أنوارعبدالرحمن
معلمتان تتناقشان حول عدة مواضيع ليست لها نهاية، ولكن عند الحصة الخامسة تتوجهان إلى الفصول كما طلبت منهما المديرة.
- حده ملاقه.. ما مدانا نستانس بالعطلة.. إلا وبدت المدرسة ولويتها.. وقفة الطابور من الصبح.. والطالبات المخالفين.. والوكيلة مع هالنفس الشينة.. والناظرة هاللي صايرة لا تهش ولا تنش.
- انتي كل يوم تتشكين؟.. احمدي ربج الناظرة مو من النوع الجايد.. وإلا لو انتي مجربة ناظرة مدرستي الأولية جان عرفتي اشلون ناظرتنا هذي مافي مثلها.
- هناء انتي لما تصير معاج الناظرة زينة تمدحينها.. ولما تصير معاج موشي تذمينها!
- أنا اعترض على بعض الأمور معاها.. بس ما تحلطم مثلج طول السنة.. هذا وانتي أبلة ألعاب.. الله يعين.
- الله يخليج في وحدة بهالمدرسة مو امكدشينها؟.. صرنا مطراش حق كل شي.
- ويعني إذا بتحلطمين شالفايدة.. بتغيرين شي؟!
- الظاهر انج ما تدرين أن اليوم اطلبت الناظرة منا انفتش الطالبات بالصفوف.. واجناطهم.. وأدراجهم.
- امبلا.. أدري.. مو أول مرة.
- ياليت قلبي بارد مثلج.
- حسديني بعد..!
- المهم.. شوفي الرزنامة اللي عندج.. متى أقرب عطلة بتيينا؟
- امممم.. بعد شهر ونص.
- ويه.. وايد.. بعد شهر ونص.. الله يكون بعوني.. أف!
- على طاري العطلة اللي طافت.. تدرين اني ما طلعت.. لارحت ولا ييت.. امجابلة البيت وهالتلفزيون أقلب ابهالريمونت من محطة لمحطة.
- انتي من صجج امجابلة التلفزيون.. شنو فيه يوَنّس؟!
- يعني.. أتابع مسلسل كويتي على قناة الكويت.. والثاني في قناة دبي.. وأشوف اشصار بهالستار اكاديمي.. وجم برنامج بجم محطة.
- وااي حدج اتضيقين الخلق.
- سكتي.. أنا أطالع هالمسلسلات واتحلطم.. أغلب القصص مو من واقعنا.. وبعدين هالممثلات هاللي كل وحدة امبدعة ابروحها.. صايرة اتخرع من هالعمليات والمكياج الفضيع.
- أنا من زمان ما تابعت شي بتلفزيون الكويت.
- أما ستار أكاديمي.. ابيييه.. هاللي قاعد يصير بينهم صج وإلا تمثيل؟!
- لا.. صج.
- ابيييه شي عجيب..
- الظاهر ما شفتي ذاك البرنامج اللي يعطي كورسات للبنات والشباب وبعدين يزوجونهم من بعض!!
- عاد انتي لو تطلين على دار بنتي... بتشوفين العجايب.. مابقى صورة ممثل ولا مغني إلا ومعلقته بكبتها وبطوفتها.. أقول لها الله يغربل ابليسج مابقى مكان إلا وحاطة فيه صور.. يا بنيتي الملائكة ما تدخل دارج.
- عاد آنا بنتي هوايتها غير.. اتيمع المجلات والصفحات الفنية وامسوية لكل فنان واللي بستار اكاديمي ملف خاص عن حياته وأعماله.. أهاوشها وماكو فايدة.
- يامعودة، كيفهم.. يوم كنا بسنهم.. كنا نسوي نفس الشي.
- بس اتصدقين.. آنا بعض الأحيان يأنبني ضميري لأن ربي راح يحاسبني إذا ما فهمتها الأمور هذي صح.
- الله يحفظهم.. ويستر عليهم من هالدنيا اللي تخرع.
- هناء.. جم بقى على الحصة الخامسة.. عشان موعد التفتيش؟
- بعد عشر دقايق.
- عيل آنا بشرب لي قلاص شاي حار الحين.. قبل لا تعورني بلاعيمي من الصراخ على البنات.
- صبي لي معاج الله يعافيج.
شي ما شفتوه:
- أبلة سامحينا.. وايد بنات يايبين مثلنا.
- على شنو انسامحكم؟.. عين قوية بعد!.. ماتقولون لي وين أهلكم هاللي امخلينكم امجابلين هالستار أكاديمي وكل وحدة حاطتلها ملف اصور، يعني هذولي اللي بيمثلون لكم قدوة، ياليت تنتبهون لدراستكم احسن.
- أبلة.. خلاص قلنا لج سامحينا..
- أنا أقول الشرهة مو عليكم..لكن على أهلكم!!!