أنوارعبدالرحمن
أختنا ضيفة اليوم، ذهبت إلى الجمعية التعاونية لشراء بعض الحاجيات، فاستوقفتها مندوبة إحدى الشركات لتقدم لها عرضا تجاريا.
- لو تسمحي.. عندنا عرض على حفاظات البيبي، إذا حتشتري كيس حفاظات واحد بتاخذي معاها هديه شامبو للأطفال حجم متوسط.. وإذا حتشتري كيسين بتحصلي على هديه شامبو وزيت للجسم للأطفال حجم كبير.
- اممم انزين إذا شريت جيس واحد ممكن آخذ معاه الزيت مال جسم الأطفال؟
- لأ.. حتاخذي معاه شامبو للأطفال.
- انزين الشامبو اللي جاي مع الحافاظات ليش حجمه متوسط، ليش ما تعطيني الكبير؟
- هوه العرض جاي كده.
- انزين.. ليش مو حاطين الشامبو في كرتونته؟
- الشركه بتاعته هيه اللي عامله كده.
- مممم انزين.. ليش لون مغطاته متغيرة؟
- ياستي ده مع العرض بس.. وإذا كنتي عاوزه الشامبو بكرتونتوه وبشكلوه الأصلي اشتريه لوحده من الجمعية وخلاص.
- انتي يعني تبين اتطفشين الزباين؟
- أنا ما قلتش كده.. انتي اللي عماله تسألي عن شكل الشامبو اللي مش عاجبك.
- اممم انزين.. ليش الحفاظات اللي معاها الشامبو..بس حفاظات الأولاد.
- مين قالك؟.. حتى مع حفاظات البنات.
- وإذا خذيت ثلاث اجياس حفاظات شنو آخذ هدية معاهم؟
- بتاخذي 2 شامبو وواحد زيت للأطفال حجم كبير.
- اشمعنى؟.. وليش ما تعطوني معاهم 2 زيت وواحد شامبو؟
- يا هانم.. العرض جاي كده زي ماقلتلك.. دنا بس موظفة بالشركة.. مليش دخل باللي يتحط.
- وليش قاعدة تتكلمين جذيه؟.. آنا يايه اشتري مو أطر منكم.
- أنا ما قلتش كده.. لو انتي عاوزه كيس واحد والا اتنين والا تلاته من عينيه حديلك دالوقت اللي انتي عاوزاه.. بس انتي ما حددتيش ياستي انتي عاوزه ايه بالضبط؟
- آنا قاعده أفكر.. وأوزن الموضوع.. مو اشتري وبس.. ولازم أشوف شنو استفاد من هذا العرض.
- طيب خليني أساعدك.. انتي عاوزه الحفاظات دي للأولاد.. والا للبنات؟.. وأي حجم؟
- امممم.. وشنو يفرق في العرض؟
- ما يفرقش حاجة.
- اممم يعني نفس الشامبو.. ونفس الزيت المعروضين جدامي الحين.
- أيوه.
- جم سعرهم الأصلي؟
- سعر الزيت.. بالكرتونه بتاعته بدينار وخمسميه.. والشامبو بدينار وسبعميه.
- وليش الشامبو أغلى من الزيت؟
- ما عرفش.. هوه كده سعرهم.
- وبدون كرتون بجم يسوى؟
- أصلا هوه مايتباعش بدون كرتونته.. بس مع العرض جاي بدون الكرتونه بتاعته.
- اممم.. انزين إذا خذيت حجم صغير حفاظات.. أو حجم كبير..يفرق في نوع العرض.
- لأ ما يفرقش.. اللي بيفرق عدد الأكياس اللي عاوزه تشتريهم.
- وإذا خذيت حفاظات ولادي.. وبناتي؟
- على راحتك انتي عاوزه ايه بالضبط؟
- انزين.. مافي مع العرض هذا كوبونات سحب؟
- لأ.. مفيش.
- ليش موحاطين كوبونات.. ترى أغلب الشركات يسوون جذيه؟
- ماعرفش.. ليه.
- انزين.. مافي غير الزيت والشامبو يايين مع العرض؟
- لأ.. مفيش.
- ماعندكم سالفه.. انزين.. اقدر اشتري بس الشامبو أو الزيت اللي بالعرض بدون الحفاظات؟
- يا أختي.. الزيت والشامبو جايين مع العرض بتاع الحفاظات.
- اهاا.. اممم انزين جم يوم مدة هالعرض؟
- تقريبا اسبوع.
- آنا.. أبي بالضبط مو تقريبا.. لي متى هالعرض؟
- اسبوع بالضبط!
- وراح تقعدين ابهالمكان هذا عند قسم الأطفال؟
- ايوه.
- اممم انزين.. شنو الأحجام اللي عندج للحفاظات؟
- كل الأحجام.
- متأكدة.
- أيوه.. متأكدة.
- انزين.. امممم خليني أفكر.
- فكري
- الصراحة مادري شنو آخذ حفاظات للبنات والا للأولاد؟
- ايه يعني؟
- ها؟.. لا.. قصدي قاعده احسبها بطريقة خاصة.
- طيب عايزه انتي تشتري حفاظات لبنتك والا لابنك؟
- شنو؟! امممم.. أصلا آنا مومتزوجه ولا عندي اعيال.
- ايه؟؟!!
شي ماشفتوه:
- نهى.. سلمان.. حامد تعالوا عندي اهنيه ابسرعه
- شنو اشصاير؟
- شوفوا.. شريت هالحفاظات لعيالكم.. اشتروهم مني.. وعندي زيت وشامبو اصلي عليهم تخفيضات.. لأنهم يايين بدون كرتونتهم!
- هههه.. شنو قمتي اتاجرين الحين بالحفاظات.. ماتبتي بعد ما خسرتي بتجارة بواريك الشعر؟
- عن التطنز احسن لكم.. شوفوا شنو تبون لعيالكم.. والدفع الحين لو سمحتوا.
- من صجج انتي؟
- أي.. من صجي.. شااللي يمنع يعني.
- يعني انتي ماتدرين ان ما عندنا يهال يلبسون حفاظات.
- وسارونه.. وحماده.. بدور؟
- سارونه عمرها خمس سنين.. وحماده قاطعين عنه الحفاظات، وبدور بتدش السنه اليايه الابتدائي.. ياحجيه!
- يعني شنو.. هاا؟!
- يعني راحت عليج تجارة الحفاظات!
- أفااا؟! وآنا قاعدة ساعة أسأل الموظفة عن العرض لين نشفت ريجها.. وآخرتها محد فيكم راح يشتري مني، الحين وين بودي كل هالحفاظات؟!.. آآخ يالتجاره.. راحت علي افلوسي.. اهئ اهئ اهئ