أنوارعبدالرحمن
(ما تعرف خيري.. إلا لما تجرب غيري) مثل دارج قديم.. ينطبق على موضوعنا هذا اليوم..
بين الأم وسلطان:
- بطلقها.. يعني بطلقها
- يا وليدي ياسلطان.. تعوذ من ابليس.. بالتفاهم كل شي بينحل.
- يا يمه.. مريم كرهتني باليوم اللي تزوجت فيه، من خذيتها ماشفت منها شي زين، ومشاكلها ماتنتهي ويا الخدم ويا الجيران، وياكم انتو بعد، ولا تدري عن اعيالها كله هايته والبيت صاير سمردحه.
- يا وليدي اقعد معاها وقول لها اللي امضايقك يمكن تتسنع.
- يا يمه.. وينها وين السنع؟.. شوفيها مهمله بنفسها وكرشتها عشره متر لي جدام، وشيفتها تقطع الرزق.
- يعني الحين اشبتسوي يا وليدي ترى الطلاق موسهل؟
- قلت لچ بطلقها يعني بطلقها.. وماعندي أي كلام ثاني.
بين الزوجة والدكتور:
- يا دكتور نفسيتي تعبانة.. زوجي طلقني.. وانا ما قصرت معاه ابشي، ومعتنية بنفسي وبعيالي، وافلوسي تحت امره، ومادري شنو يبي أكثر.
- يا اختي صبري وربي راح يفرجها، اهم شي تعيشين حياتچ وتشوفين الدنيا بمنظار ايجابي، وتتأقلمين مع وضعچ اليديد وتتقبلينه بروح سمحة.
- يا دكتور انا أحبه بس ما يبين فيه، ماصار على طلاقنا شهر قام وتزوج من وحده ثانيه، جنه عذاريب الدنيا كلها فيني.
- لا تفكرين بهالطريقة، فكري بنفسچ واعتني بصحتچ، والحياة جدامچ.
بين الأم وسلطان
- سلطان.. مادريت عن مريم طليقتك؟
- شنو اشصاير بعد؟.. تراني ماواطن اسمع اسمها.
- اليوم اتصلت فيني أم سعود وقالت لي ان مريم تزوجت من واحد الله مرهي عليه ومركزه كبير في الوزارة.
- شنو؟ من صجچ؟!.. ماصار على طلاقنا سنتين.. تزوجت بهالسرعة؟!
- يا وليدي انت تزوجت عقب طلاقكم بشهر.. واهي توها اصغيرة.. وليش يعني ما تتزوج؟!
- آآه.. بموت من الحرة.. اشلون تزوجت وما فكرت بعيالها.. آآخ بشق اهدومي يايمه.. ما استحمل.
- باسم الله على عقلك ياوليدي.. اشدعوه جذيه.. انت اللي عفتها مو اهي.
- قص علي الشيطان يا يمه.. وما راح ألقى طول عمري وحده مثلها.
بين مريم وصديقتها:
- مريم.. ما تدرين اشصار ابسلطان يوم سمع ابزواجچ؟
- تكفين لا اتييبين له طاري.. خلاص أنا تزوجت من اللي يسواه ويسوى طوايف اهله.
شي ما شفتوه
بين سلطان وعياله:
- يا عيالي انتو طبعا تدرون ان امكم تزوجت وما فكرت فيكم ولا فكرت حتى اني في يوم يمكن أرجعها.
- بس يبا انت اللي طلقتها.. اهي كانت تبجي عليك.
- الحين مايفيد الحچي.. راح اللي راح.. بس بقولكم من الحين.. كلام يوصلكم ويتعداكم.. اللي اسمعه ينادي زوجها (يا عمي) بقص السانه وأعلقه في ارقبته.. نادوه باسمه.. جذيه حاااف.. هذا لا عمكم ولا أخو ابوكم، يخسى ويعقب!
- انزين يبا.. شنو انادي زوجتك؟
- هذا بعد يبيله سؤال!.. نادوها خالتي.. تخلخلت اعظام امكم وزوج امكم!