أنوارعبدالرحمن
شيخة امرأة مثقفة تتابع بعض البرامج المفيدة التي تعرض على شاشة التلفاز أو في الراديو، واليوم فتحت موضوع للمناقشة بينها وبين صديقتها منار.
-
منار.. اتصدقين أمس كنت قاعده أتابع برنامج حق أوبرا، وتكلمت عن موضوع خلاني أحس بالثقة بنفسي وأرجع عشرين سنة للورا.
-
وااااو.. عن شنو الموضوع عشان أرجع بعد آنا عشرين سنه للورا ؟!
-
لا.. انتي يبيلج ترجعين ثلاثين سنه للورا هههه.
-
جذيه يعني؟! الشرهه عاللي يسألج.
-
بس خلاص كسرتي خاطري بقولج.
-
قولي تقلقلت اظروسج يا شيخوه يالعيوز!
-
سمعيني.. تقول اوبرا انها يوم قرب عمرها يصير خمسين سنة حست انها اكبرت.. وانها بدت بالعد التنازلي، وان هذا العمر يسمونه منتصف العمر، اشلون تحتفل مثل كل سنة في عيد ميلادها.
-
هههه خمسين سنة يسمونه عندهم منتصف العمر؟!.. عيل احنا عندنا الثلاثين اهو منتصف العمر!
-
هذا بالعلم يسمونه جذيه، افهمي الكلام.
-
انزين كملي يا أم العلم والمعرفة.
-
تقول انها اقعدت اتفكر بينها وبين نفسها ان يمكن ينطفي نجمها وما تقدر تبدع مثل أول في برنامجها اللي يشوفونه الملايين.
-
أهاا.. عشان جذيه اطلعت في برنامجها من مدة، علشان بتطلع ابفنتق، وهي لابسة روب الحمام الأبيض، وشعرها يقطر من الماي هههههه.
-
سمعيني ولا اتقاطعيني.
-
كملي.. يا صديقة أوبرا!
-
تقول انها قامت اتقابل حريم وايد مروا ابهالسن وكان عندهم نوع من اليأس خاصة ان بعضهم صاروا جدات، وعندهم احفاد، وان مكانتهم في العائلة صارت مو مثل أول، بين أعيالهم ووظيفتهم كأمهات ومربيات.
-
عيل ختشوف عندنا اهنيه بعض الحريم صاروا يدات وعمرهم ما صار حتى أربعين سنه!
-
مو قلت لج لا اتقاطعيني؟!
-
شسوي لج؟!.. قاعدة تتكلمين على راحتج وفي برود تااام، خلصيني قولي بالمختصر المفيد شنو الموضوع؟
-
الموضوع انها قابلت شخصية في علم النفس، وقالت لها بالعكس، احتفلي في عيد ميلادج ولازم ما تمر عليج أي مناسبة سواء كانت سعيدة، أو في اعتقادج انها تعيسة ولكن هي في الحقيقة فيها خير وسعادة.
-
يعني شنو مافهمت؟
-
يعني باختصار مثل الآية اللي تقول (وعسى ان تكرهوا شيئا وهو خير لكم)، فكل مرحلة بحياة الانسان لها اهميتها، الجدة لها أهمية في لم الأسرة والحنان والحب اللي تعطيه لأحفادها واعيالها، والخمسين سنة مو نهاية العطاء ولازم تعيشين حياتج بدون لا تلتفتين لمسألة العمر، وتحتفلين مثل كل سنة مهما مر فيج العمر.
-
آنا الحين فهمت، بس شتسوين مع بلاغة الشف في بعض الناس والتحبيط والتطنز لما الواحدة اتعدي الأربعين وكأنهم يقولون لها قعدي ابزاوية في البيت، ولا تحلمين في المستقبل!
-
بس المفروض الواحد ما يخلي هالأمور اتأثر عليه، انت تدرين أوبرا شنو سوت؟
-
شنو سوت بعد؟!
-
سوت احتفال كبير مع نساء منطقتها، وكل واحدة يابت لها هدية وقاموا يطرون انجازاتها وأفعالها الطيبة ونجاحاتها وانها مازالت عندها الطاقة اللي تقدر اتساعد فيها الناس وتسعدهم، واكتبوا لها رسايل وايد اتشجعها بالاستمرار في عملها لأنهم ما يستغنون عن برامجها المفيدة للناس.
-
انزين احنا شنو انجازاتنا اللي الناس راح تتذكرها؟
-
مادري عنج.. فكري عدل.
-
اممممم آنا كنت أبيع كبة برغل ومعجنات وملفوف، تعتقدين هذا انجاز؟!
-
اشرايج انتي؟
-
ههههه رايي ان هذا انجاز.
-
حلو.. يعني الحين اقتنعتي؟
-
بس في شي واحد، انا أقول ان سالفة الأحداث السيئة اللي اتمر بحياتنا ونحتفل فيها، ما تدخل في المخ، يعني آنا يوم تطلقت من ريلي هل المفروض اني احتفل بهالمناسبة وما أبجي؟
-
إي المفروض!!.. لأن لوما طلاقج.. ما تزوجتي ريلج هذا اللي تقولين انه أحسن من اللي تطلقتي منه.
-
اممم صح كلامج، ويعني انتي الحين المفروض تحتفلين علشان دعمتي الطوفه وتكسرت اظروسج علشان تحطين اظروس اصطناعية، تبرق من البياض جنها لولو!
-
اممممم.. اعتقد صح كلامج.. المفروض احتفل!
-
وتحتفلين لأن ولدج سقط للمرة الثانية في الثانوية العامة؟
-
امممم.. المفروض احتفل، يمكن بعد هالسنتين اللي عادهم في الثانوية العامة، اييب نسبة كبيرة!
-
خلاص عيل ننطر منج اتييبين لنا الكيكة اللي عليها 50 شمعة؟
-
هو!.. ليش؟!
-
علشان بيصير عمرج 50 سنة بعد شهرين!
شي ما شفتوه
-
شيخة.. وين الكيكة اللي وعدتينا فيها، مو انتي قلتي لنا لما يصير عمرج 50 سنة بتحتفلين، مع انها مناسبه غير سعيدة؟!
-
امممم.. منار ما لاداعي اتذكريني، انتي ما تدرين ان الاحتفال في يوم الميلاد بدعة حرام؟! اهئ اهئ اهئ.