أنوارعبدالرحمن
«خربطة» فكرة استوحيتها من البرنامج الإذاعي الناجح «لخبطة» على محطة مارينا إف إم، والذي يشدني للاستماع إليه دائما، ومن هنا أسجل شكري وإعجابي لطاقم البرنامج في هذه المحطة المتميزة:
-
أعزائي المستمعين نحييكم في برنامجكم اليومي خربطة، دزوا لنا حرف (طاط) على أرقام هواتفنا، ورتبوا معانا الخربطة أمثال وقصايد وأغاني، دوس بانزين وخربطني (بط بط) دربك خضر، ومعانا أول اتصال من نعيمة تفضلي.
-
ألو.. أستاز حمد عاوزه منك حاجة سهلة لو سمحت عشاني.
-
حاضر من اعيوني.. سمعي معاي زين ورتبي الخربطة (بالصيف بالشتا حبيتك حبيتك) دوسي بانزين ودربج خضر.
-
مين ده اللي بالصيف والشتا حبيته؟ جاه الأوى بلا نيلة..
-
هههه ترى هذا المقطع من اغنية مشهورة وسهلة.
-
آه عرفتها.. حبيتك بالصيف حبيتك بالشتا.
-
ياسلالالام.. أميرة أميرة
-
أنا اسمي نعيمة مش أميرة.
-
هههه أدري.. بس قصدي أمدحج، ولا تنسين تاخذين جائزتج من أستوديو (إف طن) ومعانا الأخت شروق، حياج الله في برنامج خربطة
-
تكفى ساعدني.. انا توني مخلصة واجباتي وتعبانة حدي.
-
الله يعينج.. وعساج عالقوة، المهم الحين بعطيج المثل ويارب ترتبينه وتستانسين.
-
ياليت يارب يسمع منك.
-
المثل يقول، ما إلا انبطح طاح.. ودوسي بانزين، دربج خضر.
-
هاا؟.. شنو؟ عيد المثل.
-
المثل يقول.. ما إلا انبطح طاح.
-
مممم... ما انبطح إلا طاح.
-
هههه.. يا شروق صرتي غروب.. جوابج طاح وانبطح هههه
-
واااي.. لأ لأ بطيت بط بط.
-
اعزائي المشاهدين (خربطني وما علمني.. دق علي وما كلمني، دز مسج ونرفزني، وأكل عشاي وفلسني) رتبوا الخربطة ودربكم خضر، ومعانا اتصال من سعود، يا سعود باقي من الشهر 25.. دربك خضر تفضل
-
ياهلا.. أنا داش اتحدى.. 3 مرات أبط، والرابعة بنجح فيها أكيد
-
إي لازم تنجح، والحين رتب الخربطة اللي تقول (فوق صاح السور ديك) ودربك خضر.
-
هااا؟.. مممم الظاهر أني بقول كوكو كوكو، وبطيييت بط بط
-
هههه ياحليلك يا سعود.. اختصرت الخربطة وصرت اتكاكي ههه بس لا تنسى العشا هههه، ومعانا اتصال من بدر.. والقمر اليوم بدر حياك.
-
طلبتك تعطيني شي سهل، ترى مالي خلق الناس بإجازة وأنا أكرف بالدوام.
-
هههه عساك عالقوة رتب الخربطة اللي تقول (يضحك شي هههه يبجي مع انه) دوس بانزين ودربك خضر.
-
شنو هذا؟.. مثل وإلا اغنية وإلا شنو بالضبط.
-
هااا؟ ممم.. مادري المعد كاتبها جذيه.
-
هههه شي يضحك، مع انه يبجي.
-
صح صح.. صح أمير، أمير يا بدر.
-
شنو أشصاير؟
-
إجابتك صح.
-
صج؟.. آنا ترى قلتها قصدي عن اختيار معدكم.
-
شنوووو؟
-
لأ.. لأ.. أقصد أنا رتبت الخربطة اللي حطها معدكم كح كح كح
شي ما شفتوه:
-
ألو.. مزيونة تفضلي رتبي الخربطة، ودوسي بانزين دربج خضر.
-
تكفى.. طلبتك.. قول عطيتج.
-
ممم ما يصير.. الحين بقول الخربطة ورتبيها.
-
لأ.. لأ بلييز.. قول أول عطيتج.
-
هااا؟.. أحم أحم قلت لج ما يصير.. سمعي المثل ورتبيه.
-
جذيه يعني، بزعل عليك ترى؟
-
لا كل شي ولا ازعلج.. خلاص، عطيتج.
-
وناسه.. مشكور بعد عمري، أنا اللي ودي أعطيك مثل وانت رتبه ولا أبي هدية، اعتبرها مشاركة من مستمعة متفاعلة معاك حدها.
-
احم احم.. خلاص قولي.
-
المثل يقول (بعد بره البرنامج بنطرك الاستوديو حبيبي)
-
هاااا؟ لأ لأ لأ.. عسى ما رتبتها مرتي؟ أشهد اني بطييييت بط بط بط