعلت
لا.. مازعلت.. بس هونت مابي أدور لي سكن
عيسى.. قولي شنو قررت
قررت اسكن عند أمي
إي قول جذيه من أول.. هذا اللي انت تبيه.. لويصير اللي يصير ماسكن عند أمك.. أنا مينونه.. كافي اللي ياني منها أول
منوه.. حطي عقلج براسج.. يعني اشتبيني أسوي.. نأجر لنا بيت متنقل.. نسحبه ورانا بالسياره؟
شوف أنا عندي حل ثاني.. أخوي صالح توه شاري بيت.. وامسوي شقه في الطابق الثالث
قصدج بالسطح ياهانم.. ثلاث غرف.. وين تكفينا مع خمس يهال وواحد بالطريج.. وخدامتين بعد؟.. مو انتي تقولين ماتبين إلا دور كبير.. علشان يشيلنا؟
بس فتره بسيطه على ما نلقى لنا سكن ثاني.. اشفيك ماتفهمني؟
وانا يعني هذي مهنتي.. أشقل هالعفش من مكان لي مكان.. وبعدين أخوج صالح تارس بيته بهالحمام والطيور.. والدياي.. حتى الفريج مستاذي منه
انت اشعليك منهم.. واحنا أصلاً بنسكن عنده بفلوس مو ابلاش
شوفي عاد.. أخوج هذا أنتي عارفته حتى لو بيرضى.. ماراح يسكنا إلا لما يلاقي ورى هالشغله خدمات
ليش تسيء الظن أنت.. خلني أدق.. وشوف اشيقول
أنا ما قول إلا.. إذا ما طاعك الزمان وإلا طيعه.. دقي دقي.. ربي يصبرني على بلواي.. بس من الحين أقولج.. إذا قام أخوج يتفلسف ويحط علينا شروط.. وطلبات.. من الحين أقولج ماراح أسكن
ألوو.. صالح.. شخبارك بعد عمري ولهانه عليك.. بغيتك بموضوع..
شي ماشفتوه
الله يغربل ابليسك.. ياخوي صالح.. تنتهز فرصة حاجتنا لهالشقه.. لو يدري ريلي انك حاط علينا هالشرط.. ويشوفني الحين وأنا بـ...
منووووه.. هذي آخرتها.. بعد قمتي تطيرين حمام من وراي؟