أنوارعبدالرحمن
سناء لديها مشاكل خاصة مع زوجها ولكنها تتقبلها بروح الزوجة المطيعة، ولكن زميلتها هناء احبت ان تنبهها الى كرامتها وقوة شخصيتها عن طريق النصيحة:
-
سناء.. انتي للحين مشاكلچ مع ريلچ ما انتهت؟
-
ولا راح تنتهي.
-
الصراحة انتي اللي معطيته ويه أكثر من اللزوم.
-
بعد شسوي يا هناء؟.. هذا ريلي ولازم أوقف معاه.
-
من قالچ لازم؟.. انتي ما سمعت بالمثل اللي يقول: «ابنك على ما تربيه وجوزك على ما تعوديه» وانتي عودتيه على الدلع، كل ما قال محتاج عطيتيه وتسلفتي له، وحطيتي الديون على ظهرچ، وكل ما قال بسافر قلتي روح حافظك الله، وتحملتي لوية اليهال والبيت، وكله قاس عليچ عشان تتعاطفين معاه.
-
هناء.. انتي تتكلمين عن شي والتطبيق ترى شي ثاني، تبين الصچ ما في واحدة منا تقدر تقول حق زوجها لو احتاج شي كلمة لا، ولا تتحمل زعله، ولو في يوم اشوفه انه مضايق احس ان الدنيا كئيبة وما لي خلق احد.
-
واااي.. ابييه، انا بموت منچ تقهرين الواحد الصراحة.
-
عن العيارة هناء، انتي يعني تتحملين زعل زوجچ وغيابه؟
-
إي عادي.. خليچ قوية مثلي، مو كل ما قالچ «آي» قلتي له ياعلها فيني ولا فيك.
-
عيل اشتبيني اقوله؟
-
قولي له مثل ما قول حق ريلي «تعيش وتاخذ غيرها».
-
ابييه من صجچ تقولين له چذي.
-
إي.. ويكون بعلمچ إذا قلت له چذيه، يضحك ويقولي «حلوة منچ يا قمر».
-
صچ.
-
إي صچ.. يا حرمه فهمي، ترى الريال مايبي اللي تلزق فيه، تبي اللي مطنشته، هذي اللي يركض وراها.
-
ها؟.. مممم عيل شورج.. وهداية الله.
شي ما شفتوه:
-
هناء لحقي.. أمس زوجي ياني بالليل متعور، كان لاعب كرة مع ربعه وطاح على اركبه، جان اسمعه يقول «آي»، جان اذكر كلامچ واتشجع واقوله «تعيش وتاخذ غيرها».
-
صچ؟ تكفين قولي لي.. شنو قالچ؟
-
ما تصدقين له اقولچ شنو قال؟
-
لا اصدق، قولي.
-
قالي «حلوة منچ يا قمر» ههه جان ادعي لچ من كل قلبي على نصيحتچ.
-
شنووو؟.. عيل أنا يوم قلت له ذيك المرة چذيه، ما كلمني أسبوع كامل واعليه علي.
-
هااا؟.. عيل اللي قلتيه لي كان جذب؟
-
إي.. جذب اهئ اهئ اهئ.
-
شنووو؟