أنوارعبدالرحمن
هل «الوردة الحمراء» التي طلبها الطفل أنس من والديه هي أساس المشكلة التي حدثت بينهما، أم الموضوع «فيه إنه»؟!
- يبا.. يما.. شوفوا الرسمه اللي رسمتها اليوم بالصف.. الأبله كانت تشرح جان أرسمها وارسم نفسي وأنا أجاوب.. ومحد يرفع إيده إلا أنا.. جان تعطيني هديه.. وقالت لي أنس أنت أحسن واحد بالصف.
- هو.. هو كل هالقصه بالرسمه هذي.. وبعدين جم مره أقولك انتبه للشرح، مو قاعد اترسم لي ابهالأبله الهوله!
- يما.. أبله شروق حلوه مو هوله.. وتستانس إذا رسمتها.
- إي طبعا بتستانس.. مو لاقيه احد يعطيها ويه من شيفتها.. غير هاليهال.
- انتي اشفيج على الولد.. خل يرسم اللي يبيه.. حتى بهالسالفه بتتدخلين؟
- انت اللي لا تتدخل.. انت موشايف ان الولد صارت الأبله عنده أعز من أمه.. ولا مره قالي يمه أنا رسمتج.. أو انتي وايد حلوه.
- أمبلا يما أنا رسمتج يوم نروح حديقة الحيوان وانتي واقفه يم الزرافه.
- شفتي اشلون الولد طلع بريء.
- اسكت انت ولا تتكلم.. يعني مستانس من رد ولدك.. هاا؟!.. شوف يا أنوس إذا شفتك المره الثانيه راسم هالجيكره أبلتك شروق.. بكوفنك.. واعطيك جم راشدي يمكن تصحى من بعدهم واتسنع من وراهم.
- ابله شروق مو جيكره.. موجيكره.. موجيكره.
- شفتي اشلون يعني لازم يحرجج الولد.
- صك حلجك انت بعد.. الظاهر العيون الزايغه هذي في جيناتكم.
بعد ثلاثة أيام:
- يما.. أبي ورده حمرا.
- ليش.. اشعندك أنوس؟
- أبيها حق وحده من أبلاتي عشان كانت غايبه يومين.
- أي أبله هذي اللي كانت غايبه لها يومين.
- ممم مادري.. ماعرف اسمها.. نسيت!!
- ابله شروق.. صح؟
- إي صح.
- ترى ما صارت أبله شروق هذي كل ما كحت كحه.. رحت وشريت لها هديه.. بس الظاهر السالفه مهي منتهيه.. ولا احنا خالصين.
- اشفيج أم أنس اتصرخين عالولد.. عسى ما شر؟
- تعال شوف هالقراده اللي احنا فيها.. الولد قام يطلب اورود حمر بعد.. الله يستر.. يقول أبلته شروق كانت غايبه لها يومين.. وبيعطيها ورده حمرا.
- أفااا..أنوس حبيبي اشفيها ابلتك شروق غايبه، عسى ما كانت مريضه وايد؟
- يبا.. قالت لنا كانت منشوله.
- يا عسى النشله اللي يتها اتيي لعدوها.. لا ما تشوف شر.. لا ما تستاهل
- أقول بو أنس ليش ما توديلها بعد انت ورده حمرا.. وانخلص مره وحده؟!
- هاا؟.. اممم والله فكره.
- جذيه يعني؟!.. أنا بشوف كلمتي وإلا كلمتك تمشي ابهالبيت.. ماكو ورده حمرا.. ولا أي هدية بعد اليوم حق هالأبله، بس خل اتخلص السنه، ان ما نقلت ولدك حق مدرسه ثانيه.. ماكون آنا.
- لااا.. مابي.. مابي.. أبي مدرستي اهئ اهئ اهئ.
بعد ساعتين:
- انس حبيبي.. تعال ابي أكلمك اشويه.. بس لا تقول لأمك.
- شنو يبا؟
- تبي ورده حمرا.. حق ابلتك شروق الحلوه.
- إي أبي.. بس امي كله اتقول عنها هوله.. وقالت لي إذا عطيتها شي بطقك.
- حبيبي تطمن دام قالت عنها هوله.. اكيد يعني حلوه.. ولا تحاتي سالفة أمك.. انت باجر روح للمدرسه.. وأنا الصبح بيي مدرستكم وبعطي الورده الحمرا لأبلتك شروق بيدي.. وبقول لها هذي من أنس ولدي.
- مشكور يبا.. انت أحسن أبو بالدنيا.
- إي أكيد.. يا وليدي «الذيب.. ما يهرول عبث»!
شي ما شفتوه:
- أبله شروق اشلونج؟.. هذي الورده من ولدي أنس حقج عشان غبتي.
- وي بعد قلبي على أنس، دايم يحرجني، يا حليله يهبل باسم الله عليه.
- باسم الله عليج انتي.. محد مهبل وليدي إلا انتي.
- نعم.. بو أنس قلت شي؟
- لا ما في شي.. بس أقول أنا عرفت ليش ولدي ما يغيب عن المدرسه هههه.. بس بسألج سؤال يا ليت اتجاوبينه ابصراحه؟
- لا ما في مشكله.. تفضل اسأل.
- امممم.. انتي ما تعطين دروس خصوصيه بره المدرسه؟!
- ليش ولدك انس وايد شاطر ما يحتاج له ادروس خصوصيه.
- إي.. هذا البلا!