أنوارعبدالرحمن
يوسف قدم خطة لصاحبه في «المكتبة»، فهل يا ترى نجحت هذه الخطة؟
-
يوسف: شفت ذيك البنت.
-
اشفيها؟
-
هذي كنت كله أشوفها بهالمكتبة تشتري كتب وساعات تأخذ زاوية وتقعد تقرا، لكن انقطعت من فترة وما قمت أشوفها، واليوم تفاجأت انها ياية، والصراحة ودي اتعرف عليها عشان نتبادل المعلومات الثقافية والخبرة في المجالات العلمية المتنوعة.
-
خبره وثقافة هاا؟.. علينا هههه.
-
هههه، بس اتصدق مو عارف اشلون أفتح معاها بالحوار، واتعرف عليها؟
-
أفا عليك.. آنا أخوك وصاحبك يوسف وأنت محتار اشلون اتكلمها؟.. الحين أعلمك اشلون هههه
بعد دقائق:
-
كح كح.. أختي ممكن أساعدچ في اختيار الكتب؟
-
لا مشكور.
-
مممم أنا الصراحة كل يوم أيي اهنية، وكل الكتب تقريبا قاريهم، وراح أخدمچ بهالموضوع، أحم.. كمثال في كتاب كيف تتعاملين مع مسؤولچ في الدوام بس يختلف إذا كان رجل أو امرأة.
-
أنا مسؤولتي حرمه.
-
أي.. زين، بس يختلف إذا كنتي تشتغلين بقطاع خاص أو حكومي.
-
لا.. أنا أشتغل بقطاع حكومي.
-
بس عفوا.. في اختلاف مابين إذا كنتي تشتغلين بوزارة وتتعاملين مع موظفين ومراجعين أو مدرسة وتتعاملين فيها مع طالبات ومعلمات وغيرها.
-
آنا.. أشتغل بمدرسة.
-
تمام.. وفي كتاب يساعدچ على التصفح بالنت عشان تفيدين فيه المدرسة، بس إذا كنتي تدخلين شات ومنتديات، أو جديدة على هالخدمة.
-
أنا بعض الأحيان أدخل منتديات بس الصراحة ماحب النت.
-
اها.. طيب، وفي كتاب يساعدچ على التعامل مع أهلچ وأخوانچ إذا كنتي ساكنه عندهم، أو إذا كنتي ساكنه بروحچ بعيدة عنهم.
-
آنا.. ساكنة عند أمي.
-
حلو وايد.. وفي كتاب ممتاز جدا إذا كنتي متزوجه يساعدچ على الحياة الأسرية السعيدة مابين الزوج والعيال، وإذا كنتي مو متزوجة في كتاب ثاني ادليچ عليه.
-
الحقيقة أنا منفصلة وعندي ولدين.
-
حلو.. حلو تمام.. في كتاب كيف تتخلصين من ضغوط الوحدة والمسؤولية وتفتحين باب للحياة الجديدة.
-
إي عندي كتب وايد من هالنوع.
-
بس لازم أختي تحرصين على حضور الدورات اللي تساعدچ على تطبيق هالشي، وعندي تيلفونات لبعض المحاضرين إذا تحبين اعطيچ ارقامهم.
-
أنا دايما أحضر دورات من هالنوع، وصديقتي دايما تدز لي مسجات إذا كانت في دورات مهمة وتفيدنا.
-
أها.. زين، وفي كتاب وايد روعه، يعلمج كيف تختارين نصفچ الآخر وشريك حياتچ الياي، ومنها ان لازم يكون مهتم فيچ وفي هواياتچ ويساعدچ على تخطي أزمة الوحدة، و.. احم احم، أي تذكرت أختي ترى هالأيام صار رخص على دقايق المكالمات مادري قريتي عن هالموضوع بالجرايد؟
-
لا.. للأسف ماقريت.
-
أفا.. بس ترى يختلف من شركة لشركة، أخاف انتي اللي تليفوناتهم تبدي بأربع أرقام 6620؟
-
لا أنا رقمي يبدي برقم 9408.
-
أها ممتاز .. بس حسب الأرقام الأربعة الأخيرة، لا يكون بعد رقمچ ينتهي
بـ ....
شي ما شفتوه:
-
ها ماقلت لي سبع وإلا ضبع هههه؟
-
أفا وانا خوي يوسف.. سبع طبعا هههه.