أنوارعبدالرحمن
تهاني امرأة تهتم بقراءة الجريدة اليومية في كل صباح، وتنقل لزميلاتها في العمل كل خبر جديد وغريب تجده على صفحات هذه الصحيفة.
-
تهاني.. سمعي هذي الأخبار اللي مكتوبة بجريدة اليوم، انتي تحبين هالسوالف؟
-
شنو هالأخبار؟.. قولي وآنا أسمعج.
-
الخبر الأول يقولون الفنانة (..) تستعد للزواج للمرة التاسعة.
-
ويه.. ويه للحين وبعد ما ياها تفكر بالزواج؟!
-
يقولون هالمرة من مصفف الشعر اللي يسوي لها شعرها.
-
امبيه.. من صجه؟.. هذا وهو يدري ان شعرها تركيب.
-
شفتي اشلون؟.. وانتي صار لج امطلقة من ست اسنين كل ما ياج واحد يقول عندها اعيال مابيها.. يا خلاف
-
أي يا ختج.. حظنا مو حظ هالفنانات.. أموت قهر لما اسمع وحده ما يمديها تتطلق إلا وتتزوجت، أو تقول بكل ثقة أجلت موضوع الزواج بتفرغ للفن
-
وهذي اللي بتتزوجه الحين، أتوقع انه أصغر منها بأكثر من سبعين سنة.
-
عليها بالعافية.. يعني بس حلال عالشايب ياخذ بنت بسن أصغر بناته، وعلى الحرمه حرام.
-
اتصدقين احس ان هالسالفة مثل النكتة.. يعني نسمع بوحدة يايبه طفل تاسع بس مو متزوجة رجل تاسع هههه
-
ابهالزمن كل شي توقعيه.
-
بس بسألج سؤال، اتهقين.. وحده ابسنها اشلون يعني بتستعد للزواج مثل اللي مكتوب بالجريدة؟
-
هههه سؤال جريء.
-
هههه.. ما علينا منها.. سمعي الخبر الثاني.
-
شنو بعد؟
-
يقولون لج إن هالسنة راح يحطون فوازير رمضان بشكل ثاني.
-
يعني اشلون؟
-
يعني هالمرة اللي راح تقدم حلقات فوازير رمضان غير اللي كل سنة قاعدة تدبل جبدنا، وتستعرض جمالها وملاقتها.
-
بالعكس، آنا احس انها سوت جو حق رمضان اللي طاف.
-
أنا ما بي اعلق كيفج انتي وذوقج، بس اللي هالمرة راح تقدم الفوازير مالت هالسنة أملق من اللي قبلها.
-
وليييين.
-
بس يعني.. الرقص هالمرة والردح على حبة ونص، والمسلسلات على كيف كيفج، والمسابقات على قفا من يشيل، ولا تدرين أي قناة راح تتابعين، لأن أغلبها صارت حصرية.
-
هذا برمضان؟.. استغفر الله.
-
أي.. هو.. وآنا من مساع اشقاعدة أقرق على راسج؟
-
عيل متى بنصلي ونتعبد ربنا وبنقرا قرآن؟.. مو اهو شهر عبادة؟
-
عاد انتي فكري اشلون؟
-
آنا أقول لاحقه على كل شي، أغلب المسلسلات والبرامج راح يعيدونها بعد العيد.
-
انزين ما قلتي لي شنو بتسوين هالسنة حق القرقيعان؟
-
آنا الصراحة مادري أفكر بالقرقيعان واللويه حق هالعيال وإلا استعد للعيد وإلا للمدارس وطلباتهم.
-
الله يعينا، بس المهم فكري عدل بالسؤال اللي سألتج اياه مساع؟
-
أي سؤال؟
-
اشلون الفنانة ذيك راح تستعد للزواج التاسع؟
شي ما شفتوه:
-
تهاني.. آنا من أمس مانمت لين توصلت لحل للموضوع اللي كان في بالي؟
-
لا يكون عن ذيك الفنانة؟
-
أي عيل من غيرها؟
-
وشنو الحل اللي توصلتي له يالفضولية؟
-
اتوقع هالمرة الفنانة راح اتصير ضيفة على برنامج د. فوزية عشان تعطي المشاهدين من خبرتها مع تسع أزواج بعين الحسود، وبهالطريقة بترجع ديرتها ومعاها فلوس تسوي فيهم عرس، وتصدر معاها كتب عن رحلة حياتها وخصوصا الزوجية، وراح يدعون لها ناس بالملايين، (فالج الرقم عشرة) آمين، وكلللوووش!