أنوارعبدالرحمن
حصة لديها بعض الاتصالات المهمة، لكنها اكتشفت أن رصيدها في جهازها النقال قد انتهى، ولكن ماذا حدث؟
-
وي.. إبيييه خلص كرت تيلفوني! الحين اشلون اتصل على الدكتورة ناطرتني أكلمها ضروري، أووف يعني الحين لازم أروح الجمعية هالحزة.
-
اشفيج حصة اتحلطمين؟
-
شوفي انا الحين بروح الجمعية ابسرعة وأرد، بس لا يشوفني جسوم ويلزق فيني، وديه الدار الثانية.
-
انزين لا اتأخرين لا يفك حلجه علينا ويبجي.
-
لا.. لا إن شاء الله برجع ابسرعة بس بشتري كرت وأرجع على طول.
-
خالتي انتي بس بتشترين كرت؟
-
إي.. اشتبي انت بعد؟
-
بروح وياج.
-
أووووه.. الواحد ما يتحرك خطوة إلا لاحقينه اللي في البيت كلهم.
-
خالتي آنا ما راح أأذيج.
-
انزين خلاص تعال معاي فكني من الحنة.
-
انزين خالتي ميخالف خالد يروح معانا؟ لأنه راح يدري اني رحت معاج وبعدين يعلم أمي وتهاوشني عشان ماخذيناه.
-
محمد اشرايك ناخذ معانا بعد يعقوب ويوسف وأموله؟
في الجمعية:
-
سمعوني زين اللي أشوفه يتحرك من اهنيه احش اريوله، خلكم واقفين معاي.
-
خالتي ميخالف أشتري بس عصير؟
-
وآنا بعد باشتري عصير.
-
عمتي ترى يسوف يقول يبي يروح عند الحلويات.
-
انتو الحين ما تفهمون الكلام اللي قلته لكم؟!.. يعني لازم تخلوني أكفخكم ابهالجمعية جدام الناس وأفشلكم؟
-
انزين خالتي إذا خلصتي ميخالف نروح نشتري عصير وبرد؟
-
تدرون اشلون امشوا اشتروا اللي تبونه عشان أرتاح من قرقتكم، وبعدين أشتري الكرت.
-
مشكورة خالتي.
-
امشوا بس امشوا الشرهة علي اللي ماخذتكم معاي، جم مرة أقول توبة ولكن ما يوز!
-
خالتي أنا باشتري شريط بليه ستيشن.
-
يعقوبوه.. انت أكثر واحد امنرفزني اليوم، ترى آنا الحين وصلت حدي، قلتو بتشترون عصير وبطاط وكاكاو قلت ميخالف، لكن الحين تبي تشط الطابق الثاني ومادري وين بتذلف واتدعس وأقعد أدورك بكل مكان وما ألقاك.
-
خالتي أنا معاي نقالي دقي علي.. صدقيني ماراح أتأخر ولا أتدعس بس دقيقة وحدة وأرجع.
-
يعقوب.. آنا قاعدة أتكلم معاك هندي والا شنو؟!
-
خالتي تكفين.. أحب راسج.
-
أف.. انزين اذلف روح، بس إذا تأخرت وربي لأروح عنك وأخليك.
-
مشكووورة خالتي.
-
خالتي بروح معاه ميخالف؟
-
وانتي يالنزقة بعد؟.. لا كملنا.. مالت علي اللي كسرتوا خاطري قلت آخذكم معاي تستانسون، خلاص انجلعي معاه بس يا ويلكم إذا تأخرتوا! آآآه يا راسي.
-
خالتي ترى محمد ما عنده فلوس.
-
آنا أدري أمهاتكم قاطينكم علي ليش، اشتروا خلصوني بسرعة، محد غيري مبتلش فيكم وبيدفع لكم!
-
خالتي.. ميخالف أشتري حق أمي كيكة كادبوري؟
-
خالد اشرايك تشتري حق أبوك وخدامتكم بعد؟! أدري اني آنا البنك المركزي اللي بيصرف عليكم اليوم.
-
خالتي.. أبي أشتري اثنين من هالبسكوت.
-
ألووو.. أدري اني اتأخرت، مو انتو قطيتوا علي اعيالكم عشان تفتكون منهم، شسوي بعد سكتوه مثل ما آنا مبتلشة بعيالكم الحين، شوفوا لكم صرفة مع جسوم ليما أيي.. شنو؟.. انزين انزين الحين اشتري بدربي الخبز، وشنو بعد؟.. انزين انزين خلاص دزي مسج بطلباتكم، بس زهبوا بيزاتكم لما أرجع، الظاهر بيخلص معاشي اليوم عليكم وعلى اعيالكم!
-
خالتي يعقوب تأخر مع أمولة.
-
آنا أدري ان السالفة جذيه بتصير، عيزت أدق عليه وجهازه مغلق، الحين وين بلاقيهم؟
-
خالتي اروح أدورهم مع يوسف؟
-
روحوا ابسرعة دوروهم في الطابق الثاني.
-
ان شاء الله.. تعال معاي يوسف.
-
خالتي.. خالتي.
-
شنو اشفيكم؟
-
كاهم يعقوب وأمولكم ارجعوا.
-
وي.. الحين وين بنلقى يوسف ومحمد راحوا يدورونكم؟.. اش هالقرادة؟!
شي ما شفتوه:
-
حصة مشكورة على الأغراض اللي يبتيها.. بس ليش نسيتي تييبين الخبز؟
-
اعيالكم هذولي الينانوه ما يخلون الواحد يذكر حتى اسمه؟!
-
انزين ترى الـ...
-
ابييييه.. تذكرت.
-
شنو ؟
-
نسيت اشتري أهم شي رايحة عشانه.. الكرت!