أنوارعبدالرحمن
يا ترى في هذه القصة، لماذا فتحت الجدة حوارا هادئا وحساسا مع حفيدتها، هذا ما ستعرفه أيها القارئ الآن.
-
آآآآي يدتي لحقيني شوفي محمد قاعد يطقني اهئ اهئ اهئ.
-
محمد اشفيك على اختك.
-
يدتي لقيتها طالعة برة السكة عند سيارة أمي ماخذة منها السي دي، قمت وراقبتها من طرف الباب، فشفت سيارة فيها واحد اوقفت عندها وقام يكلمها، ويوم طلعت شافني جان ينحاش، قلت لها اشسالفة هالريال اللي كان يكلمج، قالت لي هذا يسأل عن بيت بوحمدان، قلت لها لو كان يسأل عن بيت بوحمدان ليش انحاش يوم شافني.
-
يدتي اهو دايما يشك فيني.
-
شي شفته بعيني وتقولين اشك فيج؟.. اليوم أنا ذابحج ذابحج من الطق.
-
يدتي لحقيني آآآآي.
-
محمد إن طقيتها ياويلك وربي ما راح أكلمك طول عمري.
-
يدتي اهو كل يوم امناشبني على لبسي وموبايلي ورفيجاتي، مليت من حياتي اهئ اهئ اهئ.
-
تعوذي من ابليس يابنيتي، وانت محمد حبيبي روح وخلنا ابروحنا، بسولف مع اختك اشوي.
-
ان شاء الله بس قولي لها لو شفتها مرة ثانية عند باب السكة احش لها اريولها، وماتلوم إلا نفسها
-
وانتي يالنزقة اشسالفتج.. ترى منتي هينة؟
-
يدتي اشفيها يعني لو رحت خذيت السي دي، أو رحت للفرع بروحي آنا مو اصغيرة، تذكرين انتي مرة سولفتي لي عنج يوم كنتي صغيرة، كنتي اتروحي للخباز والدكان ابروحج.
-
يابنيتي الدنيا تخوف الحين، واحنا انخاف عليج.
-
يدتي بالعكس احنا في زمن متفتح مو مثلكم أول، يعني عادي البنت الحين تطلع ابروحها.
-
انتي من وين اتييبين هالأفكار؟.. أكيد أحد مخرب عقلج؟.. تستاهلين يوم أخوج كوفنج.
-
يدتي.. آنا مو ياهل احد يخرب عقلي، وأخوي مو من حقه يمد ايده علي، وين قاعدين؟.. احنا ترى بالقرن العشرين الحين، عصر العولمة.
-
اشتطلع هالعملمة هذي.. ها؟
-
أوووه يدتي.. دام انتي ماتعرفين شي لا تسألين، وبعدين انتي لو امجربة هالطق اللي أحصله جان حسيتي فيني مو توقفين ضدي؟
-
انـــا واعليا علي شبعت اطراقات وترفس من اخوي العود الله يرحمه، مرة من المرات صارت لي سالفة تشبه سالفتج.
-
شنهي يدتي؟
-
انا دايما أمي تطرشني أشتري لها بعض النواقص من الدكان وكان اشوي بعيد عنا براس العاير، وكان ولد راعي الدكان ساعات يقعد بدال أبوه، وأثاريه حط عينه علي ويعشقني.
-
أيوااا.. يدتي.. عدل عدل كملي هههه وناسة.
-
ههههه ذكرتيني باللي مضى الله يغربل ابليسج، وكلما أيي يقصد علي بذيك القصايد اللي محد يقول مثلها، وأخوي بعدها حس فيني اني أدور أي سالفة عشان اروح للدكان.
-
يه يه يه يدتي بعد كنتي اتعرفين هالسوالف.
-
ههههه.. لا.. وي.. كنت على نياتي واعليا علي.
-
علينا يدتي علينا.. المهم كملي شوقتيني اشصار بعدين؟
-
بعدين أخوي قام يراقبني، وإلا ذاك اليوم ما وعيت إلا طب علينا وهو قاعد يقرا لي قصيدته، قام وطاح طق بالولد خنت حيلي عليه، وآنا انحشت للبيت، ويوم وصل طقني طق سنة بساعة تكسر فيني كل شي، وحرمني بعدها من شوفة الشارع وحتى رفيجاتي، وما صدق أول واحد يخطبني يقطني عليه، ومن قرادتي خذيت يدج، لو ماخذة ذاك جان آنا بسعادة آآه ياقلبي.
-
ههههه يدتي أثاريج انتي بعد منتي هينة، طلعتي تحبين أول واحنا ماندري، شنو اسمه يدتي؟
-
ههههه أسمه مساعد، عموما هو زمان وراح يابنيتي، بس ها.. ماوصيج، مو تقولين لأحد حتى أمج.
-
أفا عليج يدتي اعتمدي.. بس الصراحة طلعتي حدج كووول.
شي ما شفتوه:
-
يدتي لحقيني محمد قاعد يطقني اهئ اهئ اهئ.
-
محمد، أنت منت كاف شرك عن هالبنت.
-
يدتي صدتها طالعة للفرع ابروحها ويغازلها واحد من الشباب بكلام حب، ويوم سحبتها للبيت، تقولي حتى يدتي كانت اتحب.
-
شنووو؟.. اناااا ياللي ماتستحين ولا تنتخين، انا كنت أحب واحد اسمه مساعد ولد راعي الدكان.
-
لأ.. لأ، يدتي الله يخليج ما قلت جذيه.
-
محمد اوليدي طقهاااا وبرد جبدي فيها.
-
لالالا آآآآآي.