أنوارعبدالرحمن
مجرد اتصال من فتاة لعوب، يقلب كيان الشاب المستقيم نايف، ويغير من خارطة أفكاره، فالشرارة الصغيرة بداية كل نار عظيمة، وإليكم ما دار بينهما من حوار:
-
ألو.. منو.. الشاعر مناحي؟
-
من انتي؟
-
أنت الشاعر مناحي؟
-
لأ انتي غلطانة.
-
لأ أنا مو غلطانة.. لأني توني ماخذه الرقم من رفيجتي، وقالت لي انه رقم الشاعر مناحي.
-
يا بنت.. وش جابك عندي بهالليل وصحيتيني من ارقادي؟ قلت لك الرقم غلط، وبعدين انتي من وين متصلة؟
-
أنا متصلة من نقالي بعد شنو؟
-
يا بنت اللي تبغينه ما هو أنا، ولاني شاعر!
-
أنت تتهرب صح؟!.. قالت لي رفيجتي ان الشاعر مناحي شاعري.
-
وشو؟!
-
أقصد.. شاعر.
-
بس أنا مو بشاعر ولا اسمي مناحي، يا بنت روحي الله يستر عليك، تراني متزوج وعندي بزران تارسين البيت، بلاش مشاكل.
-
جذيه يعني اتسوي فيني؟!.. حرام عليك تطردني، أنا معجبة فيك واحبببك.
-
وشو.. وش.. وش تقولين؟!
-
أقول.. حرام عليك تطردني.
-
لأ.. اللي بعدها !
-
أنا.. أنا.. أنا معجبة فيك واحبك.
-
ياااا ويل قلبي !
-
اش فيه قلبك؟
-
لا.. ما في شي.. بس حسيت بشوية ألم.
-
باسم الله على قلبك.
-
احم أعوذ بالله من إبليس، يا رب ثبتني على طاعتك، أنا رجال مصلي وامسمي، هالبنت مدري من وين جتني، يا رب الثبات.
-
اشفيك؟ انت قاعد اتحاجي منو؟
-
لا، جالس أكلم نفسي.. مممم بسألك كيف الجو عندكم؟!
-
أنت قول قبل اشلون الجو عندكم؟
-
حنا عندنا حر.. وملل.
-
لا احنا عيل عندنا الجو ربيع ومطر.
-
ايه انتو غير !
-
بس لا تحسدونا.
-
طيب، انتو كم الساعة عندكم؟
-
الساعة 5 العصر !!
-
صدق؟! الصراحة فرق واجد !!.. حنا عندنا الساعة ثنتين الفجر !
-
أبيييه.. حدي آنا آسفة، مادري إن الساعة عندكم الحين ثنتين الفجر، خلاص اخليك الحين حبيبي، روح نام تصبح على خير حياتي.
-
وشو؟.. وش وش قلتي؟
-
أقولك آنا آسفة خلاص روح نام تصبح على خير !
-
لأ.. اللي بعدهاا.
-
ما راح أقول.. كلام الملوك لا يعاد ههههه عليك واحد.
-
أعوذ بالله منك يا إبليس، أعوذ بالله منك يا إبليس جايني بهالليل، يا رب تراني ما استحمل، يا رب عبدك ضعيف قدام النسوان!
-
انت اشفيك قاعد تتعوذ من إبليس من مساع، شايفني جدامك شيطان، حرام عليك، أنا إنسانة بريئة، ومتربية عدل.
-
أكيد يعني؟
-
إي أكيد.. اشلون تبي اثبت لك؟
-
هاا؟!.. لا ما لاداعي.. مممم بس بسألك انتي تصلين؟
-
إي أصلي شايفني مو مسلمة؟!.. وآنا أصلاً ما أطوف صلاة كل فرض بفرضه أصليه، ولا اترك حتى الشفع والوتر، وصلاة القيام بعد!
-
صدق؟!!.. اممم طيب حجيتي؟
-
لا.. بس رحت العمرة 3 مرات مع أهلي، بس انطر نصيبي اهو اللي يحججني ان شاء الله، وبلبس عقبها غطوة.
-
اكيد ذي نيتك؟!!
-
إي عيل.. حسبالك آنا من هالبنات الصايعات، آنا ابوي أصلاً امطوع ويخاف علي من النفوس الضعيفة اللي بالشارع، وما أروح ولا أرد إلا معاه.
-
والنعم فيك وفي أبوك.. صدق كبرتي بعيني !
-
مو آنا قلت لك إني إنسانة بريئة؟
-
دام انك بهالصفات اللي تبيض الوجه.. خلينا نكمل سوالفنا.
-
انزين.. بس مو كل ساع تقعد تتعوذ لي من إبليس !
-
لا وش إبليس ذا اللي بيجي بيني وبينك، دام انك بنت امصلية وامسمية !
-
إي عبالي بعد ههههه.
-
اسمعيني يا بنت الناس أنا الحين طار من عيني الرقاد، وحرمتي بتشخر بالدار الثانية، وماخذن راحتي، وش رأيج تسولفيلي عن نفسك.
-
اشتبيني أقولك عن نفسي وأنا للحين ما عرفت اسمك؟
-
أنا اسمي نايف.. طيب انتي وش اسمك؟
-
اسمي.. مشاعل.
-
يا زين اسمك زيناه.. طيب اوصفي لي شكلك !
-
آنا.. الصراحة شكلي بدون مبالغة، الكل يقول إني حلوة وااااايد.. واقط الطير من السما.
-
يا ويل قلبي.
-
اش فيه قلبك بعد؟!
-
- احم.. طيب وكم عمرك؟
-
إذا تبي تعرف عمري.. عمري بدأ من اللحظة اللي كلمتك فيها يا بعد عمري كله انت.. !
-
آآآي.. وأنا قول ابليس من وين يجي؟!
شي ما شفتوه:
-
نايف.
-
عيون نايف.
-
ترى أذن الفجر عندكم روح للمسيد.
-
هااا.. ايه إن شاء الله.
-
انزين لا تنسى تدعيلي.. وراح انطرك على ناااااار.
-
هاااا.. بتنتظريني على نار؟
-
إي.. حده.
-
كح كح كح.. اممم الصراحة مقدر أخليك تنتظريني على نار، ذي مب رجولة!.. بس بسأل إذا يجوز نجمع صلاة الفجر مع صلاة الظهر؟!
-
آنا سامعة من ابوي.. انه يجوز !
-
دام أبوك المطوع يقول يجوز.. كملي سالفتك اللي صارتلك بعرس بنت خالك، وش كنتي لابسة؟!