أنوارعبدالرحمن
هذا الموضوع لا نقصد به توجيه النقد لشخصية معينة ولكن نقصد به سخافة بعض البرامج التي تعرض على المشاهدين والمستمعين على مختلف القنوات الإعلامية.
-
أعزائي المشاهدين والمشاهدات نعود إليكم مجددا بعد إجازة رمضان أعاده الله علينا وعليكم باليمن والبركات.. مع برنامجكم «فضفض» لنناقش في حلقة اليوم موضوع، شنو الأشياء اللي تخاف منها؟
-
ألو.. اشلونچ أختي سوسه..
-
عفوا اسمي سوسو لو سمحت
-
آسف أختي سوسو.. سامحيني غلطت
-
لا، عادي تفضل.. كل عام وانت بخير
-
وانتي بخير وصحة وسلامة.. تبين الصچ ولهنا عليچ.. ياليت ما توقفين برنامجچ في رمضان.. كان ودنا نفضفض اشوي.
-
هههه تسلم يارب.. ما عليه كانا احنا ردينا.. فضفض وقول شنو الأشياء اللي تخاف منها؟
-
انا أخاف من زوجتي الصراحة هههه
-
وي.. ليش؟ هههه
-
لأنها لو تدري إني قاعد اكلمچ بتزعل مني وتروح بيت أهلها لأنچ حلوة وتغار منچ خخخخ.
-
اشدعوه؟.. احنا اهنيه نتكلم عالهوا مباشرة وعلاقتنا علاقة أخوه لا غير.
-
يا ختي شسويلها بعد؟.. تدرين بعد الحريم دايما يغارون من المذيعات الحلوات.. هههه المهم إن انتي رديتي لنا وما راح ننحرم من طلتچ وكل عام وانتي بخير.
-
وانت بخير.. ياحليلك كلامك يونس، ومعانا اتصال الثاني.. ألو بو خميس
-
ألو اشلونچ سوسو.. شخبارچ.. انا حبيت أشارك في البرنامج وأقولچ الصراحة.. انا أخاف من الظلمة وايد مع اني كبير ومتزوج وعندي اعيال، تخيلي حتى لو أشوف الظلمة من ابعيد أخاف، ولو أحد يصك ليت الدار أروح أقعد بروحي بالصالة.
-
ابيييه من صچك؟.. انزين ليش ما رحت لدكتور نفساني يعالج حالتك؟
-
رحت.. وتكلمت معاه وطلع اهو بعد يخاف من الظلمة خخخخ.
-
وي.. لا ما أصدق.. هههه .. ابيييه اعزائي المشاهدين وايد اتصالات معانا اليوم ومو قادرين نلحق عليها.. معانا أم عبد الرزاق.
-
ألو.. هلا حبيبتي.. شخبارچ، الصراحة آنا أتابع برنامجچ من زمان ولما أشوفچ ينشرح صدري.. واستانس، آنا أحبچ وايد وايد
-
بعد قلبي.. تسلمين وآنا أحبكم وايد بعد، عيل شاركينا برنامج اليوم..
-
شوفي حبيبتي آنا أخاف من البريعصيه، وأكثر شي من الزهاويه ويع ويع احس انه يقزز شكله.
-
أي صح آنا معاچ.. شكله يلوع الجبد.. بس مو درجة الخوف.
-
وي امبلا.. آنا لما أشوف ازهيوي يمشي عالأرض.. ما تشوفيني إلا تعلقت بالثريا على السقف هههه المهم سمعت صوتچ اليوم.. وفضفضت يارب ما يحرمنا من هالطلة الحلوة.
-
ههههه مشكورة حبيبتي.. واتصلي دايما مو تنسين.. أبيييه مو قادر الكنترول يلحق على كثرة الاتصالات.. الظاهر برنامجنا يتابعونه الناس بكل مكان.. معانا اتصال من بوشهاب.. ألو حياك بوشهاب تفضل أخوي
-
ياهلا أختي.. آنا ودي أشارك في هالبرنامج الناجح.. آنا الصراحة أخاف من الشارع.
-
اشلون يعني تخـــاف من الشارع؟
-
يعني لما أطلع بالسيارة، أخاف من السيارات اللي يمي.. يعني فجأه ألقى واحد لف علي.. والثاني ما أوعى إلا انسدح على سيارتي، ومحد يعرف يسوق.. وحوادث وايد.. وأخاف من القطاوه اللي تعبر الشارع وأشياء وايد ما أقدر أعدها لچ.
-
انزين عيل اشلون تروح شغلك.. وتشتري حاجاتك؟
-
ما قمت أطلع صدقيني.. كله خايف.. وكله مستاحش، احس ان السيارات اللي بالشارع يمكن مو بعيد تدخل في طوفة بيتي وتدعمني
-
وي أبيييه.. صح هذي مشكله.. اشلون ما كنت أفكر جذيه؟
-
عاد اتصدقين؟
-
شنو؟
-
آنا قاعد استهبل عليچ، أنتي أول شي فكري في الموضوع اللي تعرضينه عالناس بعدين سوي برنامج خاص فيچ.. ما قول إلا.
-
طوط.. طوط.. طوط
-
ابيييه آنا ينقالي جذيه أخاف، لأ ما استحمل اهئ اهئ اهئ
شي ما شفتوه:
-
أعزائي المشاهدين والمشاهدات نعتذر منكم في عدم مواصلة برنامجكم العزيز على اقلوبكم «فضفض».. بمناسبة قدوم عيد الأضحى المبارك بعد شهرين ونص اهئ اهئ اهئ.