أنوارعبدالرحمن
«العيال كبرت» يا جماعة!.. توقعوا اي سؤال غريب او محرج يأتيكم من ابنائكم الذين بدأت عليهم علامات النضج، واستعدوا للاجابة عليها بطريقة تستوعبها عقولهم.. والا اشتروا لهم «ديك.. وديايه»..!
- يمه انتي ابوچ شنو اسمه؟
- عزوز.. اشفيك؟.. انا ابوي اسمه فايز، والا اتسوي نفسك ما تعرف اسم يدك؟!
- انزين.. عيل انا ابوي ليش اسمه محسن؟
- بعد هذا اسم ابوك.. شنو تبي اتغيره؟!
- ليش.. مو ابوي يصير ابوچ؟
- عزوز حبيبي.. ابوك اهو زوجي.. مايصير يكون ابوي.
- يعني اشلون؟
- يعني يوم تزوجت ابوك.. يبتك.. وصار ابوك.
- اي.. يعني كل ابو.. وام.. يصير عندهم اعيال مثل الديك والديايه صح؟
- صح.. شفت اشلون انت ذكي.
- لان المدرسه علمونا چذيه.. بس يمه ليش الديك ابروحه يتزوج ديايات واااااايد.
- بس اسكت لا يسمعك ابوك.. ابروحه موناقص ينون!
بعد ساعه
- يبا.. اشلون تزوجت امي؟
- خطبتها من اهلها.. وسوينا عرس.
- بس الديك والديايه ما يسوون عرس.
- اي ياولدي امريحين نفسهم.. بس شقولك.. هذا من عاداتنا.
- عيل ليش الديايه تبيض بيضه ويطلع منها فرخ صغير.
- مثل امك يوم احملت فيك وطلعت بيبي صغير.
- وانا اشلون طلعت من البيضه؟
- اي بيضه؟!
بعد ساعتين
- يبا.. انت ليش كله تـ..
- يا مدام.. تعالي ردي على اسئلة ولدچ.. الظاهر الواحد ماراح ياخذ راحته ابهالبيت.
- عزيزان حبيبي.. شنو عندك؟
- ابوي ليش كله...
- ليش كله شنو؟
- يعني بعد تبين اتحققين معاه؟.. سكتيه اسئلته صارت اكبر من عمره.
- خلني ارد عليه على قد عقله.
- واذا توهقتي وماعرفتي اتردين.. اشلون بتوصلين له الفكره.
- الولد كبر، وقام يفتح اعيونه عالدنيا اكثر، لازم ارد عليه بمستوى سنه والا ماراح يرتاح.
- يما.. انا كبير افهم.
- باسم الله عليك حبيبي.. اي ادري انت كبير.. انزين اسأل اش عندك؟
- اقول جدام ابوي؟
- اي قول..
- ابوي ليش كله يقلد الديك؟
- اسكت ياولد لا قص السانك.. روح لدارك احسن لك.
- اشفيك عصبت عالولد؟
- ما تسمعينه؟ كل ساع امشبهني بالديك.. ويشبهچ بالديايه، صرنا حظيرة دواجن.. من هاللي يعلمونه بالمدرسه.
- يبا لا اتصرخ علي اهئ اهئ اهئ.
- شفت اشلون خليته يبجي؟!.. خلاص حبيبي روح نام.. باچر كمل علينا اسئلتك.
شي ماشفتوه
بعد يوم.
- يبا.. بسألك سؤال.
- ولييين ردينا على طير ياللي.. قول اشعندك بعد؟
- يبا.. انت ديك؟
- يارب صبرني على اسئلته.. اي ديك.. بس فكني.
- علشان چذيه تحب تصير مثله.
- اي احب.. ما خلصت اسئلتك؟
- وتصير عندك زوجات واااااايد مثله؟
- ها؟!!.. ياليييت الله يسمع منك.. مو آنا موقاهرتني الا هالسالفة.
- شنوووو؟!
- احم.. لا مافي شي.. بس ولدچ كبر وقامت تعجبني افكاره.
- الحين قمت افكاره تعجبك.. ها؟
- يمه.. انتي ديايه؟
- اي.. ديايه.. دام ان ابوك ديك!
- عيل اشلون تـ...
- بس.. بس.. بس لا تكمل.. حبيبي شكلها السالفة بتدخلنا بالعميق.. اشرايك نوديك سوق الحمام.. نشتري لك ديك.. وديايه؟!