أنوارعبدالرحمن
اليوم نمر مرور الكرام على حالة خاصة تحدث في بعض البيوت، يقوم بدور البطولة فيها أبو ناصر وزوجته وأبناؤه، لنتابع معا هذه الأحداث..
- ناديه تكفين حطي لي ماي حار بنقع ريولي.. اليوم مشيت مشي بهالوزارة علشان أخلص معاملة الشركة وهم ما خلصت!
- ربي يعينك.. مادري متى بنفتك من هالركضة وراء المعاملات.
- يبا.. يبا.. أبي عشرة دنانير بروح اليوم العصر مع ربعي النادي.
- يصير خير.. بس وخر عني ترى مالي خلق أحد.
- يبا.. مو تنسى.
- شنو بطير آنا؟!
- تفضل بوناصر.. بس لا تحط ريلك الحين بالماي خل يبرد شوي.. وايد حار.
- أنا مارتاح إلا لما اعيالچ يذلفون عن ويهي.. الواحد من يدخل البيت ينطون بويهه مثل الينانوه.
- نصور.. سعود.. بدور.. كل واحد داره.
- يما.. ترى يوعانين.
- الحين نحط لكم الغدا.
- حطيلهم بروحهم.. قلت لچ مابي ازعاج!
- ميري.. حطي للعيال غدا بروحهم..
- عطيني الجريدة مالت اليوم.. فيها خبر عن الأسهم.
- شروفه.. وين الجريدة؟
- قطعتها.. فجوره.. شفتها بعيوني.. لا تقولون فجوره ياهل ما تسوي چذيه!
- لا حول ولا قوة إلا بالله
- يبااااا... يبااااا... شوف نصور يبي يطقني.
- نصووور.. ياويلك مني!
- يبا.. اهو اللي بدا.
- لا چذاااب.. اهو اللي بادي.. حذفني باللعبة اللي بيده.
- انزين.. انزين أراويك يانويصر.. الحين بقطع العقال على اظهرك
- يباااا.. يمااااا شوفو نصور.
- وخروا.. روحوا هناك.. الماي حاااار لا ينكت على أبوكم.
- آآآآآآآح... حرقتوني بالماي الحار.. يا عيال الـ....
- مو أنا.. مو آنا.. صدقني هذا نصور.
- عطيني العقال.. بسرعة.. بسرعة..
- لا يبا.. لا.. تكفى آخر مرة.
- تعوذ من الشيطان بو ناصر.
- طلعوا بره.. وخروا عن ويهي.. لا أخليكم تندمون طول حياتكم عاللي سويتوه.. يارب اش هالأذية.
- لا تعور قلبك على يهال يامعود.. ما يفهمون.
- سكتي أنتي.. أنا طلع لي قرون براسي منچ ومن هاليهال.
- اهئ اهئ اهئ يما.. يما.. فجوره كلت من صحني.
- مافيها شي هذي أختچ ياهل ماتعرف.
- ماااابي..مااااابي لا تقولون ياهل ماتعرف.. اهئ اهئ اهئ.
- أخذي بنتچ.. وحلي مشاكل عيالچ.. ترى الشر قام يتطاير من عيني
- انزين عاد لا تعصب!
- يباااا
- واحطبه!
- ترى سعود كسر الدريشة.
- أي دريشة؟!
- اللي بالصالة فوق.. كان يلعب كرة.. قلت له لا تلعب اهنيه.. وما رضى چان يكسر الدريشة.
- ياااااااربي.. شسوي فيكم.. تبوني أهچ من البيت !
- لا يبا أحنا نبيك.
- قلبي بيوقف منكم.. أنا بعد سنتين بس بتلقوني مع!
- تعوذ من أبليس بو ناصر.. اشهالكلام.
- لحظة.. لحظة.. آنا عندي حل.
- شنو؟
- ألو.. السفريات.. في تذكرة للقمر!
شي ما شفتوه:
- اشدعوه بوناصر زعلت علينا.. هذولي اعيالك مهما كان.. ومالهم غنى عنك.. وبعدين انت ابو البيت.. وبدونك ما يسوى شي.. كلنا بنضيع من بعدك وكلنا ما نتحمل.. فراقك وكلنا ما نتـ !!
- بس.. بس.. اش ناويه علي انتي؟.. بتموتيني من الحين!
- لا.. باسم الله عليك.. ييعل يومي قبل يومك.
- عيل هالكلام اللي قاعدة اتقولينه شنو معناه..
- امممم.. يعني.. امممم.. يعني.
- يعني شنو.. خلصيني؟
- يعني احجز لنا معاك.. للقمر!
- آآآخ.. من غبائچ.. ما دري أقول العلة في العيال.. وإلا في أمهم؟!.. رحمتك يااارب.