أنوارعبدالرحمن
سلمه، حالها حال من يتابع الأخبار الغريبة التي تنشر في الصحف اليومية، وتصفح المواقع الالكترونية، وتقرأها غالبا على زميلاتها في العمل.
-
ابيييه بنات سمعتوا بسالفة الطفلة اليمنية اللي عمرها 10 سنوات واحصلت على جائزة امرأة العام، لأن قضيتها اشتهرت عالميا.
-
وشنو كانت قضيتها؟
-
ارفعت دعوى قضائية عشان تتطلق من زوجها،، اللي زوجها أبوها الفقير غصب وقام يسيء معاملتها وكان أكبر منها بأكثر من 20 سنة، واكسبت القضية عن طريق محاميتها اللي تدافع عن حقوق الانسان.
-
وي مسكينة.. زين سوت ارفعت عليه قضية اطلعت شاطرة هالياهل.
-
أي ومو بس جذيه، بعد اختاروها عشان يجمعون الفلوس بصندوق خاص لصالح مشروعها.
-
أي مشروع؟
-
مادري.. يمكن عشان طلاقها.
-
مو اهي تطلقت؟
-
أي تطلقت بس مادري اشقصدهم؟
-
يمكن قصدهم انهم يشجعون البنات الصغار اللي انظلموا بزواج مثل هذا على الطلاق، ويسهلون لهم المهمة بهالفلوس اللي يجمعونها من الناس.
-
الغريبة ان للحين نسمع بزواج طفله من شايب، ليش ما نسمع زواج شاب من عيوز؟ صج سالفة تقهر
-
عاد تخيلي تسمعين بولد يرفع قضية على زوجته العيوز عشان يطلقونها منه.
-
هههه الله يقطع ابليسج، ما تيوزين سلمه من سوالفج.
-
ولا أزيدكم من الشعر بيت، في وحده من اللي فازوا بعد بهالجائزة، سالفتها غريبة، عاد تصدقون وإلا لأ؟
-
قولي شنهي.. شوقتينا؟
-
وحده من اللي فازوا بجائزة امرأة العام ههههه.. ابيييه لأ لأ مو قادرة أكمل.
-
قولي.. خلينا نضحك معاج.
-
سمعوا شنو مكتوب عن هالحرمة، حصلت على الجائزة لعملها الرائد مع قرود الشمبانزي تقديرا لما حققته في مشوارها المهني ونشاطها البيئي هههه.
-
قرود الشمبانزي؟ ههههه
-
تكفين وضحي لنا أكثر؟
-
هذا المكتوب، اشلون تبوني أوضح لكم بعد؟ أكيد كانت تعتني فيهم وتجابلهم وتعيش معاهم وتحس بمشاعرهم.
-
هههه حلوة هذي تحس بمشاعرهم.
-
وأكيد بعد كرست حياتها عشانهم.
-
هههه ابييه سلمه صج سالفة تضحك، أنا اعتقد انها يمكن تحاول تعلمهم يتكلمون.
-
عاد اتصدقون اهي اوحت لي هالسالفة بفكرة، يمكن أفوز فيها بجائزة حالي حالهم وانشهر.
-
شنو هالفكرة.. ضحكينا تكفين اشوي.
-
آنا أقول ليش ما اكرس حياتي واعتني بهالقطاوة السايبة، احسن ما كل يوم نشوف من صباح الله خير يا قطوة مدعومة، وإلا مقصوص ذيلها، وإلا عوره، حرام يا عالم انقذوهم من البطش.
-
اوووه سلمه عشتي الدور
-
هههه شفتي اشلون اصلح للجائزة؟
-
أي تصلحين ونص.
-
عاد اتصدقون من قريت الخبر وأنا مستغربه من ذيك الحرمه اشلون تحملت امطامر القرود فوق راسها وتدربهم كل هالسنين.
-
ما عليج.. هذول الأجانب يعرفون يدربون حتى الفيران اللي بالجحر.
-
صاجه.. مو احنا خلف الله علينا، يالله نربي اعيالنا.
-
اعتقد اللي يدربون القرود، يصيرون يمشون جذي وياكلون جذي ويناقزون جذي و..
-
سلمه انينيتي انتي اشفيج الله يهديج قمتي تطامرين على ؤوسنا؟
شي ما شفتوه:
-
وي سلمه.. ما قلت لج أمس شفت سيرك بالتلفزيون، يناقزون فيه قرود الشمبانزي جان أتذكرج
-
هااا؟.. شفتي القرود وتذكرتيني؟
-
لأ.. لأ، اقصد تذكرت السالفة اللي قلتيها لنا.
-
إي.. عبالي بعد؟