أنوارعبدالرحمن
نهى امرأة سيئة الطباع مع زوجها، شعرت بتغير مفاجئ في تصرفاته، وأصبح منطويا على نفسه لأسباب تجهلها، فطلبت الفزعة من صديقتها.
-
اسمعيني دلال.. أنا لازم اعرف هالريال اش خامر عليه.
-
حرام عليچ نهى ترى ريلچ خوش ريال محترم ودين، ليش هالشك اللي فيچ.
-
انا عارفته عدل.. اهو مو عادته يقعد بروحه، بس هالأيام ما له خلق أحد وكله صاك على نفسه الدار.. أكيد شايف له شوفه اهئ اهئ اهئ.
-
احمدي ربچ انه معطيچ زوج مثله، مو مثل اللي عندي اللي كل يوم ألقاه مع وحدة، وما يملى عينه الا التراب!
-
الرياييل ما يتأمن فيهم، في يوم وليلة يتغير قلبه ويشطح ورا واحدة ثانية بسهولة.
-
تبين الصراحة انتي اللي تعاملينه بطريقة مو زينة، وزوجچ خوش ريّال بس انتي مو عارفتله ولا قاعدة تحترمينه، وإذا كان صچ لاقي له واحدة غيرچ أكيد من سوالفچ وقساوة قلبچ عليه.
-
انزين.. بطلب منچ طلب بس لا تقولين لا.. والا ترى ازعل عليچ.
-
قولي.
-
خلينا نروح لأم علي اللي تقرأ الفنجال، عشان تشوف لي هالريّال اشخامر عليه؟!
-
من صجچ! انا ترى هالسواف ما سويها اصلا حرام، انتي تدرين ان ما راح تنقبل صلاتنا اربعين يوم.
-
قلت لچ لا تقولين لا.. والا ترى ازعل عليچ، انا عادتچ اقرب من اختي ومالي غيرچ بعد الله يوقف معاي بهالمشكلة اهئ اهئ اهئ.
عند قارئة الفنجان:
-
يا هلا ومرحبا باللي جانا، هذا فنجان القهوة اشربيه يا نهى، وبروح اشوي وارجع لكم.
-
الله يسامحچ يا نهى يا يبتني معاچ لهالمكان لو احد يشوفنا داشين اهنيه بيشك فينا، هذي أول مرة بحياتي اشوف واحدة تقرأ فنيال.
-
يعني انا اللي امطيحه اهنيه، هالمكان دلتني عليه واحدة معاي بالدوام، وبعدين بطلي خوف وتوتر، ترى راح اتوتر معاچ.
-
ما دري اش راح اتفديني لا دخلت قبري، انا متحسفة اني طعتچ، شربي بسرعة القهوة وخلصيني خل نطلع.
-
قهوتها مو حلوة، مو قادرة اكملها، لو تكملينها انتي عني احسن.
-
عطيني.. شنو هذا ويع صچ طعمها مو حلو!
بعد خمس دقائق:
-
ها نهى شربتي الفنجان؟
-
أي شربته، الله يعافيچ بس ابي اعرف شنو سالفة زوجي وبس؟
-
ويه.. ويه.. ويه.
-
شنووو؟.. اش صاير؟
-
شنو هادا زوجچ كولش موزين، يتنقل من حرمه لحرمه، حطي بالچ ترى هالنسوان ناويين يخربون عليچ بيتچ!
-
شنووو؟ زوجي المحترم الدين راعي حريم؟! اهئ اهئ اهئ.
-
هذا مودين، هذا يلعب على عقلچ وعقول الحريم، اخس اخس عليه.
-
ما قلت لچ يا دلال انا شاكه فيه، شفتي اشلون طلع شكي ابمحله؟
-
غريبة هذي مو اطباع زوجچ، لو هالكلام قايلته عن زوجي بصدقها.
-
اهئ اهئ اهئ.. امشي انروح البيت لا اشق اهدومي اهنيه من الحرة!
-
تعالي.. تعالي يا مدام نهى.. جيبي الفلوس!
بعد ثلاثة أيام:
-
حبيبي تامر على شي؟
-
لا سلامتچ.
-
حبيبي... تبي اسوي لك مساچ؟
-
لا مشكورة.
-
حبيبي.. تبي ماي دافي وملح انقع فيه ريولك؟
-
لا.. بس اش سالفتچ هاليومين تكلميني بهالطريقة، مو من عوايدچ، تقولين لي حبيبي ولا هالدلال الغريب اللي اشوفه أول مرة منچ.
-
امممم، أي تدري بعد، الواحد يكبر ويفهم ويغير من اطباعه ويصحح اخطاءه.
-
أي... صح عدل، الحمد لله انچ عرفتي وفهمتي.
-
انزين قولي انت تحبين؟
-
أي احبچ.. مو انتي زوجتي أم اعيالي.
-
لا قصدي.. يعني.. ما تفكر بوحدة ثانية غيري.
-
أفا.. انا افكر بواحدة ثانية غيرچ، عيل انا ليش متحمل مشاكلنا من اول، كل هذا عشان احبچ.
-
يا غشاش يالچذاب ياللي تلعب بعقلي وعقل الحريم.. طلقني الحين الحين.
-
انا غشاش وچذاب، وألعب بعقلچ وعقل الحريم، من وين يايبه هالكلام؟
-
اي انت يالخاين، انا عرفت كل شي بأسلوبي الخاص، طلقني بسرعة، ما اعيش مع انسان يستغفلني، طلقني، طلقني انا ما استحمل غش وچذب!
شي ما شفتوه:
-
يعني لازم تطيعيني وتشربين فنيالي، ويطلع لي بالحظ سوالف ريلچ اللي تسود الويه، وتنعفس حياتي واتطلق من ريلي؟
-
انتي اللي وديتينا هالمكان، وانتي اللي صدقتيها وطلبتي الطلاق تحملي نتيجة قرارچ.
-
ابي زووجي يا ناااس اهئ اهئ اهئ!