أنوارعبدالرحمن
يا ترى.. هل نستطيع أن نطبق قانون الديموقراطية بالطريقة الصحيحة التي كفلت للجميع ونستمتع بها بدلا من أن نسيء إلى استخدامها.
-
جراح شفت اشلون سوى المدرس فينا، عشان بس قصينا نص الحصة؟
-
موقايلك أنا من ذاك اليوم خلنا نفش تواير سيارته.
-
يا معود.. احنا اليوم ما سوينا شي جايد، وعاقبونا طول اليوم في الساحة تحت الشمس، تبينا انفش توايره جدام الرايح والياي وتصير قضية ومخافر.
-
آنا أبي طريقة بس أطلع حرتي فيه وفي باقي المدرسين.
-
ياخي متى تخلص المدرسة ونفتك، تحس انك مقيد في كل شي، ولو تكلمنا قالوا سكتوا، وين الديموقراطية اللي يقولون عنها.
-
على طاري الديموقراطية، اشرايك انسوي برنامجنا اللي اطلبه منا استاذ البدنية (حسني) عن مجلس الأمة، وانسوي نفسنا أعضاء وانهاجم المدرسين ونستجوبهم.
-
هاااا؟.. صج فكرة.
بعد يوم:
-
يا شباب مثل ما قلت لكم وما راح أعيد الكلام كل ساعة، أنت يا مبارك تصير الرئيس ولا تنسى مطرقتك ترى راح تحتاجها وايد.
-
صار.
-
وماوصيكم بعد، ما بيكم تقعدون على كراسيكم، أبيكم تتمشون وتسلمون على اللي يمكم، وتسولفون مع اللي وراكم، طنشوا بالكل.
-
وانت يا فراس، أبــــيك من الحــــين تجهز لاســــتجواب مدرس الانجــــــليزي، ليش خسف علاماتنا، وليش ما يغششنا بالامتحان أو عالأقل يقرأ الأسئلة؟
-
حلو.. صار.
-
وانت يا محمد، ابيك تستجوب مدرس العربي، قوله ليش يخلينا نحفظ أبيات سخيفة، وكل القصايد حق شعراء قديمين، وليش ما نقرأ حق شعراء محليين، وليش ما يدخلون الشعر النبطي في منهجنا؟
-
تمام.. صار.
-
وانت يا علي، ابيك تستجوب مدرس الحاسوب، ليش كله يفــــتح ايميله ويدش الشات، ويقــول لنا ممنوع؟
-
إي صح كلامك حتى آنا باط چبدي بهالسالفة.. صار اوكي.
-
وانت يا معاذ، استجوب مدرس الإسلامية قوله ليش كله يحذرنا من المغازل وشرب الزقاير، وهو من يدخل علينا نشم ريحته قدو؟
-
اعتمد.. صار.
-
انزين يا جماعة تذكروا عدل منو اللي فيكم حره عليه عشان نستجوبه؟
-
خلنا اشوي انفكر.
-
إي تذكرت.. الـــحارس، ليــــش يفتن علينا لما ننحاش من المدرسة، أو انط من السور، عالأقل يخلينا بوقت الفرصة نروح نشتري باكيت زقاير ونرد.
-
عاد بهالسالفة صدقت.. من امه.
-
بعد اسبوع، وقت عرض البرنامج:
-
استاذ (حسني).
-
نعم حضرة الناظر؟
-
اشهالمسخرة اللي امسوينها طلبتك، ما بقى مدرس ما استجوبوه.
-
أنا كمان تفاجأت.. قالوا لي كان برنامجهم عن «ما يطلبه المستمعون».
-
ما يطلبه المستمعون هااا؟.. الحين بيي عليك الدور ويستجوبونك.
-
أنا؟.. لأ.. لأ دنا مظلوم.
-
طيب اتصرف.
شي ما شفتوه:
-
ياولاد.. اسمعوني.
-
نعم أستاذ.
-
أمرنا بحل المجلس، مفيش ديموقراطية وانتوا طالق بالثلاث، خلاص، خلاص، خلاص.