أنوارعبدالرحمن
هناك عدة برامج وضعت لتعرية البيوت وكشف أسرارها أمام الملأ من أجل المادة، فهل أصبح هم البحث عن المال عند البعض، حتى على حساب هدم الأسر؟
-
اعزائي المشاهدين نتابع معكم برنامجكم الاسبوعي «لحظة صدق»، وضيفتنا في هذا اليوم الخادمة «ميري» وفي الجانب الآخر امعزبتها ومعزبها، والآن نبدأ مع السؤال الأول لميري، بس انذكرها انها كلما قالت شي صحيح نعطيها 10 ساري، وإذا كذبت راح تروح عليها كلها، وسؤالنا يقول هل في يوم كذبتي على ماما وقلتي لها انچ تعبانه وانتي مافيچ شي عشان تتهربين من الشغل؟
-
ممم إي.
-
كم مرة.
-
واااجد.
-
ياعلج اليهد ياميريوه أثاريچ كنتي تقصين علي وانا مادري.
-
بس ياجماعة هدوء احنا تونا بأول الأسئلة، طيب قولي لنا ياميري هل كنتي تشتكين عند الخدم وتقولين لهم ان ماما ماتعطيچ أكل وقافلة الثلاجة.
-
هاا؟... إي.
-
ويعيه بلا ويعيه ياللي مايبين فيچ خير.
-
يا أختي احنا في حوار صادق رجاء لا تتدخلين.
-
اشلون ماتدخل؟ حرتني اللي ماتخاف من ربها.
-
والآن ياميري صار عندج 20 ساري، حافظي عليهم عشان يزيدون مع الاجابات الصريحة.
-
انزين.. بابا.
-
سؤالي يقول هل في مرة كليتي أكل البيبي وخليتيه جوعان، وقلتي للماما ان هو اللي أكله.
-
مممم.. اي.. اي.
-
واااي ياربي هدوني عليها حتى أكل الياهل كلته، كلاج بعير بلا كلاج بعير يا أم بطنين.
-
عفوا، چذي راح نضطر نوقف البرنامج، سكوت يا جماعة، سكت مرتك يا زوجها.
-
شسوي فيها قلت لها لا تيين احسن لچ قعدي بالبيت ماطاعتني تقول إلا بتسمع شتقول، الصراحة انا خايف عليها يرتفع ضغطها، بس غصبا علي يت
-
خلاص اخوي، والحين مع باقي الأسئلة، تجهزي ياميري، سؤالنا يقول: كم مرة بقتي للسايق باشا من جيب بابا فلوس؟
-
هااا؟.. مافي غيره سؤال؟
-
لا.. جوبي بصراحة بأقل من دقيقة.
-
مممم.. سبعة مرة.
-
هااا؟.. أيا الحرامية وبايقتني آنا بعد.
-
شفت اشلون وانت قاعد اتدافع عنها طول ما احنا بالطريچ؟ وتقول اهي مسكينه وفقيرة وياية من ديرة بعيدة وتاركة أهلها، قلعتك.
-
بس هدوء ياجماعة.
-
اتصدق عاد ياخوي.. انا لو الحين أقدر اصعد لها فوق هالستاند اللي حاطينها فوقها، جان راويتها اشلون اتغشني كل هالسنين الطويلة، لا وبعد تنحاش وتيي تشتكي عندكم، وانتوا معطينها ويه وتقابلونها بالتلفزيون مالت عليكم وعليها.
-
يا ختي هدي اعصابچ، هذا البرنامج اسمه لحظة صدق، مايصير كل ساعة قاعدة تعترضين، چذي نوقف البرنامج.
-
أي وقفة ياخوي هالحرمة تدور المشاكل وعوار الراس وبعدها بتطيح علي غشيانه وابتلش فيها.
-
فال الله ولا فالك.. إلا بسمع وبشوف سوالفها كلها.. كمل ياخوي.
-
يارب تصبرني على هالحرمة.
-
سمعيني ياميري الحين بننتقل لسؤال عليه 20 شريط أفلام هندية إذا جاوبتي على السؤال الياي.. أكمل؟
-
أي بابا كمل. آنا يبي يشوف فيلم هههه.
-
استعدي لهالسؤال الصعب.. هل فعلا بقتي ملابس ماما وصورتي فيها مع بابو اللي يبيع السمبوسة والجباتي، وصورتي معاه سوا سوا؟
-
هاااا؟.. امممم إي اهئ اهئ اهئ.
-
واااي قلبي.. باقت اهدومي والبستهم حق بابو مالها.. وبعد امصورين سوا سوا؟.. الحقني يا بوعيالي آآآآه.
شي ما شفتوه:
-
مو قلت لچ لا تروحين، شفتي اش صار فيچ؟
-
كله منك.
-
آنا اشعلي؟
-
كنت بروح عشان أبيها تطلع سوالفك.
-
أفا.. أنا يا ام اعيالي.
-
لا تقول أم اعيالي.. بعرف ليش كنت امطيح عند بابو اللي يبيع السمبوسة؟
-
هااا؟ اممم .. كنت أساعده على عجينة الجباتي.