أنوارعبدالرحمن
موضوع اليوم قريب من حقيقة تحدث بعض الأحيان في بعض المدارس، وقد تحدثت معي كذا معلمة عن موضوع مشابه لحوار اليوم، ورغم قلتها إلا أنني أحببت أن أضع ضوءا بسيطا عليها.
-
طيبة.. نادية، طافكم مساع شفت زوج أبلة وسمية ذاك الحلو.
-
هو.. وين شفتيه؟
-
شفته عند الوكيلة معاه لوحة كبيرة حق مرته، الظاهر انها ناسيتها عنده بالسيارة.
-
بل بل.. ربيعه انتي اشدراج انها ناسيتها عنده بالسيارة؟
-
اهو قالي.
-
شنووو؟
-
اشفيكم اخترعتوا.. آنا يوم شفته سألته إذا يبي خدمة، وقالي ان وسمية نست أغراضها بالسيارة، وقلت له آنا أوصلهم لها.
-
هههه وانتي ما صدقتي.. صح؟
-
ههههه.. بس شافتني الوكيلة وقالت لي.. آنا أشوف الموضوع أحسن.
-
اتصدقون؟ آنا أشوفها معاه كل يوم، يا يايبها ويا ماخذها من المدرسة، وهذا دليل زود الحب والاهتمام والرعاية.
-
إي يا حبيبتي هذا الريال السنع.. مو احنا يا خلاف.
-
إي يختج احظوظ.. تذكرون العام يوم كانت حامل وثقيلة، حتى دفاترها يشيلهم عنها، وتحسين يبي يشيلها اهي من كثر ما هي كاسرة خاطره.
-
اتصدقون عاد يا بنات، آنا دايما أقول هو أحلى منها بواجد اش شايف فيها؟ اهي ماتجي صوب جماله كلش.
-
هههه إي تعلمينا.. لو تشوفين أبله نهاد وأبله زينب وأبله هنادي، إذا جا ياخذها بالهده، كل وحدة فيهم حاطة عيونها عليهم من زود الفضول.
-
هههه ياحليلهم يعني مثلنا؟
-
إي مثلنا هههه، بس آنا احس إن شخصيتها قوية، عشان جذيه ما يطالع وحده غيرها، وإلا في وااايد يصكون عليها بجمالهم.
-
تدرون عاد؟ هي غبية المفروض ما تخليه يجي ياخذها، الصراحة هو حلو والفرق بينهم واضح.
-
أي على قولتج، الكل ملاحظ جذيه.
-
عيل لو شايفته اشلون يبتسم لها لما ياخذها من المدرسة؟
-
شفت ابتسامته لها.. أحس انهم كأنهم معاريس واعليا علينا
-
إلا بسألكم انتوا ماشفتوا اعيالها.. حلوين مثل أبوهم وإلا مثل أمهم جياكر؟
-
آنا شفت الصغير اللي يابته العام.. الصراحة فرق بينه وبين أبوه.
-
وي.. حسافة.
-
بس طافكم، ماشفتوا الوكيلة اشلون تكلمه، لقيتها تضحك وتاخذ وتعطي معاه، حتى قالت له لازم انضيفك عندنا.
-
ربيعه حرام عليج وكيلتنا محترمة، أنتي نسيتي إن زوج وسمية يصيرلها؟
-
أي.. نسيت، أعوذ بالله منك يابليس، استغفرك يارب
-
يا بنات سكتوا سكتوا.. أسمع صوت باسمه برة الغرفة، لا تسمعنا نتكلم جذيه وتعطينا محاضرة كالعادة، وبتقول لكم آخر شي حلاة الريال بأخلاقه والحرمة بحيائها.
-
أي باسمة تقصدون؟
-
شنو نسيتي؟.. باسمة.. اللي معانا بالقسم هههه.
-
بنات اشفيكم؟.. أسمعكم تقولون باسمة، اش جايبين سيرتي فيه؟
-
هاا؟ امممم.. لأ بس كنا نقول إن باجر تبدي الأيام البيض، وبنذكرج الله يجزاج خير بالصيام إذا حابه تصومين؟
-
آنا ذاكرة بس مو حاطة افبالي أصوم، بس دام انتوا ذاكرين وناوين تصومون.. ما عليه انصوم باجر كلنا؟
-
كح كح كح كح كح.
-
هو .. اشفيكم قمتوا اتكحون؟
شي ما شفتوه:
-
ربيعة ربيعة لحقي.. سمعتي بالخبر؟
-
شنو اشصاير خرعتيني؟
-
زوج وسمية.. تزوج عليها، شي ما يتصدق ولا يدخل العقل، يقولون لج طايحة بجي وكارهة الدوام.
-
شنوووو؟.. وي واعليا عليها، أكيد صابتها عيون الحساد.. مسكينة ما تستاهل.