أنوارعبدالرحمن
عندما تجتمع النساء عمّ يتحدثن؟!.. هذا مقطع من حديث دار بين بعض الصديقات، اجتمعن في منزل احداهن..
- تسلم ايدچ مريوم على هالعشا الحلو.. ماقصرتي الصراحه
- افا عليكم.. انا ماصدقت بس اتيمع معاكم.. ونستانس.
- تسلمين حبيبتي.. ماقلتي لنا طبق حلو المنجا منو امسويه.
- هذي خدامتي.. ماشاء الله عليها.. لما اعلمها شي.. تضبطه على طول.
- ذكرتيني بخدامتي اللي اذلفت الله يغربلها.. قالت بترد واكشتت فيني.. عاد ذيك طباخها روعه.. مامرت علي وحده مثلها
- هذي مشكلتنا معاهم اذا سافروا مثل هالخدم اللي شايلين البيت والمطبخ.. تلقينا حاطين ايدنا على قلوبنا.. ماندري يردون.. والا لأ.
- شنسوي بعد؟.. وين نقدر نستغني عنهم؟!.. صاروا اهم ايدنا.. واهم ريلنا.
- على قولتهم.. الخدم شر لابد منه.
- اي.. صدقتي.
- تعالو بنات.. على طاري العشا.. تذكرون العشا مال الفندق.. اللي بعرس شذى؟
- عاد ذاك العشا ماينسى.. الصراحه صچ اهل العروس مكلفين نفسهم وايد على حفلة بنتهم.
- سمعت ان العروس بتسافر ويا ريلها.
- الله يهنيهم.. والفال حق اختها وفاء.. صايره اتهبل بالعرس.
- انا لاحظت عليها هالشي من يوم انفصلت عن ريلها.
- شنو؟.. انتي من صجچ؟!.. انفصلت وفاء عن ريلها؟!.. متى؟
- يعني ماتدرين؟.. صار لها چم شهر.. مسكينه.
- ليش يعني مسكينه؟
- هالريال اللي يننها.. مومخليها ترتاح.. كله هادها ومسافر.. ومايدري عن البيت.. ولا يصرف عليها.. ولا يدري عن اعياله.
- انتو تعلموني بوفاء.. انا كنت معاها بصف واحد ايام الثانويه.. شايفه نفسها.. ولسانها طويل.
- ويه.. منيره ما عندچ سالفة.. شخباري ايام الثانويه؟!.. الاول تحول.. وفاء مو ذيك الاوليه.. كسرها زمانها.
- اهي وين تشتغل؟
- كانت تشتغل بحضانة اطفال.. بس الحين بالجامعه تكمل دراستها.
- ياحليلها.. زين لها خلق.. انا لو منها مافكر كلش بعد هالعمر
- انا اقول بالعكس.. زين سوت.. تحسن من مستواها.. وتشغل نفسها.
- اتصدقون عاد.. حتى مرت حماي قاعده اتكمل دراستها الحين.
- واااي.. بس الله يعافيكم مابي اسمع سيرة الدراسه كفايه هاليهال اللي اندرسهم بالمدرسه.. وغير اعيالنا اللي بالبيت.. مافي كثر الأبلات يحتاجون سفرة راحه واستجمام.. عقب مغثة المدرسة.
- على طاري السفر.. وين ناوين عالسفر هالسنه؟
- انا.. من قرادتي ماراح اسافر.. بسبة ديون هالبيت قطيعه!
- انا بروح مصر.. مثل كل سنه.
- انتي من صجچ مريوم؟! ماشبعتي من هناك.. وهالخليجيين اللي تارسينها.
- بروح حق شقتي اللي شؤيتها العام.. واذا لقيت احد من اهلي والا اهل ريلي.. بياخذها.. اغير اتجاه رحلتي.
- وانت.. يالساكته شيخوه.. اش خامره عليه هالمره.. ماراح اتقولين لنا هالسنه وين بتسافرين.. والا مثل كل مره.. بتخلينها بسكات؟!
- انا؟!..ترى ظلمتيني بكلامچ هذا.. انا وريلي دايما نقرر على آخر حزه.. تلقينا نفكر.. ونقرر ونحجز من باچر.
- مريوم.. صبي لنا شاي.. خاليتصرف هالعشا من بطنا.. كلينا اليوم اكل خربتي علينا رجيمنا.
- عليكم بالعافيه ههههه.. الشاي والقهوه جاهزين.
- ماعندكم شاي اخضر؟
- امبلا.. الحين اسوي لكم.. تامرون امر.
- تسلمين بعد قلبي.
- هالايام الجو يهبل.. روعه.. خصوصا اذا شبينا الدوه وحطينا الشاي واللومي.. والكستن.. ياسلالالام.
- اي والله.. انا ما استغني عنه كلش من يدخل الشتا.
- عشان چذيه اقول لكم حددوا يوم نتيمع في شاليه سميرة ترى اعيزت واهي تعزمكم وكل وحده فيكم اتنحش.
- وااي مالنا خلق الصراحه نروح عندها.. من ندخل لين نطلع بس اتكلم عن شهاداتها ودوراتها.. واعيالها النابغين وريلها اللي بيصير بعد چم سنه وزير!
- انتوا عارفين طبعها.. سمعوا من هالاذن وطلعوا من هالاذن.. المهم نلبي دعوتها.
- تعالو بنات.. منو عندها رقم تيلفون ام جابر اللي اتسوي حلو.. عندي يمعة حمولتي هالاسبوع.
- انا عندي رقمها.. بس تراها غاليه وايد.. وما عندچ سالفة اذا بتشترين منها حق حمولتچ اللي ما يستاهلون.
- صاچه.. عيل ابرايكم من وين اشتري؟
- انا اسوي لچ ذاك الحلو.. الكيلو على خمس دنانير.. احسن من اللي اتسويه ام جابر.
- من صجچ شيخه؟!.. انتي بعد قمتي اتسوين حلو؟
- اي.. بعد.. هوايه واحبها.. وقمت ابيع من فتره.
- حركااات شيوخه!.. عيل ابي 3 كيلوات حطي لي فيها 3 انواع حق يوم الخميس.
- خوش.. تم.
- چم الساعه الحين بنات؟.. نسيت ألبس ساعتي.
- امممم الحين الساعه 12.
- ابيييه.. ياويلي من ريلي.. الحين.. بيزفني زف.. انا قلت له الساعه 11 اكون بالبيت.. ياااحسرتي.
- اشفيچ.. اشوي اشوي منيره.. لا تطيحين على ويهچ.. كيفه .. انتي عذرچ معاچ.
- عاد اهو ما يصدق هالحچي.. مع السلامه.. مع السلامه
- منيره.. تعااالي.. اشفيچ؟... طاح جوتيچ!!
- هههه خليها.. خليها تروح بطبجه وحده.. صارت مثل سندريلا!
شي ماشفتوه:
- الو منيره.. اشصار معاچ امس مع ريلچ.. عسى ما سوالچ سالفة؟
- سكتي.. مادريتي.. من امس مانام.. يقول لازم اعرف وين طاحت طبجة جوتيچ!