أنوارعبدالرحمن
في مرة من المرات شفت منتدى أجنبي على النت، ولاحظت الفرق بين منتدياتهم ومنتدياتنا الالكترونية، منها انكم تشوفون ملف العضو سواء الولد والا البنت زاخر بالمعلومات والصور الشخصية لهم، كمثال.. العضوات في المنتديات هناك تشوفها حاطة صورتها الشخصية، وحاطة اصور عايلتها بما فيها البابا والماما، وصور زميلاتها وصديقتها المخلصة، وصديقها الحميم.. تلقى الأم تبتسم للصورة لأنها راح تنشر عالنت وقاعدة في ملابس البيت أقصد ملابس (تصلح لكل شي)، وأبوها واقف يضحك وبقية العايلة، في الصالة وفي الحديقة وفي المطبخ يعني عادي ما في مشكلة، وهذا غير كلبهم وطبعا والمفروض ما تنساه لأن اهو أصلا فرد من العايلة وواقف معاهم وبالمقدمة، ما تشوف أي واحد فيهم متزهلق أو البنت حاطة مكياچ، مو عشان اهي حلوة لأن الصراحة بعضهم أجكر من الجكر نفسه حتى لو هي شقرة، لكن لأنهم طبيعيين في كل شي، أما اصورها الشخصية وهي في غرفة نومها ويمها الدببة وألعابها (مو مثل بعض عوايلنا الوحدة من تطول شبر قالوا لها عيب كبرتي شيلي هالألعاب اللي تارسه دارج)، وصور لها مع صديقاتها في الدراسة وفي النادي وفي العمل، وصور تجمعها بصديقها الوفي اللي اهو أعز من أمها وأبوها، هذا غير تعريفها لنفسها ولسيرتها الذاتية وبعض خصوصياتها، يعني يحس الواحد ان قاعد يشوف ألبوم كامل لحياة العضو وكتاب مفتوح للشخصية اللي قاعد تقرا عنها ومكان سكنه وعنوانه وتيلفوناته، والغريب ولا واحد فيهم يفكر ان اصوره هذي ممكن أحد يبوقها من الملف وينشرها بالنت بطريقه خبيثة، ولا يهمهم ان الناس تشوف وضعهم أو تتناقل اخبارهم، وهذا مو قصدي اني مستانسة على هاللي شفته ونقلته لكم لكن فعلا كان هالشي ضحكني لأني حسيت اني في عالم ثاني، كل ما أشوف شي استغرب أكثر وانا أضحك بيني وبين نفسي (يعني البنت ما خلت شي ما حطته ولا اذكرته للناس، فهي مو محتاجة للستر ولا تبيه أصلا ) وهذا اللي خلاني أقارن مع منتدياتنا اللي تتعامل مع ناس تدخل بالغالب باسم مستعار، وكل معلوماته (مبهمة) (الاسم: سراب الليل، البلد: في مكان ما على الكرة الأرضية، العمر: يكفي انه موجود بشهادة الميلاد، الهواية: لم يتم اكتشافها بعد)، وهذا مو لأن الشخصية هذي اهي حابه تكون جذيه لكن لأن فكرتنا مازالت عن موضوع الدخول لعالم النت فيها شي من النظرة الظالمة، مع العلم ان أغلب البيوت في عالمنا العربي والخليجي تتعامل بالنت وتقريبا تلقى نص العايلة لهم عضوية في بعض المنتديات الصغير فيهم والكبير في العوايل المتحررة والمحافظة والمتدينة، والفاصل عندنا هو إذا دخلت باسم مستعار فقط هو مسموح لك عند المجتمع، عشان جذيه تكثر عندنا السرقات لمواضيع تم نشرها خاصة (من البنات) في المنتديات الالكترونية، وما تقدر تدافع عن حقها الأدبي والقانوني، والشي الواضح إن أغلب اللي يتعاملون في هذي الشبكة يبدي بينهم التعارف السريع بعد فترة بسيطة من التسجيل، أول شي عن طريق الماسنجر وبعدها يتبادلون ارقام موبايلاتهم، وبعد أيام تلقاهم يتلاقون مع بعض خاصة إذا هم في نفس البلد، أو لما تحصل لهم سفرة لبلد العضو الصديق، فينكشف الاسم وكل المعلومات الشخصية لهذا الشخص، اعتقد ان عالم النت اللي دخل في حياة الناس كلها وصارت حتى المراكز والهيئات والشركات والوزارات وغيرها، تجبرك في بعض الأحيان انك تتواصل معاهم عن طريق هذي الشبكة، واعتقد بعد فترة بسيطة راح تلقى الأسماء المستعارة بدت تختفي في المنتديات الالكترونية وراح تتعامل مع ناس تكتب بأسمائها الحقيقية، يعني شخصية واضحة المعالم، ويضمن لها المنتدى حقوقها الأدبية والقانونية، مثل ما بدت الحين بعض المنتديات الأدبية لأعضائها الأدباء والشعراء والكتاب والصحافيين.
شي ما شفتوه:
ليومي هذا أذكر اشلون أهلنا أغلبهم كانوا متشددين حتى في ظهور اسم البنت على صفحة الجرايد، وعيب انها تكتب اسمها والناس تعرف ان بنتهم عندها هواية الكتابة، عشان جذيه غالبية البنات اللي كانت عندهم الموهبة الأدبية حتى آخر الثمانينيات كانوا يكتبون بأسماء مستعارة، واليوم لما تفتح الجريدة ما تشوف اسم مستعار حق بنت إلا بالنادر، هذا غير الإيميل اللي تحطه تحت موضوعها، ومثل ما ذكرت أتوقع إن عالم النت راح يصبح بعد فترة مثل سالفة الجرايد، تتعامل مع الناس كلها ومن ضمنها النساء بأسمائهم الحقيقية.