أنوارعبدالرحمن
«شاندرا» خادمة مخلصة، تؤدي عملها كما تطلب منها «المعزبة» داخل المنزل، واليوم كان لها موقف ليس بجديد عليها مع الابنة الصغيرة لتلك الأسرة.
- أبي أمي.. وين راحت؟.. أبيها، اهئ اهئ اهئ.
- ليش انتي يبجي؟.. ماما راهت هفلة عرس.. انتي لازم الهين ينام.
- مابي.. مابي اهئ اهئ اهئ
- هبيبتي.. انتي بنية هلوة لازم يروه اسكول باچر صبه.
- عيل.. قصي لي قصة حلوة.
- كان يا ما كان.. في بنية هلوة واااچد.. يروه اسكول كل يوم وكـ..
- مابي هالقصة.. اهئ اهئ اهئ.. ابي غيرها.. شنو كل يوم اتقولينها لي؟
- والله انتي واچد مشكل.
- ابي قصة يديدة كيفي.
- ممم.. كان ياما كان.. في ولد واااچد زين.. يسوي هوم وورك كل يوم و..
- مابي هالقصة فيها ولد مو حلوة.. ابي قصة عن ابنيه اهئ اهئ اهئ
- انتي لازم يسمع هبيبي قصة، ما يصير كل دقيقة يبچي.
- قولي لي غيرها، أبي عن البنت اللي راحت المدينة الترفيهية.
- ما يعرف آنا هبيبي.
- انزين قولي لي عن البنت اللي شرت لها أمها لاب توب، تشبك فيه.
- شنو يعني ناب سوب؟
- لاب توووب ياللي ما تفهمين .. اشفيچ انتي ما تسمعين عدل؟.. هذا مثل اللي عند أمي وأبوي.
- ما يعرف هبيبي هذي قصة، ياااربي.. لازم انتي نوم الهين واچد أكر ساعة، ماما بعدين تسوي مشكل حق آنا.
- مابي.. قولي لي قصة.
- خلاص.. آخر مرة آنا يقول قصة.. كان يا ما كان في بنية هلوة يروه مع فريند هق هديكة هلوة..
- شنو اسم هالحديقة؟
- ما يعرف هبيبي.
- مابي.. غصبا عليچ اتقولين لي شنو اسمها.
- اممم هديقة مال هيوان..
- وبعدين؟
- وبعدين هوه يشوف أسد وبكرة وحمارة وتيسة..
- شنو يعني بكرة وحمارة وتيسة؟.. تبين أقول حق أمي انچ قاعده اتقولين لي كلام وصخ؟
- لا هبيبي آنا ما يقول كلام وسخه.. هذا هيوانات قول.. باااع.. باااع.
- وبعدين؟
- وبعدين يشوف زرافة..و هو
- شاندروه.. ليش لابسه شباصتي يالبواقة؟
- وين؟
- كاهي ابشعرچ.. شنو ما تدرين يعني؟.. انتي تستعبطين؟
- سوري.. سوري.. آنا ينسى هبيبي.
- انزين.. كملي، شنو صار بعدين؟
- بعدين.. بنية روه مع فريند يلعب ويستانس، وبعدين.. خخخخ.
- شاندرا.. شاندرا..
- خخخخ.
- شاندروه.. قومي اشفيچ نمتي؟
- خخخخ.
- شاندروووه.
- ها؟.. انتي ماكو نوم؟
- لا.. قومي كملي القصة.. وإلا ترى بقول لامي انچ نمتي وخليتيني بروحي أطالع سبيس تون.
شي ماشفتوه
- يما.. أمس شاندرا قصت لي قصة حلوة أقولها لچ؟
- قوليها، بس ابسرعة.. وراي شغل بسويه للدوام.
- كان يا مكان.. في بنية هلوة يروه مع فريند هق هديكة..
- هااااا..؟