أنوارعبدالرحمن
محمد حضر ندوة، في مكان ما، وفي زمان ما، وفي حالة ما،.. ولكن ما الذي تركته في نفسه هذه الندوة!
- محمد.. يا خي اشفيك ما ترد عالتليفون.. في واحد ينام ثلاثة أيام؟!
- شسوي.. من التعب مال ذاك اليوم واللويه.
- أي ذاك اليوم؟
- إيه نسيت أقولك.. عن الندوة اللي حضرتها.. وصارت الصكه فيها
- عن شنو تتكلم؟.. من متى تروح أنت ندوات؟!.. لا يكون صرت مثقف وأنا مادري!
- ندوة مالت الدكتوره جورجينا!.. المهم اهي من منظمة حقوق الحيوان.. ويايه تلقي ندوه بحديقة الحيوانات.
- وأنت شكو بعد بهالسوالف؟
- قلت دام الحرمة طاقة طريج من سويسرا مادري بلجيكا.. خل نرحب فيها ونوريها كرم الضيافة العربية.
- يا سلام عليك.. يابو الكرم
- عاد أنا يبت معاي باقة ورد.. وصندوق فيه بخور ودهن عود علشان تتعرف على عطوراتنا..
- زين مادرت عنك الهانم.. جان شرشحتك هههه
- لا.. لا تخاف كل شي بالسر!
- عيني عليك بارده.. صرت شجاع هههه.. المهم كمل.
- أحم.. أحم.. إي طبعا هههه، المهم.. يوم وصلت حديقة الحيوان لقيت وايد ناس ناطرينها وكل واحد معاه هديته.. قلت كفو!!.. هذا الكرم وإلا بلاش.
- كمل.. كمل.. شكلها السالفه فيها إنه!!
- أول ما وصلت المبعوثة.. ما خلوها الجماعة تتحرك يمين ولا شمال.. الكل قام يقدم هديته ويسلم.. حرمة قدمت لها ثوب صلاة وسجادة.. وواحد من شعراء النبط ما قصر.. بيض الله وجهه جايب معاه قصيدة ترحيبية..
- وأنت.. اش سويت؟
- آنا؟؟... أنا يوم وصل دوري بعد هالطابور الطويل توني بمد إيدي أقدم الهدية.. وأسلم حالي حال هالناس.. مادري اشلون اهجمت علينا الحيوانات من كل صوب.
- من صجك؟؟!
- لو شايف اغبرت الناس.. اللي يركض ويصرخ واللي يدور له مكان ينخش فيه!.. أما آنا فكرت وين أروح!!.. قلت ماكو إلا أنخش تحت الطاولة.. وأول مرة بحياتي أشوف زرافة ترقص.. والشواذي تصفق.. والفيل ينقز!!
- شنو؟!!
- صدقني ياخوي.. اللي صار شي عمري ماشفته بحياتي!
- والدكتورة.. اش صار فيها؟
- الدكتورة ما تحركت من مكانها، بس قاعده تضحك على شكلنا وحنا انتطامر من كل صوب..
- أفاااا.. يا ذا العلم!
- والغريب في أمرها انها.. قامت تتجول بين الحيوانات وتحضنهم وتمسح على روسهم.. وتتكلم معاهم كأنهم يفهمون كلامها.. وتضحك بصوت عالي ولا في البال.
- ههههه.. زين سوت!!
- أنا ما صدقت اللي يصير جدامي.. صج؟! جذب؟!.. طاقه سوالف وياهم.. واحنا اللي خابين نفسنا.. ننهان جذيه!
- محد قالكم تخبون نفسكم.. وترزون اوجوهكم.. يعني ما تدرون انها يايه علشان الحيوانات؟
- أنا بيني وبينك.. حالي حال الناس.. قلت يمكن اتغير نظرتها.. واتجاه فكرتها.. وتهتم بحقوق البشر.. بلا حيوانات وبلا حشرات وهالسوالف اللي ما لها لازمة.
- يبا هذيله أجانب.. فكرهم ما يغيرونه لو شنو.. المهم كمل.. سالفه هالمسخرة.
- شقول.. شتكلم؟!.. أنا طول ما هي تسولف معاهم قاعد تحت الطاولة اتحلطم بيني وبين نفسي.. لين خلصت.. وراح كل حيوان لقفصه .
- وبعدين؟
- وبعدين يوم طلعت لقيت البوابة امسكرة.. أطالع مني.. ومناك.. وإلا أشوف بايب موقف على السور.. وصعدت فوقه.. وطبيت.. اهدومي اتشققت.. وتدمرت طين ورمل.. وظهري انكسر.. آآخ ياظهري
- زين سوت فيكم!
- وسوت أزيد
- شنو بعد..؟
- يوم نطيت من السور لقيت الحيوانات لاحقة الناس وتحذفهم بجواتيهم اللي طاحت من اريولهم! آآآخ يا قلبي
- هههه صج مسخرة.
- المشكلة.. قمت أنادي الدكتورة وما تسمعني عشان تشوف حالتي.. عيزت أناديها جورجينا.. جورجينا.. جووو
شي ما شفتوه:
- محمد.. محمد.. قوووم.. الساعه صارت 11 للحين نايم؟.. قوم عندك موعد في الطبيب.
- منووو.. جورجينا؟
- جورجينا.. منووو... هاااا؟؟
- آسف.. آسف.. كنت حلمان.
- حلمان؟!.. بوحده غيري؟!.. قوم غسل ويهك وخلنتفاهم، بعرف هالجورجينا أطلعت لنا من وين؟!
- لا.. انتي أول اعرفي اش حلمان فيه بعدين عصبي.
- شنو حلمان فيه.
- حلمت اني شايفها بحديقة الحيوان.
- بحديقة الحيوان؟ علينا؟!.. انزين قولي يا شاطر شفتها بأي قفص.. هااا؟!
- امممم بالقفص اللي يم قفصج خخخ
- انزين.. أراويك.. مصيرك بتنفضح واعرف سوالفك اللي تسود الويه.
- هههه.. خلاص خليني بكمل نومتي وماني رايح الطبيب.. عشان أتابع الحلقة الثانيه من حلمي، ولا تنسين اتسكرين الباب وراج عن ازعاجج انتي واليهال.
- شنووو؟!.. أيا الخاين إن ما وريتك النجوم بعز الظهر.. واحرمك من النوم!
- جوورجيناااا
- هاا.. وبعد اتقول اسمها جدامي؟!
- علشان اتعرفين.. حتى وآنا قاعد أنادي باسمها هههههه
- آآآآآه يا قلبي.. لحقيني يايمه!