أنوارعبدالرحمن
قبل أي خلاف يحصل بين زوجين، عليهما (تكسير احسابهم) لما سيترتب من مساوئ تعود على الأسرة، أما هذان الزوجان اللذان سيعرضان علينا جزءا من خلافهما، (فكسروا احسابهم) بطريقة أخرى مختلفة.. فما هي؟!
- يا مرة ما تعبتي؟ ما انهد حيلچ؟ ما تكسرت اريولچ؟ ترى هلكتيني وصلت حدي بس كافي، وانا أشاوط وراچ ابهالسوق.
- ما اتبطل حنه.. ترى طقت چبدي منك.. يعني اتبيني اشتري أي شي؟!
- انتي الحين مافي شي عاجبچ؟ كل بدلة تتفحصينها وتسألين عن خامها واخياطها ومن وين.. وأسئلة ماتخلص وآخرتها تقولين ها.. بدور يمكن ألقى اللي احسن منها.
- اسكت انت.. دام ماتفهم ابهالسوالف لا تناقشني.
- انزين آنا بفهم شنو عندي واش باقي لي بالرصيد؟ حضرتچ شريتي بدلتين وراح نص معاشي.. وامصممة تشترين أكثر.. ومو هامچ اللي معاچ.
- وانا شسوي على معاشك هذا اللي مايبقى فيه شي من أول الشهر.. آنا بعد لي حق تصرف علي.
- المصيبة انچ تدرين.
- أوووه ترى يننتني أنت.. طلع الفيزا واسحب راتب الشهر الياي دام ماعندك هالشهر شي.
- يعني مايكفيني اديون على ظهري.. ومصروف البيت والعيال وغيرها وغيرها.
- اقول امشي وانت ساكت لا اتفشلني چدام الناس..لا يقولون زوچها حافي ومنتف.
- أي حافي ومنتف هذا الصچ.. ليش ما اتطلعين افلوسچ هاللي امخزنتهم عندچ؟
- آنا مخزنة افلوسي يالظالم.. توني قاطة معاك على أثاث غرفة الضيوف!
- يعني آنا اللي بقعد بغرفة الضيوف؟.. يبا انتي امأثثتها عشان رفيچاتچ.. وتتباهين چدامهم ان أثاثچ أحسن من أثاثهم وأغلى.. وما راعيتي معاش زوجچ.. ولا مديتي اريولچ على قد الحافچ.
- أووف.. فكني بس فكني من هالكلام اللي اييب لوعة الجبد.. شخباري اللي يمدون اريولهم على قد الحافهم؟!.. الحين ماكو واحد فقير ولا حافي دام البنوك اتسلف على سنين اطويلة.
- قصدچ ان في واحد ومثله مليون.. مديونيين وحبل الدين برقبتهم، بيموتون ولا سددوا اللي عليهم ولا عاشوا حياتهم مرتاحين على قد مستواهم، علشان سفرة يونس فيها الهانم، أو سيارة أو أثاث وأمور مالها داعي بس نتباهى فيها چدام الناس.
- اتصدق آنا المينونة اللي غصبت اهلي اتزوچك، قلت لهم ميخالف فقير لكن راح يصير غني.. وطايح حظ.. بس في يوم بيوقف على ريله.. وشيفه بس احبه وحلو بعيني.. وطلعت امغفلة.. ولو امفكرة عدل ما انقردت فيك!
- شنو؟!.. محد منقرد فيچ غيري.. ولو امفكر عدل ماخذيت وحدة ما عندها احساس مثلچ وما يهمها إلا نفسها.. لا والمصيبة.. حاطة لها مؤخر يقص الظهر.
- إذا مو عاجبتك لهالدرجة وطايحة من عينك.. طلقني.
- اطلقچ؟!.. بهالسوق؟!
- إي.. الحين.. واحنا واقفين چدام هالمحل مال الجواتي.
- احم.. حبيبتي.. ماتبين اتشوفين لچ داخل المحل چنطة حلوة وراقية؟!
بعد دقائق (في السوق):
- ابي هالچوتي.. ادفع.
- اتفصل يا استاذ الحساب.
- ابي هالساعة.. ادفع.
- خذ الحساب الله يرضى عليك.
- أبي هالچنطة.. ادفع.
- بدفع كي نت.. بارك الله فيك.
- وأبي...
- الحساب صفر يا مدام.. تبين اتوديني ورى الحديد؟
- لا.. اشدعوه ماتهون علي.. بس ابي صمونة فلافل.
في البيت :
- حبيبي.. اش قاعد اتسوي، لك ساعة وانت ماسك الورقة والقلم وتكتب بهالارقام الغريبة؟
- قاعد اكسر احسابي.
- أي احساب؟
- بشوف هاللي دفعته عليچ عشان كشختچ.. على مدى سنة أو سنتين چم يساوي من قيمة المؤخر اللي حاطينه علي بوثيقة الزواج.
- شنووو؟!!.. تبي اتطلقني؟!
- يمكن يطلع أقل من هااللي صرفته عليچ من دم قلبي.. موناقص اديون اكثر.
- اشدعوه اتهون عليك العشرة.
- وانتي ايهون عليچ اللي اتسوينه فيني؟
شي ماشفتوه:
بعد شهرين :
- دفعي معاش الخدم هالشهر، مثل اللي دفعتيه ذاك الشهر، ولا تنسين السايق اللي بنييبه زهبي افلوسه.
- ان شاء الله حبيبي.
- ودفعي تصليح السنترال مال الطابق الأرضي.. صاير حار مادري اشفيه.
- تامر.. من اعيوني.
- ودفعي فاتورة موبايلي.. ماعندي افلوس.. ودفعي احساب ال..
- لحظة اشوي لحظة.. بكسر احسابي.
- شنو؟.. أي احساب؟
- لو اتطلقت منك.. چم بتدفعك المحكمة.. نفقة ومتعة ومعاش الخادمة والسايق.. والمؤخر.. وال
- بس.. بس.. بس
- شنو اشفيك؟
- حبيبتي اشرايچ انسافر لنا اسبوع أي بلد تختارينه.. انغير جو؟!